أول شي .. ليش تحصرين أسباب التنطيش بالتكبر وبس !!

التطنيش - إن صح التعبير - يمكن يكون بسبب تكبر وهذا نادر في مثل حالتك .. وممكن يكون بسبب قلة خبرته في النساء ويمكن يكون بسبب إنه يخاف إنكم ما تعدوتوا على هالطريقة هذي من العلاقة في الملكة .. ويمكن ويمكن ويمكن .. أسباب كثيرة لو فكرنا فيها

الواحد يعذر صديقه .. فما بالك بالخطيب

أنا أعرف واحد شخصيا .. والله كنت أهاوشه عشان يكلم خطيبته وكنت أقول له إن البنت تنتظرك تكلمها أكيد .. وكل البنات يكلمون رجالهم وقت الملكة بس يقول مستحي منها مرررة .. .. وأهلها ما تعودوا على المكالمات .. قسم بالله ما كلمها إلا قبل الزواج بأسبوع بس .. وكل فترة الملكة ما كانها زوجته .. مع إنه إنسان جريء جدا ولا يهمه أحد لكن مع خطيبته تغير وحس بشعور ثاني وانقلبت شخصيته .. طبعا الآن يقول يا ليتني كنت أكلمها وأزورها لأن فوت على نفسه متعة خاصة .. لكن الحمد لله أمورهم طيبة

أول شي وسعي صدرك عالآخر .. أرسلي لي له رسالة إنك مشتاقه تسمعين صوته واشرحي له إنه لازم تتعرفون على بعض .. وبعد ما تسترسلون بالمكالمات وترتاحون أكثر اعزميه في البيت .. ممكن هو يكون مستحي يطلب مثل هالطلبات لأنكم مب متعودين عليها .. لكن أنا متأكد إنه يتمنى لو تحصل له فرصة .. ربما تكون عاداتكم الاجتماعية في هالموضوع سببت له يأس تام من إنه يشوفك ولذلك ما فكر ولا تفكير إنه يحاول .. وهذا يحصل كثير ..

وإياك والتنطيش .. ترا كل شي يهون عند مثل هالتصرفات اللي تحط من قدر الرجل خصوصا في الأيام الأولى .. ما فكرتي إنه هو ممكن يحس بنفس الشعور اللي تحسين فيه وقاعد يقول وش فيها هالمغرورة وضايق صدره ويحس إن علاقتكم ما راح تتم !! .. ما فكرتي إنه هو مقهور إن أبوك ما قال له ودي تجلس مع زوجتك بعد الملكة .. !!

فكري بالموضوع من كل النواحي .. ووسعي صدرك مرة ..

آخيرا .. أنصحك وبشدة إنك تقرئين كتاب الرجال من المريخ والنساء من الزهرة .. واضح جدا جدا إنك ما تعرفين عن الرجال وعن طريقة التعامل معهم أي شي نهائيا .. والكتاب هذي ممتاز جدا لفهم نفسية الطرف الآخر .. بتعدين لي إذا قريتيه .. وأهدي نسخة منه لخطيبك لأنه يحتاج يفهم النساء زين

بارك الله لكما وبارك عليكما وجمع بينكما في خير