منتدى عالم الأسرة والمجتمع - عرض مشاركة واحدة

27-03-2009, 12:47 PM

ماريا

عضو المنتدى الفخري

تاريخ التسجيل: Jul 2006

المشاركات: 10,538

بتعرفي هانديا

أنا كمان مو دائما بحب طبخي و ممكن اطلع بطبقي أكتر من عيب و بنفس الوقت زوجي أو غيره بمدحوا الطبق لآخر حد !! و للي بأكدلي انه زوجي ما عم بجاملني انه بشوفو بياكلو بكميات يمكن يخلص الطبق مع انه مخصصتو لأكل يومين .... و بقول بقلبي مستحيل يكون الطبق مو لذيذ و خلص بهالسرعة

و الشي اللي بزيد ثقتي بنفسي انه زوجي لو اجانا أكل ضيافة من صديقة لي أو ما شابه معظم الأحيان ما بعجبه
مع اني أنا بكون ما عندي أي ثقة بأنه اللي عملته لذيذ
لكن طبعاً هالشي مو دائما
يعني لما بكون جاي على بالي طبق معين و بروح بعمله بحاول اتفنن فيه
بركز على الاكثار من المنكهات اللي منحبها
يعني انا و زوجي من النوع اللي بحب الليمون يكون ظاهر بالأكل لذلك بكتر الليمون بالأكل اللي بدو حمض
الطبق اللي ممكن زينه بالمكسرات بكتر فيه كمية المكسرات اكتر من انه يكون مجرد زينة
الطبق اللي بيحتاج دسم اكتر ما بحرم نفسي من الدسم

(الحمد لله مو مضطرين للريجيم حالياً)

البهارات :
كنت ببداية زواجي لما اعمل أكل لازمه بهارات بروح بحط كل أنواع البهارات اللي عندي
و بالنهاية الطعم ما بعجبني أبداً
بعدين صرت اسأل و اقرأ و سجل على الورق كل أكلة شو بهاراتها المستخدمة
استفدت كتير من الأخوات في المنتدى و من التلفزيون بالأكلات اللي أمي ما بتعملها (يعني اللي مو سورية)
اول مرة عملت كبسة حطيت كل انواع البهارات
بعدين لاحظت انه فلفل و قرفة و قرنفل و هيل كافي للكبسة و ما في داعي حط كل شي عندي فيها !
و فعلا بدأت أحبها لما صرت أعرف اعملها
بحاول ما اشتري أي نوع رز أو خضار أو غيره بحاول مع الملاحظة و مدح الناس احفظ كل أكل عندي من أي ماركة اشتريه لدرجة احيانا بسجلها على ورقة حتى ما انسى اسم الماركة و بوصي زوجي عليها
اذا عجبتني أكلة عند حدا باخد وصفتها و ما بيكفيني شرح عادي باخد شرح مفصل و اذا ما استوعبت بطلب من صديقتي مثلا ترسلي الوصفة على الايميل او تعطيني ورقة و قلم اكتبها مع المقادير بالتفصيل

انتي لما تجي تعملي شي ما تعمليه من عقلك حاولي تشوفي كذا وصفة و تسألي أكتر من حدا و بعد ما تاخدي رأيين أو 3 أو 10 اعملي اللي أكتر شي أقنعتك مكوناتها و حسيتي انك ممكن تحبيها
هي تجربتي
ان شاء الله كون أفدتك
الك علي اعطيكي أي وصفة طبخة سورية

مقابل مساعدتك إلي في المكياج شو رأيك ؟؟

عم بمزح

شو يعني ما في شي ببلاش ؟

__________________
.
.

استودعتك أهلي في سوريا يا من لا تضيع ودائعه