والله ما ادري اختي الكريمه باقي الاعضاء يفيدونك

انا اللي فهمته من بعض الشباب

لازم تعود زوجتك على كلمة لا مو كل شئ تطلبه او تقول ابيه تقولها نعم او حاضر

لكن جربي تناقشي اذا جلستوا وضحكتوا وشفتيه رايق

كلميه قولي له بكلمك بموضوع لا

اذا قالك وشو موضوع لا قولي له اللي بخاطرك بس بدون انفعال

مثلا لا تقولين اذا بروح لاهلي تقول لا واذا بروح السوق مع امي لا وش هالعيشه

هنا كلنا نقول لك لا مو بهالاسلوب

اجلسي معاه قولي له انت تحبني وانا اموت فيك ومن هالكلام اللي يخدر الاعصاب

وقولي له نفسي اروح مع امي للسوق من فتره ما تسوقت معاها اشياء كثير خاطرها تسألني عنها حلوه مو حلوة بالسوق

اغلب طلباتي ترفضها ممكن اعرف وش مضايقك ؟

ممكن الرجال ما يحب المشاوير بيت اهلك بجهه وبيتكم بجهه ويبيله وقت على ما يوصلك ويرجع

ممكن يحبك ويبيك معاه كل الوقت

الافضل تكلمينه وتتناقشين معاه

لانه بعد 5 سنوات زواج بيصير صعب عليك تتناقشين معاه بأمور مهمه ممكن يقول لا وفقط وانتي محتاجه لهالشئ بس يقول لا

وبالطبع بتسكتين كالعاده حتى لو شئ في مصلحتكم لانك سنين تعودتي وعودك على لا بدون نقاش

لا بزعل بعد يوم ترضين

انا ما احرضك انه اذا قال لا خلاص قومي الدنيا عليه

اذا قال لا ناقشيه مافيها شئ

بكره يجيكم اطفال يحط الولد بمدرسه مو زينه ودرجاته زفت وبيرسب

تقولين له انقله مدرسه افضل يقول لا وانتي ما تناقشين لانه تعودتي على لا ونقطة انتهت المسأله

ناقشيه يابو فلان كلمتك على عيني وراسي وكلمتك مثل السيف برقبتي انفذها ولا اعصيك بس ليه ما تنقله من هالمدرسه

فيه اولاد يدخنون يقول انه شافهم بالحمامات

فيه اولاد يسوون حركات وسخه وولدك بيتعلم منهم

فيه اولاد يسوون كذا وكذا

بيرد كل المدارس فيها كذا وين احطه مع اولاد ملائكة ما يخطئون

ردي لا ما قلنا كذا بس فيه مدارس فيها رقابه على الاولاد

ومن هذا الكلام

يمكن يقتنع ويقول اوكي او حاضر او ان شاء الله يصير خير

لابد من النقاش بين الزوجين بدون نقاش الحياة الزوجيه ممله

هذي نصيحتي

وانا استغرب من بعض النساء انها تخاف تناقش زوجها ترا ماراح ياكلك لو ناقشتيه

والله بعض الازواج ما يتناقشون الله يهديهم بس حاولي وان شاء الله يتقبل النقاش برحابة صدر

بس الاهم الاسلوب بالنقاش يكون وسيع صدر مو الهدف منه الزعل وتضييق الصدر