أخوي اسمح لي .. ومثل ما قلت لك من البداية انت وزوجتك تتشابهون كثير
وبصراحة قليل أشوف اثنين متزوجين يتشابهون كثركم ..
إذا تبي تحل مشكلتك مع زوجتك لازم توقف وقفه جدية مع نفسك
زوجتك مراح تتغير إلا لما أنت تتغير لأنها تتخذك قدوة لها
مو معقوله تسبها وتلعب فيها لعب وتبيها تسكت ويمكن تضربها بعد
مو معقوله تروح عند أمك ولا تجي من عندها إلا أنت مولع ولا تبيها تشك في أمك
شلون تبيها تحس بالأمان معك وهي تحس أن تصرفاتك وأفكارك ما تجي من راسك .. لا .. من أهلك
شلون تبيها تعطيك وتصير حنونه معاك وهي تحس أن حياتها معاك على كف عفريت
صدقني المرأة بحاجة ماسة للأمان النفسي مثل ما الرجل بحاجة لأستقرار النفسي
المرأة بحاجة للرجل القوي الي تحتمي فيه والي تحس انه سد منيع أمام اي شخص يبي يأذيها
لكن انت إذا فاتح الباب لكل من هب ودب يتدخل يقول ويسم بدنها بالكلام والنظرات والتلميحات
شلون تبيها تعطيك شي .. شلون تبيها تحس بالأمان
أجل ليش المرأة تتزوج ... الهدف الأول لأنها تبي رجل يحميها .. وما يحميها إلا القوي
وزوجتك مش حاستك قوي عشان كذا اضطرت تدافع عن نفسها بنفسها وتفرد عظلاتها وتشمر عن مخالبها
كل تصرفاتها وإن كانت تبدو سوء خلق إلا أنها في حقيقتها البعيدة دفاع عن الذات
ولو شايفه من يحسسها بالامان كان استكانت لك
أعطيها الأمان وراح تعطيك الحب
أعطيها أحترام وتعطيك احترام
وأول خطوة في هذا الطريق .. أنك تكون فعلاً انسان مستقل في ذاتك وفي قراراتك
لا تخلي احد يشيشك على زوجتك ... لا تخلي أحد يدخل في حياتك
لما أهلك يسألونك عن أحوالك مع زوجتك .. قل : الحمد لله بخير وبس ولا تزيد عن هالكلمتين.. مهما كان الي بينكم ..
ولا تحكي لهم عن اي شي
و بكذا تسد الطريق أمام كل من يبي يتدخل بينكم
لما أمك توغر صدرك على زوجتك أكتف بالاستماع لها لكن لما ترجع للبيت ولا كأنك سمعت شيء
وبكذا لما تعمل حاجز بين كلام أمك وبين تأثير كلامها على حياتكم مراح تحس زوجتك أن أمك تحرضك
ولا راح تعتبرها شيطان ..
حاول تقول لزوجتك أن أمك تذكرها بالخير وانها تحبها وقول حق أمك نفس الكلام
ثنتينهم نساء ويجون بالكلمة الحلوة
ـــ
موضوع انها دكتاتورية .. يعني شخصيتها تسلطية
وبعدين أنا ما أدري ايش قصدك ما تعترف بقوامة الرجل ...
بس حابة أقولك شي المرأة إذا حبت الرجل ووثقت فيه مستحيل تكابر بالعكس تصير طوع أمره
لأنها ما تبغي تفقدك .. بتصير بالنسبة لها شي ثمين
أنا ما ادري ايش تفاصيل حياتكم .. بس انت أكيد ملاحظ أنها تسوي مثلك
في اي شي جرب اللين قبل القسوة وراح تشوف اللين
جرب تنطق الكلمة الحلوة قبل السيئة .. وبتشوف النتيجة
جرب تبتسم لها وراح تقابلك بابتسامه
مع الايام ومع احساسهابالاستقرار والأمان معك راح تتعدل سلوكها وأخلاقها
ولا تعتقد أن الاحساس بالامان شي هامشي .. بالعكس عدم الشعور بالأمان يخلي الانسان ما يقدر يسيطر على نفسه
ولا على تصرفاته
وصدقني بتلاحظ شلون حتى كتاباتها تلين ويخف التشكي فيها
أتمنى لك التوفيق
__________________
..كالاطفال نحلم إننا ننام على سحاابة بيضاء يعطرناا المطر ..