عزيزتي كارولينا...
انا حاسه فيك ... ومتعاطفه معك مرررره
لاني امر بنفس الموقف اللي تمرين فيه انتي..واحس اني اتعذب وظلمت زوجي معي..
لدرجة اني احيانا ابكي.... مع ان زواجي قرب ما بقى عليه شيء..
بس تدرين وش سويت لجأت الى الله لاني مالقيت احد اشكي له همي بعده..
ودعيت الله ان يسخر قلبي لزوجي ويسخر قلبه لي...
الحمدلله قدرت اسيطر على نفسي... واتحكم بمشاعري.. عرفت كيف
اميل لزوجي.. تذكرت الاشياء اللي يسويها لي انه بنى بيتنا وانه اختارني انا بالذات..
وقمت راجعت نفسي لقيت اني غلطانه...
من اول كنت ادور اي غلطه علشان احسس نفسي بالذنب اني توني صغيره واستعجلت
بس الحين.. اتمنى متى تجي الايام اللي اكون معه علشان اسعده.....
عرفت كيف ابدل شعوري له..
تبين تعرفين ليش انتي مو قادره تتقبلين زوجك لانك تفكرين بحبيبك..؟؟
بس صدقيني لو جلستي بروحك راح تحنين عليه وتكرهين نفسك وتلومينها
ليش سويتي كذا... راح تعطفين عليه...
وبعدين انتي لاتحكمين على حياتك كذا وتخربين مستقبلك بيدك..
والله ياكارولينا انتي في نعمه بنات كثير يتمنون يكونون مكانك..
يلقون صدر حنون يتقاسمون معه مصاعب الحياة يشكون له..يلقون زوج يتكلمون معه
يحس فيهم يلقون عيال ....فاحمدي ربك على هالنعمه قبل لاتضيع من ايدك وتندمين عليها
انا حسيت فيك ومن كلامك انك انسانه عاقله وواعيه ومستحيل تهدم حياتها لمجرد حب عابر
بكره بتلقين عند زوجك حب وعطف وحنان واشياء احلى ىىىى من كذا واعمق.....
فكري معه بالمستقبل ابنوا وخططوا لحياتكم المستقبليه ...
وحتى لو لقيتي فيه اشياء مو حلوه ولا تعجبك.. راح تقدرين تغيرينها بإذن الله
شوية صبر وحب وراح تتغلبين على اشياء كثيره...
لاتظلمين نفسك وياه علشان شخص يمكن مايستحق حبك...
صدقيني لو حبيبك يحبك وصادق بشعوره ويتمنى لك الخير كان هو قاطعك وقال لك انا ما اقدر اتزوجك وان شاء الله ربي يسعدك ويوفقك مع زوجك واتركك..
اصحي ياكارولينا... انا ارجووووووك لاتضيعين مستقبلك... ولا تحتارين
تراك انتي في وهم والشيطان لاعب عليك... يبي يخرب عليك
بس لو جلستي مع نفسك وفكرتي بالاشياء اللي يسويها لك زوجك علشان يتقرب منك
راح تستحين من نفسك.. ويمكن تكرهين نفسك لانك مقصره معه..
واحمدي ربك انك تشوفين زوجك.. يمكن هالشيء يخفف عليك شوي..
انا ما شفته بس اسمع عنه ..وكفايه انه اختارني من بين البنات هالشيء يخليني اشعر بالسعاده....
واذا عندك استفسار ولا اي شيء انا بالخدمه.. ولو عن طريق الرسائل الخاصه..
واتمنى لك التوفيق بحياتك والله يسعدك ويسخر قلبك لزوجك ويسخر قلب زوجك لك

وامانه لاتخربين حياتك بيدك ..وبكره تعضين اصابع الندم....
بما انك بأول الطريق سيطري على نفسك وخليك قويه وانظري للمستقبل بنظرة امل وفرح
وادعي الله ما لك الا الله...ومثل ماقالوا لك الاخوان وعسى ان تكرهوا شيء وهو خيرا لكم..
سبحان الله ماتدرين يمكنه خيره لك... وبكره راح تعرفين قيمة زوجك... لاعاشرتيه وعشتي معه..راح تنسين كل شيء...
اتمنى اكون ريحت قلبك.... والله يوفقك
واخيرا تقبلي تحياتي