اولا - السلام عليكم جميعا اخواتي واخواني في المنتدى الرائع
وربي حبيت هالمنتدى واستفدت كثيير منكم شكرا جزيلا ^^
انا فكرت بالتسجيل لكن اللي خلاني اصر عليه هو حل مشكله اخونا فارس !
ويعلم الله يافارس اني ماسجلت الا عشان ارد عليك ولعل وعسى انه يفيدك ردي بشي لاني متابعه قصتك من البدايه وكل الموضوعين قريتهم وعرفت قصتك ووش اللي صاير ...
اخوي فارس ..
مشكلتك مايحتاج لها تصعيب اكثر من كذا انت كبرتها بزياده لو كنت مصغرها كان قدرت تحلها من زمان
لكن الي احب اقوله انك لازم لازم لازم ترجع زوجتك مافيه شي اسمه تطنيش لااا انتبه يافارس انت تقول انك رحت لهم كذا مرة اوكي اذا كنت تحبها ضحي علشانها وانا متأكده انك تحبها ولو ماتحبها كان ماحطيت موضوع اصلا ولافكرت فيها بس لانك تحبها ولاتقدر تستغني عنها وانت كمان خايف من شي اسمه تطليق وتقول ماني مطلق وتقول ماراح اروح لهم انا عندي كرامه ! طيب يافارس انت حطيت لنا مشكله وتبي الحل اصلا كيف تبي الحل وانت مارحت تشوف وش السالفه , عطيناك الحلول لكن ماستفدت وترجع تقول عطوني حل خلااص ياخوي الحل انك تروح انت بنفسك لعمك وتشكي له الحال وتقول ابي اقابل زوجتي ونتفاهم مع بعض وتتفاهمون بوجود ابوها وتتفاهمون صح وباسلوب وتشوف من اللي على بينة لكن مشكله زي كذا تتوصل للطلاق لاا حرام عليك هي بنت وعلى حسب كلامك انها ماشيه على راي ابوها وهي الحين تلقاها تتحسر ومتندمه ع اللي صاير ومابيدها حيله لان اصلا ماامعها جوال انت الله يهديك لو مطلع لها جوال كان الحين حليت مشكلتك تدق عليها وتتفاهمون وحتى لو قال لها ابوها لاتردين على مكالمات زوجك يمكن تسويها اول يومين لكن بعدين بيحن قلبها عليك وبترد ولو برساله لانك مهما كان زوجها ومافيه اي بنت تتمنى الطلاق وهي لسى عروس ومابينهم مشاكل معقده اما مسأله انك تدق على جوال امها والا على ابوها احسها بعيده عنها ..
فيعني يافارس تعوذ من الشيطان لانه مسيطر على افكارك وتقول كرامه والا شياء هذي والمشكله انك الحين متعذب وتبيها لكن كرامتك بتخليك تتندم بعدين ماراح تنفعك اصلا بهالدنيا مافيه شي اسمه كرامه مع احترامي الكرامه ان الواحد مايتنازل عن حقه زوجتك حق من حقوقك وانت بهالسهوله بتتنازل عنها وبتخلي الشيطان يلعب عليك اكثر واكثر حرام عليك ياخوي انتم لكم 7 شهور متزوجين يعني هالعيد بيكون اول عيد مع بعض يعني لاتخرب على عمرك اجمل شهور وايام زواجك عشان مشكله تافهه مثل هذي روح راضها ورجعها وتعيدو مع بعض وعيشو حياتكم وانسو الهم لان الدنيا قصيرة وفانيه استمتع بشبابك بكرة صدقني اذا كبرت انتي وياها بتتذكرون الاشياء هذي وبتقدون على انفسكم بتقولون كيف كنا نسوي صدق بزران !
يعني انا من رايي واتمنى من كل قلبي انك تسويه انك ترجعها حالاً الموضوع مايبي اكثر من كذا تأجيل اليوم يافارس لازم تحل مشكلتك خلااص عاد مابقى ع العيد شيء واحنا بالعشر وربي ان شاءالله يسعدكم ويوفقكم وبكذا تقهر الشيطان بما اننا بالعشر لانه الحين مبسووط ع الشيء هذا .
طيب يافارس انا بسألك .؟ انت الحين وانت تقول كرامتي بالله مقتنع في نفسك بهالشي بصرااحه وبااماانه والا مجرد حكي وانتهينا ؟؟!
انت لما ترجعها بيكون درس لك ولها وانت بتربيها على كيفك وعلى مزاجك وهي اصلا ماراح تسوي هالشي مرة ثانيه ولو سوته خلااص اللي عافك عوفه لانك انت الحين ماتدري عن شخصيه زوجتك ولاتدري وش اللي بقلبها لسى متزوجين ماتعرفون بعض زيييين وبكرة ان شاءالله اذا جاكم بيبي بتركد الامور وبتصير على احسن حال بإذن الله بس المهم الحين انك ترجع زوجتك بنفسك لاترسل احد ولاشي جرب هالمرة روح انت لو من غير موعد ولو بموعد بيكون افضل عشان يتجهزون لك .. ادخل وتفاهم معهم وشوف وش اللي صاير بالضبط وتوكل على الله وخذ زوجتك ومن يومها خلااص انت أدبها ومشها على كيفك بس مو معناتها يكون عقاب لها لا بس انت تقدر تكون زوجها وابوها بنفس الوقت مش كلمتك عليها وحط لك قوانين وشروط تمشي عليها اذا كنت ترضى بالشي هذا .
اما مسأله انك تتركها للوقت لاااااااااااااااااااااااا اصلا ليه تتركها للوقت وانت مو فاهم وش اللي صاير من اليوم يافارس روح لها وتوكل على الله وربي بينصرك على ابوها اذا كنت مخلص النية .
واقترح انك تجيب لها جوال ماعقب هذا شي لازم تطلع لها جوال تكون بينك وبينها خصوصيات ويكون الجوال هديه رجعتها للبيت ..
ارجو اني ماثقلت عليك مع اني اكيد اني ثقلت لكن وش اسوي ابي احل مشكلتك باي طريقه حرام يافارس هذا زواج مو لعبه و لاقصه قبايل والا قصه مضاربه وطقاق لاا انت تحب زوجتك رجعها ولاعليك من اي احد لو كل الناس كانو ضدك سو المستحيل علشانها وعيشو احلى حياة الناس ماراح ينفعونك بكرة اذا طلقت صدقني 
الله يلين قلبك عليها ويلين قلبها وقلب ابوها عليك ياحي ياقيووم .
يارب يارب بهذي الايام الفضيله تعين فارس على بلواه وترجع له زووجته برضىاه وبرضاها ياااارب ياقادر ياكريم..
والمعذره ع الاطاله واتمنى اني افدك ولو بشي قليل وتقبل صادق تحياتي
راح ادعي لك ان شاءالله بصلاتي وكل ماتذكرت بإذن الله ...
التعديل الأخير تم بواسطة سكر زيادهـ ! ; 11-09-2009 الساعة 10:24 AM