فعلا ربنا معاكى .
لكن فيه حاجة عاوزة أقولهالك من واقع تجربة شفتها أدامى . فيه حاجة إحنا بنهتم بيها أوى فى مصر وهى التكافؤ التعليمى ولو مفيش تكافؤ تعليمى بيكون تكافؤ ثقافى .
إتقدم لواحدة صاحبتى شاب كان بيعمل أعمال حرة وهو ما شاء الله ميسور الحال جدا لكن مستواه التعليمى ( إعدادي) - أعتقد اللى بيتقولوا عليها متوسط - وصاحبتى دى خريجة جامعة وبتشتغل فى وظيفة محترمة جدا أى حد يتمناها وكمان جميلة ومؤدبة وبتتعامل مع الناس برقى و بكل ذوق و أدب . شافها الشاب ده ومن مرة واحدة قال أنا مش عاوز غير دى وعمل المستحيل علشان ياخدها و إصرار مالوش حد علشان أهلها وهى يوافقوا عليه وقال اللى إنتوا عايزينه أنا تحت أمركم . ووافقوا لأنهم قالوا دا واضح إنه شاريكى . بس وافقوا و إتخطبت له . ظهر على حقيقته . قالها مفيش شغل من دلوقتى وتقعدى فى البيت . شغل إيه أنا أديكى أربع أضعاف مرتبك و إنتى فى البيت وبعد ما كانوا متفقين على شبكة بتمن معين نزل السعر النصف وكمان جابلها شقة فى منطقة شعبية والبنت محترمة أوى ومش بتاعة مشاكل و أهلها طلبوا أنهم يتفاهموا معاه رفض وقال مفيش غير كده هى مش أحسن من أمى و إخواتى .
طبعا صاحبتى و أهلها رفضوا الكلام ده وفسخوا الخطوبة . وهو راح خطب بعد كده واحدة من نفس مستواه التعليمى وقاعدة فى البيت وجابلها منزل كبير فى منطقة راقية ( عرفوا يتفاهموا مع بعض ) ومن ساعتها صاحبتى دى بتنصح أى واحدة إنها تبص كويس أوى للتكافؤ التعليمى لأن مهما ظهر إن البنى آدم دا كويس لكن الإحساس بالنقص أمام الزوجة (حتى لو فى التعليم) بيخليه دايما يحاول إنه يقلل من شأنها علشان مايكونش فيه حد أحسن من حد.
هى دلوقتى بتحكى وبتقول مش عارفة لو كنت إتجوزته كان خلانى كل يوم أروح أمسح البيت لأمه ؟
نصيحة أخيرة حاولى إنك تاخدى الكفء ليكى وبلاش تسرع و إنتى سنك صغيرة جدا . 24 سنة ؟ أنا لما كنت فى سنك ماكانش فيه حاجة فى حياتى غير الشغل و السفر ( دلوقتى زادوا واحدة - النت -) وياريت تاخدى واحد له نفس ظروفك كمان لأن اللى فعلا هيحس بيكى واحد عاش نفس تجاربك وواجه الظروف اللى إنتى واجهتيها .
وبلاش تسرع وصلى إستخارة كتير.
( العاقل من اتعظ من تجارب غيره)
وفقك الله لما فيه الخير بإ‘ذنه تعالى.