و الله الموضوع روعه و رجعني لطفولتي
و من كثر ضحكي كل دقيقه و الثانيه جا زوجي وقالي اعوذ بالله ايش فيكي اليوم 
من معتقداتي:
ان امي كانت تحكي لنا قصص قبل النوم و كل هذه القصص كانت عن الأنبياء
و في ليله كانت تحكيلي عن قصة نبي يوسف و قالت انه احلى رجال في العالم, و ابوي اسمه كمان يوسف, فقلتلها اي اعرفه هذا ابوي صح,, فضحكت امي و قالت لا مو ابوكي و نبي يوسف احلى بكثير من ابوكي. فزعلت مرررره و قلت مافي احد احلى من ابوي,,, وضل هذا الأعتقاد في مخي الين كبرت 
كنت مره متعلقه بأبوي
و مسألة التلفزيون كنت اعتقد ان كل واحد يشوف شي مختلف عن الثاني بعيونه,, فلما نتفرج كرتون اسأل اخواني ايش شايفين و ايش لونه و كيف شكله عشان اتأكد اذا نتفرج نفس الشي ولا هم قاعدين يتفرجوا شي احسن 
و مره اذكر متصورين في صوره كلنا و كانت اختي الصغيره ما نولدت وقتها.. و كنا نقلها انتي مو أختنا و امي جابتك من الشارع و هذا الدليل شوفي.... و الله الحين ضميري يأنبني لما اتذكر.. وهي تقول عقدتوني و انا صغيره اكرهكم 
بس تستاهل لأنها كانت مره مشاغبه و دلعوه و دائما تكسر الباربي حقي
لما امي كانت تقولنا خافوا من ربكم الله في كل مكان و يشوفكم, كنت اعتقد ان الله فوق السطح و مسوي ثقب على كل غرفه عشان يشوفنا, و اذا رحنا بيت ثاني يطير مثل سبيدرمان.. و فعلا آمنت بهذا المعتقد لين بدأت بالمدرسه << استغفر الله و اتوب اليه
و ان شاء الله اذا تذكرت شي رجعتلكم