اختي العزيزه ام حمزه .. الاطفال الصغار في عمر ابناءكم عاده يكونوا متعبين و محتاجين لمن يسليهم
طووول الوقت .. وهذا يحتاج لوقت و مجهود من الام .. واذا استعنتي باطفال اخرين لتسلية ابناءك
اعتقادا منك انهم سوف يريحونك فانك تتفاجأي بانك اضفتي مجهود اكبر على نفسك ..
لكن ما باليد حيله ان شاء الله فتره و تعدي لازم تصبري ..
اما بخصوص بنات سلفتك خليهم مع ابناءك فتره ساعتين و بعدين عطيهم حلويات و قولي لهم خلاص
انا عندي شغل او مشوار و بوسيهم و خليهم يروحوا بيتهم مع الوقت راح يتعودوا على طريقتك بمجرد
ما تعطيهم الحلويات يروحوا بيتهم .. يعني لا تعطيهم الحلويات الا وقت خروجهم من بيتك عشان يطلعوا
و هم فرحانين ..
اما بالنسبه لسلفتك و كلامها عن عمل زوجها و زوجك فاسمعي منها و لكن لا تجيبي سيره لزوجك
انت غلطانه انك تنقلي كلامها لزوجك و تعملي منه مشكله ..
اذا قالت لك زوجك ما قال لك هذا الخبر .. قولي لها زوجي مو من النوع اللي يتكلم في هذه الامور
و لا تبيني لها انك زعلانه من هذه الصفه اللي في زوجك ..خلي الامر عادي جدا ..
انا اشوف ان الزوج ما ينقل كل امور عمله لزوجته افضل حتى لا يشغل بالها بهذه الامور اللي ما تخصها
لكن مو معناته اذا زوج اخبر زوجته بامور عمله ان هذا عمل غير جيد .. كل شخص له طريقته الخاصه
في مثل هذه الامور .. يعني مو لازم زوجك يصير مثل اخوه وينقل كل الاخبار لك .. احترمي هذه الصفه
في زوجك ..
و عاده اختي ام حمزه اذا كان المكان يضم اكثر من عائله فطبيعي ان تصير فيه مثل هذه المواقف ..
طووولي بالك وو سعي صدرك اهم شي تضعي لك استراتيجيه و حدود في التعامل مع من حولك ..