السلام عليكم و رحمة الله و بركاته
أنا متشكر جدآ لأهتمامكم
و أحب أجاوب عن أسإلتكم
ربنا يهدينا لما فيه الخير

عمر البنت 7 سنوات المصروف نصف جنيه يوميآ
المبلغ الذي أخذته 15 جنيه عندما عرفنا الموضوع و تاني مره 2 جنيه
و للعلم أمها عرفت منها أمبارح أنها عملت الموضوع ده كتير في فلوس فكه كانت مع أختها الصغيره و طبعآ أنا أقريت بغلطنا لأن البنت الصغيرة كانت بتلعب بالفلوس الفضه ممكن توصل ل 5 جنيه و بصراحه أنا لاحظت أن الفلوس الفضة أختفت بس مجاش ف دماغي أن أختها خدتهم و نبهت على أمها أن ده مايحصلش تاني .


جمالها عادي و ليس بمثل جمال أخوتها و شعرها ليس بجمال شعر أخواتها
أختها الكبيرة في الإعدادية و من الأوائل و يتم تكريمها في المدرسة
الأم لا تعمل و معها مؤهل عالي
الأم عصبيه بعض الشيء وكذلك أنا و لكنني أحس بأن الأم حنينه عليهم جدآ مع حزم بخصوص التربيه و المذاكرة و الله أقاربنا يضربون بهم المثل في التربية الحسنه
البنت لا تأخذ دروس خصوصيه و والدتها هي التي تتابع مذاكرتها في البيت
تعود من المدرسة حوالي الساعة 2 ظهرآ و تنام حوالي ساعتين ثم تبدأ في المذاكرة ثم مشاهدة التلفزيون أو النت
أنا ليس لي مواعيد ثابته فأنا صاحب شركة صغيرة
و لقد أدركت من فترة أنها تعاني من تحويل إهتمامنا بها لأختها الصغيرة
فحاولت أن أضمها لي كثيرآ و ألعب معها و لكن أختها الصغيرة و نظرآ لصغر سنها تلفت إنتباهنا جميعآ بشكل كبير
الفارق العمري بينها و بين الطفلة التي تليها حوالي 4 سنوات
لكن في ملحوظة مهمه
البنت كانت تنام معانا و هي رضيعة و لما فطمتها والدتها لم ترضى بأن تغادر السرير معنا بسهوله مثل ما حدث لأخوتها
بل كان الموضوع في غاية الصعوبة
من فضل الله علينا أنه لا توجد مشاكل تذكر بيني و بين أمها و لله الحمد بيتنا يضرب بيه المثل في التفاهم نظرآ لأن العديد من أقربائنا مشاكلهم كتير و على العلن
فأنا أحاول أن ألبي طلبات البيت و أمهم تحاول أن تلبي طلباتي و لو إختلفنا في موضوع أمهم تتنازل فورآ لحفظ أمان البيت و الحق أنني و لله الحمد بحاول أترك لها معظم أمور تربية الأولاد لكن فترة وجودي بالبيت براقب الي بيحصل و أتدخل فورآ لو في حاجه حاسس أنها مش تمام
لله الحمد أكتر من 16 سنه جواز ما سابتش البيت يوم غضبانه عند أهلها و محدش عرف عننا حاجه
بالنسبة للعدل بين الأبناء فإحنا بنحاول بس للأسف مش 100 في الميه على طول
مثلآ البنت الصغيرة بتشاغب كتير و تشاغلنا بإعتبار سنها
و البنت الكبيرة متفوقة دراسيآ فبنفرح بيها و الولد لازم متابعته بصورة كبيرة في مذاكرته و كذلك البنت موضوع المشكله
بالنسبة لملاعبة الأولاد تتم بالجمله مش بشكل منفرد
بس بحاول آخدها في حضني و أنا بتفرج ع التليفزيون و بتعمد أني أغرقها حب عشان حاسس أنها مش مبسوطه من ‘هتمامنا بأختها الصغيرة لدرجه أن أختها الصغيرة لو قالت كلمه جديده بنفرح طبعآ فتقوم هيه قايله طب ما أنا بعرف أقول ذيها
بنقولهاأنتي حبيبة بابا الكبيرة و هكذا بس ملاحظ جدآ غيرتها من أختها الصغيرة
بالنسبة في التحكم ف مثلآ أنا برفض أنها تلعب مع أولاد خالتها في غرف مقفولة أو حتى تلعب معاهم إلا قدام عنيا
و بالنسبه للبس مهم أنها ما تلبسش حاجه قصيرة و لا عريانه مثلآ لو في جيبة قصيرة بيقى تحتها بنطلون
ومامتها بتصر على عدم زياده المصروف إلا بالتدريج مع تقدم سن الطفل
لأسباب منها فساد الطفل بالتدليل و عدم إثارة غيرة الآخرين

أما بالنسبة لآخر الأخبار

فأمها لطفت معاها الجو و سألتها عرفت أنها عملت كده قبل كده و قالت أنها بتجيب بيهم حجات حلوه عصير و شيبسي و خلافه و بتعزم زمايلها في المدرسة
و عرفت برضه معلومه مهمه
أنه ليها زميلة في الفصل ما بتجبش معاها ساندويتشات في المدرسة و بتطلب منها ساندوتش و لو مالقتش معاها بتطلب من أي بنت تانيه و لومالقتش بتقعد تعيط عشان جعانه
بس ما بتجبرهاش إنها تديها
الموضوع ده في منتهى الأهمية
ليه؟
أنا قلت لأمها أنه زياده المصروف و لله الحمد نحن قادرين عليه ماديآ بس له سلبيات كتير و أخطرهم من وجهة نظري أن بعض الأسر لا تقدر على ذلكيبقى حرام عيالنا يروحوا المدرسة بفلوس كتير و غيرهم لأ و طبعآ العيال بيبصوا لبعض مش بعيد نبقى سبب في أن عيال تانيه تسرق أهلهم عشان يتساووا مع بعض في المصروف و طبعآ نبقى إحنا السبب
يبقى نغير الخطه
كل يوم أمها تعمل ساندوتشات لبنتنا و كيس ساندوتشات لوحده للبنت التانيه
و تديه لبنتنا و تقولها تديه لصاحبتها بس في السر عشان ما تحرجهاش
و بكده هيحصل أكتر من حاجه إن شاء الله
1 - البنت هتفهم أنه في ناس ظروفهم أقل و ده هيهدي نفسها شويه
2 - ربنا هيكرمنا و يهديها للخير بهذه الصدقة

و إحنا من ناحيتنا هنفخر بيها عشان بتعمل خير و في السر عشان تراعي مشاعر غيرها
يبقى ألي بيجيب حاجه و يتمنظر بيها على الناس يبقى مش كويس
و الله أعلم