أختي الجازي:
أولا: مرحبا بك في المنتدى..
أنا أمر آلحين بنفس إللي مريتي فيه وأكثر..اخوات زوجي المتزوجات بالمرة يحبوني ويعزوني،لكن إللي جالسين في البيت مطفشيني لأقصى درجة،حتى لما يقولي أخوهم كلمة حلوة أو يشوفوني لابسة حاجة جديدة يزعلون ويسببون مشاكل مالها أول من آخر،لدرجة ان أخت زوجي سرقت مني أرقام بطاقة تلفون جايبها لي زوجي من العمل عشان أكلم فيها أهلي في مناطق ثانية،ووزعت الرقم على صاحباتها وما كشفناها إلا بعد شهرين لما جت الفاتورة بقيمة عشرين ألف ريال ..المصيبة أنها حالفة انها ماكلمت فيها ولما كشفناها صرفت نفسها وقالت أنا إللي أعطيتها وقلت مجانية..وأجهضت ثلاث مرات ما كلموني وتحمدوا على سلامتي..وآخر مرة أجهضت جو بيتي على أساس يساعدوني في استقبال الضيوف،وللأسف:حوسوا البيت علي وراحوا،ولما شاف أخوهم الفوضى بعدهم هزأهم..عارفة ايش قالوا:راحوا عند الناس وقالو أنا خليت أخوهم يكرههم..
آآآسفة عشاني طولت عليكي،بس حبيت أعطيكي فكرة عن جزأ لا يتجزأ من الوضع إللي أنا عايشة عليه عشان تهون عليكي مصيبتك..أنا لي سنتين متزوجة وأنا سعيدة لأني خرجت الجهله من حياتي..
اتبعي أسلوبي:كسبت زوجي وكسبت أخوات زوجي المتزوجات بطيبتي وعن طريقهم كسبت أم زوجي ..أما الباقي طنشتهم وقلت غيرانات وسفيهات عقل وما يبغون يكبرون عقولهم لدرجة ان أخوهم لما شاف أمه تحبني صاير هو إللي يدافع عني وياخذ حقي من أخواته..
لايهمك ياأختي إللا زوجك ماحينفعك أحد غيره وأخته مصيرها تتزوج وترتاحين منها ..ولا تنسين تنزلين عند أم زوجك بين كل فترة وانتي شايلة معكي قهوة وصينية حلى وتسولفين معها وتنسينها بالتدريج إللي صار..وكم هدية حلوة لأخته..واحتسبي الأجر في كل حاجة تصلحينها.. والله يوفقك ويسخرلك زوجك وأهله..ولا تبينين زعلك لهم حتى لو سمعتي كلمة تجرحك تجاهلي الموضوع كأنك ماسمعتي حاجة ..هذي نصيحة من مجرب..