رجعت مرة ثانية للموضوع ,,
ليلة زواجي ماعتقد فيها افلام هندية وايد 
بس القهر والصدمة الكبرى يوم وصلت الاستيديو للتصوير لقيت شعري اعتفس 
وصتني الي سرحت شعري ما احط الحجاب على التسريحة لأنها بتطيح ......
لكن مستحيل آخذ بكلامها !! تحجبت عدل مع نظراتها المستاءة 
وغادرت الصالون
وقفنا مذهولين آنا وزوجي من الي صار !! يعني شعري عفسه جداً ويبي له تعديل !!
والمصورة واقفة فوق راسنا تبي تصورنا وتخلص عشان ورانا عرسان ...
بشكل سريع اتصلنا في احدى خبيرات الشعر تجي الاستيديو والحمد لله كانت فاضية وجت تعدل لي شعري ,, مع إن صادفتنا مشكلة ثانية إنها جاية وناسية بعض الاعراض ...
الي راح زوجي ركيض يجيبها من اقرب سوبرماركت مثل مثبت الشعر ومشط صغير و.. !!
آنا غصب عني اصبت بالتوتر وتضايقت مع هالمشكلة والزحمة والوقت ضايقنا والمصورة تحن فوق راسنا يلا بسرعة بسرعة
حسيت نفسي بصيح بس خايفة اصيح ويخترب مكياجي واخسر ال70 دينار الي تمكيجت فيهم
بعد ما تم كل شيء الحمد لله الحمد لله ,, بدأنا تصوير لكن وجهي مو راضي يبتسم ابدا ً 
عجزت المصورة وهي تقول سمايل سمايل وآآنا غصب مو قادرة احس بتعب وتوتر وخلاص ابي اروح سريري ارقد لكن ويني وين !! الحفلة للحين ما بدأت حتى !
حست بذنبها شلون كانت سبب توتري في استعجالها اياي ,, وقامت تضحكني ,, وكأنها تدري إن بطني منطقة ضعفي !! كنت غصب عني اضحك حتى دمعت عيوني
و ساح الكحل !!!!!! وصارت مشكلة ثانية !! ولكن عدت على خير ولكن مو بسهولة !!! 
بعد ما خلصنا من التصوير رحنا الحفلة ,,, وقت الي خلصت الحفلة ,, حملت فستاني الضخم ورحت لغرفة استراحة العروس وبدلت ملابسي!!! لبست بجاما عادية (الي رحت فيها الصالون)
وقعدت على الكرسي ارد نفسي ,,, احس جبل الي شلته من علي مو فستان !!
كان جداَ ثقيل من الشك وكبير وضخم .... !!! وزين مني اتحملته كل هالوقت وخصوصاً وقت التصوير
فمستحيل اصبر اكثر كلها ثواني جو وراي الاهل وهم يغنون علي ويودعوني الا يلاقون العروسة قاعدة ببجامتها الوردية الكل عصب علي واستنكر واستغرب من تصرفي !!!
على قولتهم المفروض لازم اشيل الفستان بالشقة اآنا قلت لهم السبب ماقدر تعبانة وهذا الي كان مبين على وجهي ,,,
بعدين وحدة قالت لي يالهبلة عشان يساعدج ,, الحين فهمت المغزى بس سويت روحي ما اسمعهم
لبست عباتي ولفيت الشيلة وآنا براحتي ولا شيء ولا فستان يعيقني !! ايه نسيت اقولكم إني حتى الصندل شلته كسر لي ظهري ,, ولبست نعال فلات عادي
قبل ما اطلع من صالة الفرح ,, الماما وصتني ما يشوفني زوجي العزيز بهالملابس الي علي 
وآنا سمعت كلامها اول ما وصلت الشقة بدلت ولبست فستان قصير وناعم بدون ما يشوف بجامتي
رحت السيارة , وقبل ما نوصل البيت قلت له لو سمحت ابي (استون) لأن ماعندي بالشقة عشان لا اتوهق بالمناكير الي حاطته بأظافري ,
عاد زوجي ماله بسوالف الحريم لا من بعيد ولا من قريب , فتح لي حلجة شنو ! شنو يعني استون !! ومن وين اشتريه
ههه ! ضحكت عليه فهمت الاستون هو الي يمسح صبغ الاظافر وضليت طول الطريج لين ما وصلنا الصيدلية وآنا اكرر الكلمة لين حفظها والآخير دخل الصيدلية ورد رجع لي يسألني عن اسمه ووههههاي !! قلت له خلاص قول remover وفكني
لا تعتبون على زوجي ترى ذاكرته قويه بس تعرفون معرس ,, وشسمه متوتر غصب عنه نسى
بعدها ,, ضلينا فترة طويلة نفك التسريحة ,, مع إن تسريحتي كانت نازلة ومافيها تعقيدات
بس الله يسلمكم زوجي رقيق بالغصب بفتح المشبص من شعري !
كان متملل ما يبي يقضب الليل بطوله يفتح المشابص من شعري !! ويوم حسيته جذي
قلبت ويهي وقلت له يلا مابي تساعدني وآنا مبرطمة 
(من بدايتها زعل) !! ههه لكن هو ضحك معاي وضل يساعدني لين ما شلنا كل المشابص 
بعد ما غسلنا وصرنا خفاف ونظاف وحلوين ,, استرخيناا
الا بسم الله آنا واقفة الا يد فوق راسي خرعني
قاعد يقرا علي مادري شنو خرعني اقوله اشفيك ,, بعدين فهمني السالفة
وصلينا سووواا ...
وبعدهاا
بعدها شنو؟
بس خلاص خلصت القصة
سوري عذبتكم وانتو تقرون هذرت وايد
بس حدهـ كان خاطري اهذر (وماخليت بخاطري)
وشكراً مرة ثانية لصاحب الموضوع
__________________
حموودي وأبو حمودي
الله يخليكم لي
شمعة تنور لي حياتي
ووردة تعطر لي دنيتي
احبكم 3>
التعديل الأخير تم بواسطة ماريا ; 15-10-2009 الساعة 04:22 PM