بعد 3 شهور راجعة اقول لكم تجربتي في الامبلانون + سؤال عن حبوب Regulon
السلام عليكم و رحمة الله و بركاته
فاكرين موضوع الامبلانون الي حطيتو مرة
انا حطيتها
وكما وعدتكم بعد كم شهر حاجي اخبركم عنها شو صار معا
انا وضعتها يوم 22 ابريل
والي صار معي
كنت احيانا ادوخ
ودايما تعبانة
وحاسة بهبوط
و مغص ووجع ظهر
تقلبات المزاج
كل هادا كان من وقت لاخر وكان مقدور عليه
لكن المصيبة في نظي النزيف
بدا عندي بعد تركيبها باسبوعين تقريبا
كان بالبداية تنقيط خفيف جدا ومقدور عليه
استمر 12 يوم ثم اتتني الدورة طبيعي
وبعد انتهائها صارت افرازات بنية
بعدين 5 ايام وبلش النزيف بس المرة كان غير شكل
مفروض مع الاشهر يقل ويتحسن
لكن الي عندي زااااااد
واستمر خلال شهر 5 كلو وشهر 6 كلو بلا توقف ولا يوم
تمر ايام يخف شوي لكن يرجع الهنا مرة تانية
اخدت دواء الدافلون لتقوية الشعيرات الدموية مافي فايدة
رحت الدكتورة وانا قرفانة لتشيلها الي
عطتني حبوب progyolton اعتقد مش حافظة اسمها تماما لكن انا رميت العلبة للاسف
لكن والله اعلم هيك اسمها يمكن غلط في حرف
هية هرمونات
ومفعولها قوي
ولا حياة لمن تنادي
النزيف اتبعني جدا
نزيف قوي كان النفاس ماكان عندي هيك
ونفسيتي تاثرت جدا
خاصة الجو حررر صاير وانت فاهمين قصدي القرف الي الواحدة تحس فيه
ماكنت اتهنى بشي لا بلبسة حلوة ولا بطلعة اضل قلقانة من النزيف
المهم بالاخر خلص رحت يوم 29-6 وشلتها
وتاب الله علية منها
حبيت اقلكم تجربتي التعيسة بالنسبة الي
الدكتورة قالت انو جسمي حساس جدا لهرمون البروجسترون وماتحملو
وانا مابقلكم ماتجربوها لانو تجربتي سيئة
لانو في ناس الدكتورة بتقلي حطوها 3 سنين ورجعو شالو القديمة وركبو الجديدة
لاحس ولا خبر مايحسو فيها اشي
وقرات في المنتدى عن الاجانب ناس بتقول ولااااااتتزكر انها حاطاها الا في حال لمست ايدها مكان وضعها
وناس زادتهم 20 كيلو
وناس عملت فيهم زيي
الخلاصة كل جسم يختلف وماحتعرفي ازا تناسبك او لا الا بالتجربة
ممكن جدا تزبط مع وحدة وتنبسط فيها والتانية تتعبها
انا طلعت من النوع التاني
تبهدلت عنجد
والحمدلله الان رقت احسن من الاول
ناتي للشق التاني
الدكتورة بنفس اليوم عطتني حبوب مركبة
اسمها regulon
قال شو هية مركبة
لكن اخف من المارفيلون مثلا
انما نفس الفعالية
نسبة الهرمون منخفضة
واثارها الجانبية اقل بكتير من الاخرى
اناهيك قرات كمان في النت عنها انها فعالة لكن اخف تاثيرها من نظيراتها
المهم قلتلها انا برضع قالت حتتاثر كمية الحليب شوي لكن مش نفس المارفيلون عشان هاي اخف
بس انا قرات بالنشرة انو مكتوب انها تاثر عالحليب ليش فقط بالكمية انما يتم طرح من مواد الدواء في حليب الام وتروح للطفل
واكيد هاادا مضر
والدكتورة راحت قالت انو عادي لانها هرمونات طبيعية في جسم كل انسان
وانا الان محتارة وجوزي بقلي بدناش لا حبوب ولا غيرو ارتاحي صحتك اهم
وللي بيعرف في هالامور انا حكتب مكوناتها
مكتوب عليها
desogestrel 0.15 mg
ethinylestradiol 0.03 mg
هي صورتها
هل صحيح انها اخف من نظيراتها ونفس المفعول؟انا قلتلها طالما انها جيدة هلأد ومافي اعراض زي غيرها وبتمنع الحمل ليش الناس تاخد مارفيلون
راحت قالت عشان مابعرفو عن هاي
صراحة جواب ماعجبني
كان نفسي اقلها مهيك بتعطي النساء مارفيلون وياسمين
ليش مبتعطيهم هاي مهيك بتعرفي عنها
بس حسيت انو احراج وقلة زوق مني
بطنشت وروحت
صراحة انا بحس الدكاترة مهما كانو مهرة وشاطرين مابحسهم قلبهم عصحة المريض كتير
وانا سالتها عن انو الحبوب بتزيد احتمالية السرطان
قالت انو بتقلل احتمال سرطان الرحم
لكن بتزيد سرطان الثدي و عنق الرحم يبعد عنا الشر
لو كان الامر وراثة في العيلة
وانا قلتلها عن ابنة خالتي معها ياحرام سرطان في الصدر وازالت الورم كنت مفكرة انو حميد فقالت لي
مدام حميد مابكون وراثة
بس لما سالت ماما بعدها قالت انو خبيث واستاصلت الصدر يبعد عنا الشر
لكن سالت اختي الصيدلانية قالت مالو علاقة فينا بصير وراثة في بنتها وبنت بنتها بس احنا مالنا دخل
فهل هادا يعتبر وراثة النا بعيد الشر؟
بالتالي مابنفع الي الحبوب؟
ياريت الي بعرف يفيدني عن الحبوب هاي حاولت ادور في النت ماقدرت
عالمواقع الاجنبية شفت انو بقولو انها اعراضها اخف
لكن الكل بقول ماتنفع مع الرضاعة
ياريت الي بعرف يقلي رد مفصل وبارك الله فيكم
انا الي 7 شهور ونص والدة لليوم ماارتحت لا من نزيف
ولا ارتحت عمانع حمل ومحتارة و عنجد انو ملل
وانا مااببالغ والله ولا قلقانة زيادة لكن خلص بدي استقر واخلص
هيني جربت الامبلانون تعبني جدا وبهدلة مابعدها بهدلة
لو مابرضع كان اخدت الحبوب كم شهر وخلص
لكن الان مع الرضاعة مافي امامي خيارات
نفسي اريح بالي واكون مطمئنة
انا مش مهووسة باني مااحمل يعني
بس بدي اعمل الي علية يعني مش معقول اترك حالي هيك واحمل
يعني بدي اتوكل واخد بالاسباب وبعد هيك اللي من الله حلو
بس بالاول والاخر لازم اخد الاسباب الاول
__________________
{ اللهم صل و سلم على سيدنا محمد }
رفيق العمر سافر حيث شئت وجرب في حياتك ماأردت
سترجع ذات يوم حيث كنت فعمرك في يدي والعمر أنت