السلام عليكم ورحمة الله وبركاته
كيفكم واخباركم
معكم محدثتكم الجنه غايتي من جده
معاناه لفينا اغلب الاسواق ان ماكان كلها
اخويا طفش مننا ومسكينه ماما تعبت
بس انا اللي ماشاء الله جالسه ابرم وابرم
عندنا تخفيضات لكن مو ذاك الزود
يعني لملابس عاديه وجامعه
عاد احنا برمضان الله يبلغنا ماتجي الملابس حلوه لان السوق ينقلب كله شتوي
عاد انتو عارفين احنا الشتاء عندنا نسمة هوا من عندكم
فمن دحين نزلت اقضي للعيد
وشوفوا اش لقيت
اول محل دخلته صديقي العزيز نيولوك
اخدت منه تقريبا 4قطع
بدي اسود ناعم جدا وراقي ولوتعرفوا بكم بس ب15رياااال ووواااااااو صح
واخدت بدي فضي توب ينفع لحفلات وكدا وب40 ببببببببببس
واخدت بلوزه تايقر اسود ورمادي مره كشخه وتجنن وكانت فوق الميه وحصل عليها تخفيض نهائي وصارت ب30
واخدت كمان جزمه الله يكرمكم يمكن ب60
يعني اسعارهم جدا حلوه
على فكره اللي يلبس بناطيل حيلقى كتير احنا البناطيل ممنوعه اذا ماكانت البلايز طويل
عارفين طويله لوين للركبه
يعني انا من جد اعاني السوق دي الايام نازل بالبلايز الطويله اللي نص الفخد لكن انا مالبسها
وغير كدا ذوقي جدا صعب ومن كل مكان اجمع ماحب اشتري طقوم
والقى احد لابس مثلي
اتكلمت كتير صح
روحت محل كوتون
عندو اشياء رائعه للجامعه
قمصان استخدام اخدت واحد اسود ب50 ريال
ووالتاني ابيض ب29 ريال فققققققط
اخدت من عندهم تنوره سودا للركبه جدا شييييييك وتصلح للعيد ان شاءالله وبس ب80ريال
واخدت للتنوره بلوزه رصاصي وفيها نقوشات من الجنب وطلعت جدا جدا كشخه يمكن البلوزه ب50
امممم
وين كمان ياجنه
صح اخدت من نيكست بلوزه راااائعه ومره فخمه وبنوتيه
كلها الوان مدمجه ببعض وسعرها رائع ب60 ريال بس
طبعا انا دورت كل مكان وماخدت الادي الاشياء يعتبر قليل جدا
اما تخفيضات المكياج والعطور ماقد لاحظت الفرق ولاعمري انتبهت
اشتريها عادي
وبس
اتمنى مااكون قرقرت كتير وطفشتكم
التعديل الأخير تم بواسطة نظرة أمل ; 02-08-2009 الساعة 04:02 AM
السبب: تعديل لفظ المشيئه..