اقتباس:
|
- التجربه كاملا و كم من الوقت احتجتي الى ان ولدتي
|
ولادتي الأولى و التانية بشبهوا بعض
بالولادتين كان عندي طلق و مخاض طويل بقي فترة طويلة و ما فتح الرحم بشكل كافي و انتهت الأمور بعملية قيصرية
ولادتي الأولى كتبتها بالتفاصيل بأحد المواضيع للأخت hosam78
لذلك رح احكي فقط عن ولادتي التانية :
كانت عم تجيني تقلصات خفيفة جداً من الساعة 6 الصبح يوم السبت كل ربع ساعة تقلص
الساعة 9 و نص راح كل شي و ما عدت حسيت بشي
رجعت التقلصات أقوى شوي الساعة 2 الضهر و بقيت التقلصات غير منتظمة حتى الساعة 8 مساء
كنت طوال النهار أهتم اني آخذ كل شي محرض للطلق
انا حسيت انه يمكن اولد لأني التقلصات صارت أقوى و ما عم بتروح بشكل نهائي
(علماً انه كانت تجيني تقلصات غير منتظمة بعد الاسبوع ال38 كل كم يوم)
المهم رحت عند صديقتي أخدتلا ابني و رحنا عالمشفى اتطمن عالبيبي كوني عندي قيصرية سابقة خفت شوي
قلتلا لصديقتي راجعة بعد ساعة
لكن في المشفى قالولي انه لازم ابقى عندهم كوني وضعي خاص بسبب القيصرية
و وصلوني بالاجهزة كالعادة (جهاز يشوف دقات قلب الجنين و التاني يشوف التقلصات)
قالتلي القابلة تقلصاتك قوية ماشي حالا و عم بتجي كل 6 دقائق و كان الرحم فاتح 1.5 سم
لازم تبقي لكن خلي زوجك يروح للبيت اذا صار شي نحن منخبره
رجع زوجي و انا بقيت بجناح الأمومة (متل ما بسموه) و صارت تقوى التقلصات الساعة 2 بالليل صارت غير محتملة و صرت اطلب مسكن ألم
شيكت القابلة الساعة 3 كان فتح 3 سم خبروا زوجي يجي للمشفى و نقلوني لقسم الولادة
بقيت التقلصات موجودة و قوية لكن صارت تتباعد حتى صار بينها 10 دقائق
و كانت الساعة 2 الضهر تاني يوم الأحد و طلبت مني القابلة اترك الغرفة و اطلع امشى بالمشفى واطلع و انزل الدرج
مشيت لمدة ساعة تقريباً و رجعت للغرفة
و بعدها شيكت القابلة و كان الرحم فتح 4 سم (فقط)
قررت الطبيبة انه لازمني يثقبولي الغشاء و ينزلوا ماء الجنين
بعد ما راحت المي صارت التقلصات أقوى بكتيييييير لدرجة لا تطاق
صرت اطلب أي شي يخفف الألم ..خيروني بين التخدير القطني و الدايمورفين ( حقن )
اخترت ابرة المورفين و بعدها اجتني حكة شديدة لكن كنت مرتاحة شوي لأني صرت نام بين التقلصات
كنت كتير تعبانة لا نوم و لا أكل
و لما صارت الساعة 7 صار وقت تشوف القابلة كم فتح الرحم و انا كان نفذ صبري قلت لزوجي اذا ما فتح الرحم 8 سم بدي اولد قيصرية و صرت صرخ رحموووووووووووني رحموني
كانت القابلة متأملة انه الرحم يكون فتح 8 سم لأن التقلصات كانت قوية جداً و منتظمة و لكن المفاجأة كانت انه الرحم كان فتح 5 سم فقط
يعني خلال 6 ساعات ما فتح إلا 1سم
و عرفت انا و زوجي انه رح تتكرر نفس مأساة ولادتي الأولى (30 ساعة طلق قوي انتهت ب 7سم فقط و انخفض دقات قلب الجنين و انتهت بعملية)
قررنا القيصرية و بدأت الاجراءات من توقيع أوراق لاستدعاء طبيبة التخدير ... الخ
و دخلت العملية الساعة 8:20 دقيقة
و بحمد الله و فضله فرجت أخيراً و أنجبت بنتي الساعة 8:39 مساءاً
صحيح اني إلى الآن أعاني من مضاعفات الولادة و لكن الحمد لله كله محلول
اقتباس:
|
- اي موقف مضحك حصلك او الي كانوا معاكي وقت الولاده
|
مضحك ؟ قولي مبكي 
مممممم
كان مواقف زوجي خلال الطلق يضحكني يطلب مني أثناء الطلقة أن أكبس و ادفع ربما تنزل لين !!!
و لما أخدت حقنة الدايمورفين شعرت اني بدأت خبص بالكلام
احكي مع زوجي كلام غير متناسق أذكر انه طلبت منه يروح عند صديقتي
قلتله روح عند فلانة
و هو سألني ليش
قلتله لازم تروح عند فلانة
بعدين انا صرت اسأل حالي ليش فعلاً ليش
آخر شي استوعبت انه انا متأثرة بالمخدر و عم بحكي شروي غروي متل ما بقولوا 
اقتباس:
|
- ماهو الشي الذي ندمتي انك لم تفعليه/ فعلتيه
|
ندمت بولادتي التانية اني ما أصريت على رأيي
بعد ولادتي الأولى كنت مقررة اني ما اطلق أبداً بعدها و اني اولد قيصرية من أولها
لكن باقناع زوجي و كلام الاطباء انه عندي فرصة 80% ولادة طبيعية و بعض الردود في المنتدى اقتنعت اني جرب الطبيعي
اقتباس:
|
- اذا كان بأستطاعتك اعادة التجربه ماذا كنت ستغيرين
|
كنت يوم موعدي 7-7 رحت للمشفى و عملت عملية و ولدت و خلصت
اقتباس:
|
- اعطي المقبلات على الولاده نصيحه مفيده
|
أكثروا من محرضات الولادة في الشهر التاسع
(العسل التمر الرطب الجماع القرفة المشي)
لاحظت بولادتي الأولى انه كان الطلق مؤلم أكتر بكتيييير لأنه الماء نزل من أول طلقة
بينما بولادتي التانية اهتميت أكتر بأخذ محرضات الولادة فاجت التقلصات قبل و فتح الرحم 3 سم بطلقات قوية لكن محمولة جداً بسبب انه الماء ما كان نزل
فالأفضل ان يأتي الطلق و يفتح الرحم شوي قبل نزول ماء الجنين
(من تجربتي ولا أعرف ان كان طبياً أفضل أم لا )
اقتباس:
|
- الدعاء ان يثبت الله على كل امرأه حملها, و ان ييسر ولادة كل امرأه, و ان يرزق الله كل من يحب الأطفال عاجلا غير اجلا
|
اللهم ثبت حمل كل مسلمة و يسر ولادتها و ارزق كل محروم الذرية الصالحة آمين
آخر شي شكرا كتير للأخت Love Of Life
عندما اقتربت ولادتي كنت كتير بحاجة لقراءة تجارب الأخوات مع الولادة
و هذا الموضوع أعتبره مفيد جداً لكل حامل
التعديل الأخير تم بواسطة ماريا ; 27-07-2009 الساعة 02:58 PM