منتدى عالم الأسرة والمجتمع - عرض مشاركة واحدة

06-05-2009, 05:57 PM

#277

dodi_dabdoobi

عضو مميز

تاريخ التسجيل: Apr 2006

المشاركات: 2,684

السلام عليكم

اكمل حكايتي مع وزني الزايد

ااااااااااا صح وصلنا لنزولي لاقصى حد

كان كل شي اشتريه مقاس سمول و كل شي كان حلو حتى خطيبي مرة شالني و من فرحته بيا لف بيا في الغرفة مو مصدق اني نحفت حتى من بعد الملكة كمان

كنت اذا ما قمت من كنبة او سرير الدنيا تلف في دماغي و النور يروح و احيانا الصوت يخف في اذني يعني اغماء بسيط و دخلت نادي و ما كملت عشان كنت ابغى اشد الترهلات و كل اللي في النادي تخان و يقولولي اكيد استخفيتي حرام عليكي اخرجي ما تحتاجي رياضة !!

كانت ايام حلوة ايام الرشاقة لكن ايش الفايدة و هيا بمرض؟؟

عشان كذا دايما دعواتي ان ربي ينحفني و انا بصحة و عافية و سعادة و راحة

و لما خلاص حسيت اني بموت قلت لماما انا لازم اروح للدكتور

و تخيلو برضو الدكتور ما عرفني و قال لامي احلفي انها دودي

!!!

و هوا يشوفني بالاشعة و يقول ما فيكي شي

غيرت الدكتور و رحت لواحد تاني قال انتي كيف عايشة انتي من دحين تنوييييييييييييييييييييم ضروري لازم نلحقك لا تموتي علينا

ضغطك نازل و السكر مبهدل و مافي املاح و جفاف فضيع عندك و حالتك حالة و ممكن تروحي فيها غيبوبة

و بسرعة كتبلي عالتحاليل و الممرضة تاخذ عينة الدم مني بالرغم من انها قليلة جدا الا انه اغمى علي يمكن لمده دقيقتين و امي تبكي و الدكتور جا و الممرضة هربت فكرت انها غلطانة و اكرمكم الله عملتها على نفسي من الضعف و الهبوط

و عملت عملية و خيرني بين اني اشيلها او اخليها _الحلقة_ قلت خلاص توبة ما ابغاها شيلها

و شالها و ما خرجني من المستشفى الا بعد 3 ايام من الجفاف و المغذيات و المحاليل كلها زودتني من ال58 تخيلو كم صار ؟؟؟

70

يعني زدت من السوايل بس 12 كيلو

العباية اللي جيت بيها ما تكفيني و اعزكم الله شبشبي و ملابسي و كل شي اتغير عليا في ظرف 3 ايام

رجعت البيت قمة التحطيم و القهر و ما قدرت اوري شكلي لخطيبي و اكتئبت اكتئاب شديد و رجعت لرفيق عمري الاكل

لاني انحرمت السنة كلها و انا ما اكل شي ينزل معدتي

و الموز كنت اكله بين الوجبات لان عندي نقص بوتاسيوم
و دهون و بلاوي الين صار يطلع بسرعة صاروخية

فترة خطوبتي دامت سنتين تقريبا

و قبل فرحي ب 5 اشهر وزني وصل ل 105 و امي قالتلي حرام تتزوجي كذا تعالي اعملي العملية تاني

و دخلت و عملتها تاني و دي المرة فشيلة قدام اهل زوجي يعني المفروض اختفي بعد العملية و ارجع لهم سمبتيك

و الناس كلهم عرفو اني عملتها و الكل صار يترقب انزل او لا خصوصا ان كثير كانو يبغو يعملو العملية نفسها و يبغو يشوفوها عليا اول

و نزلت الين يوم فرحي بسسسسسسسسسسسس 10 كيلو و صرت 95 كلج

طيب ايش يصير في البنات بعد الجواز ؟؟؟؟؟؟؟ برافو عليكم يتخنوووووو و خلال 3 سنين و نص انا وصلت لوزن قياسي جدا و حطمت كل الارقام

وصلت ل 130

مع الاكل و الطبيخ و المطاعم و السفر و الملابس الواسعة و و و وصلت (و لا تنسو الاصرار

) لهذا الوزن الرهيب

هذا و بالحزام و لو مافي كان يمكن اكثر

و برضو امي حزنت عليا و ودتني للدكتور و هناك قرر انه يعمللي تحويل مسار المعدة كآخر الحلول و ان ما نزلت فهذا نصيبي و قدري و لا يمكن تغييره

و عملت العملية و دحين صار لي سنة و نص تقريبا عاملتها

اول العملية كان النزول سريع نزلت لغاية 115 يعني 15 كيلو بسسسسسسسسسس و وقف وزني بعدها و هذا الكلام صار خلال 6 شهور تقريبا
يعني قبل سنه

و من بعدها و الميزان ما يتحرك و ينزل عن 115 الين اليوم
و باقرا في المنتديات و باسال ناس و قالولي ان دكتوري الله يسامحه غلط غلطة فادحة انه شال لي الحزام و عمل لي التحويل على طووووول

يعني كان المفروض يشيل الحزام اول و بعدها ب 3 اشهر الى 5 علشان المعدة لازم ترتاح فترة و تاخذ شكلها الطبيعي

و هذا الغلط ادى الى توسع المعدة عندي
و الآن محسوبتكم تاكل عادي مثلكم و بنفس الكميات و لكن قد يكون الامتصاص اقل فعلا من ناحية امتصاص الفيتامينات فقط اما الدهون و السكريات جسمي مو راضي يستغنى عنها

و ايام حملت اخر مرة اتخيلت اني انا دحين وزني 115 و في اخر الشهر الاول صرت 117 قلت اجل كيف في التاسع ؟؟؟انفجر ؟!؟!

و هذا الي مخليني اصر على نزول وزني و لو على الاقل 30 كيلو لحد رمضان باذن الله و حوله و قوته ثم بدعمكم و همتكم ما شاء الله عليكم حمستوني

الله يديم الاصرار على النزول و يقوي الارادة و ينزل مراد كل وحده فينا و يبلغنا ما نحب و نرضى في الدارين

و سامحوني ان اخذت مساحة كبيرة من وقتكم و لكن ما بيدي غير اني افضفض هنا و ارجوكم لا تنسوني من دعواتكم الصادقة بالنحف و الذرية الصالحة

شفتي يا ام جمانه الاصرار دا جاي من فيييييييين ؟!؟!؟

و سلامتكم

__________________
رب لا تذرني فردا و انت خير الوارثين