عزيزي

فيه مثل با العاميه ومنتشر عندنا با الباديه يقول ( من بغى الدح ماقال اح) يعني الي يبي يرقص ويستانس ما يقول اح ولا يتعب.

يعني اذا تبي تعلم زوجتك ، لا تقول تعبت وترى مافاد فيها ، انصح وانصح وانصح ، واذا مافاد انصح وانصح وانصح وانصح، لا تكل ولا تمل ، سبحان الله ، ما نتعب من مطاردنا لبنات خلق الله ونتعب من اول بضع مرات نكلم فيها زوجاتنا.

وبعدين كل بناتنا تربوا على ها الطبيعه، او الاغلب ان صح التعبير، بحياتهم قبل الزواج محدوده الاتجاهات بكل ماتعنيه الكلمه من معنى.

حبيبي وربي حتى عندهم حدود في خيالهم وافكارهم، وانا هنا ما اقلل منهم ، ولكن تربيتهم النقيه الطاهره تحتم عليهم كذا.

بعض البنات اذا تبي تفكر وش ممكن يصير بين اي زوج وزوجته او وش ممكن تسوي مع زوجها، تتعوذ من ابليس وتقول صدق اني ما استحي ، وش لون افكر في مثل ها الامور ، وتروح تبكي وتستغفر ربها،اذا احتلمت او تحلمت تقوم خايفه وتقعد اسبوع وهي تعبانه،وتقول وش ها الي قاعد يصير فيني، انا عن نفسي ما اسمي ها الاشياء نقص او جهل ، ولكن براءه التربيه ونقاء السريره بينهم وبين انفسهم ، وهذا طبعاً شيء ممتاز ، ولكن برضوا في حدود.

المشكله عزيزي ان اهلها ما علموها ولا كلموها قبل الزواح، ولكن انت برضوا لا تقصر معها.

حبيبي هذي حياتك، اذا تبي تنبسط تكلم وانصح وسوا الي تبي وهي معك، وصدقني رااح تتغير.

وأسأل مجرب ، وربي بتتغير، اذا الحديد يتغير مع كثرة الدق، ما تبي حنا البشر نتغير مع الي قاعد يصير بحياتنا، وش المشكله لو تشتري لها كتاب، وش المشكله لو تقولها قولي لي كلام حلوو ، وش المشكله لو تقول لها البسي لي وتزيني لي ، وش المشكله لو تقول لها داعبيني، وش المشكله لو تعلمها اشياء وتتناقش معها في اشياء انت ممكن تتكلم فيها مع نفسك، ولكن الان تقولها مع زوجتك.

اهم شي لا تنسى انك تتوكل على الله سبحانه وتعالى قبل اي شي، واذا بتقولي نصحت وتكلمت ولا فاد اقولك حاول مره اخرى واخرى ولا تتعب.

صدقني ، ترى وربي اغلبنا مر با اللي انت مريت فيه ، ولكتن كلنا متوكلين على الله ونعرف ان هذي حياتنا اذا ما حاولنا اننا نصلحها بنعيش طول عمرنا كذا.

مهماً يصير الي يصير، يبقون امهاتنا واخواتنا وزوجاتنا وبناتنا اغلى مانملك في الوجود، ونحبهم كلهم.

الله يوفقنا ويوفقك.