الله يهديها ويسخرها لك
انا ماقريت لك مواضيع ولا ردود قبل هذا الرد ..
السبب في مشاكل هو انت مو هي .. ولاتزعل من كلامي بس انت معطيها وجه بقوه
اجل تلف السوق معها باليومين والثلاثه وبالساعات وتعصب عليك وترفع صوتها وتنكد عليك وتوديها بعد كل هالتصرفات للمشغل !!!!
لازم اذا غلطت عليك تعاقبها .. هي تمردت عليك لانك معطيها وجه بزياده ..
لو انك كنت تعاملها بالطيب دامها محترمتك وتحرمها من اي شي تسويه لها وهي مو محترمتك كان شفت تعامل غير تعاملها
اتوقع اغلب الي قروا قصتك بيعتبرونك ضعيف وماعندك شخصيه .. لكن انا اعتبرها طيبه زياده عن اللزوم وطولت بال ماشاء الله
ابوي مثلك واخوي بعد كذا .. ادري تتعاملون كذا لانكم تظنون لما تعاملها بالحسناء بتقدر هالشي وتعاملك باحسن
الحمدلله ابوي رزقه بزوجه حكيمه وعاقله ومع هذا عانى معها بالبدايه لانه جت فترات استغلت هالطيبه لصالحها ع حسابه
بس قدر يعدل الوضع .. المشكله اخوي للحين ماقدر لان زوجته متمرده بزياده .. وهو حالته متوسطه فيتسلف عشان يرضيها وهي مو مقدره هالشي وانا انصح الحريم انها تحكم عقلها وتدري ان كل معاملها زينه بيكون مردودها السعاده والرضا والمعامله السيئه مردودها التعاسه والندم يمكن بالبدايه تلاقي الرضا والي تبيه بس اخرتها بتندم ولكل شي حدود
انت غير اسلوبك معها وكل شي له حدود .. ولازم تعودها انك تبي منها زي ماهي تبي منك .. وانك تقدم شي كثير وتنتظر منها بعد هي تقدم
لاتستعجل وتقرر قرار تندم عليه .. انت انتظر واكيد انها بتندم لانها بتفقد اشياء كثير لما تحرمها وبتعرف قيمه الدلع الي كنت مدلها .. بس خلك حازم وجاد في التغيير بس لازم تتعود انك تغير معاملتك
وتأكد انه في ناس اتعس منك .. انا محرومه من بناتي تعودت كل صبح عيد اقومهم وافطرهم واسبحهم والبسهم وامشطهم وابخرهم واعطيهم العيديه وهدايا العيد الي اكون مغلفتها قبل العيد باسبوع وعيني ماتفارقهم فرحانه بفرحتهم ..
الحين هم بعيدين عني بيني وبينهم الف كيلو ماادري هم مبسوطين والا لا مرتاحين والا لا من لبسهم من سبحهم من من من ماعندي الا بنتي الصغيره جالسه بجنبي طفشانه تبي خواتها وماحست بفرحة العيد لانها لحاله
حرمني منهم الله يحرم عليه الجنه .. وصدقني مريت بتجربتك انا الي اقدم ولا لقيت الا النكران .. وتركت بيت النكد لكنه خذا بناتي عناد لي بس .. وصدقني نكد الدنيا اهون من فراق بناتي لحظه .. بس صبرا جميل والله المستعان
والله يعينك ويعين كل مسلم وكل عام وانت بخير .
دمت بود