منتدى عالم الأسرة والمجتمع - عرض مشاركة واحدة

21-10-2009, 07:39 AM

flouna

قلم وفي

تاريخ التسجيل: Jul 2006

المشاركات: 541

بدايه أحب اقولك الموضوع عاجبنى جدا...لانه موجود كتير والناس مع الاسف بتستهين وتقول مش مهم اى يعنى جاهل ولا جاهله المهم العيال تمام والبيت تمام خلاص...

لدرجه ان اغلب الازواج بقوا زى الطريقين اللى عمرهم ما يتقابلوا ابدا ....,للاسف قله قليله من اللى بشوفهم متفاهمين فى النقطه دى

مش عارفه ينفع اقول تجربتى الشخصيه ولا لآ لكن انا بجد مش كأمرأه بقف مع الزوجات ...لآ فعلا انا شفت تجربه الاخ جوجيتا وبجد تعاطفت معاه جدا وحسيت انه يعانى بجد ...لدرجه انه عاوز من زوجته اى شئ -_ المهم يجد شئ

تزوجت عن قصه حب فى الجامعه ....فكان الحب والرومانسيه هى هدفى لانى بطبعى شخصيتى رومانسيه ..يعنى فتره الخطوبه كنا نعد منزل الزوجيه وانشغلنا ببناء حياتنا الجديده
المهم تم الزواج وتزوجنا ولنا الان عامين متزوجين ..........................

لا أخفى عليكم بعد الزواج أتصدمت ....كان رومانسى وطيب وكريم-- انما العقل فى الكره والمباريات فقط.....قلت ماشى يمكن هوايه
بدأت اكتشف طيب فين الثقافه فى أى شئ فى الدنيا لا أختص بشئ انا كنت عاوزه اى شئ وانا على استعداد انا اتناقش فيه

طيب قريت اى كتاب أصلا ..........الجواب : لآ
ولا حتى الروايات بتاعت الشباب الصغير يعنى نجيب محفوظ او يوسف السباعى و تشارلز ديكنز اشياء كنا نقرأها واحنا صغار..........مفيش .......طب حتى مجله ميكى !!!!!!

مفيشششششش

طيب نتكلم فى الدين _ التاريخ السياسه أى شئ......مفيش غير الكره
قلت فى نفسى طب هو ده اللى حبيته ..بدأت بداخلى وكانى أضرب كف بكف واول يا خساره على ايام الخطوبه
بس الحمد لله انه يحبنى جدا وانا اعشقه الحمد لله ......لولا هذا الشئ لكنت جننت

على فكره انا اصلا فتاه عاديه جدا ولا ادعى العلم ولا انا دكتوره جامعه ...يعنى كل اللى اريده انسان ثقافته عاديه لماا اتكلم معاه فى اى شئ اجده فاهمنى ..يحتوينى بعقله مش انا اللى احتويه بعقلى

اللى صدمنى انه اقل من العادى بمراحل _ واحنا الأتنين تعليمنا جامعى لكن انا دراستى كليه الاداب قسم الاجتماع وهو درس التجاره ...يعنى الموضوع ليس له علاقه بمستوى التعليم

كان نفسى اعمل معاه حوار ونتكلم فى اى شئ غير الاكل والبيت والمصاريف فى اى موضوع

بعد فتره حسيت بعيب اخر وانه لا يعرف معنى الزواج ...يحبنى اه ولكن يتخيل نفسه ( سى السيد ) يامر وينهى ويشخط دون ان يعلم ان المراه تعتبر من جنس البشر ايضا ولها حقوق
لدرجه انه كان يأمرنى انى أحضر له طعامه فى السرير وكانى خادمه وكانه هارون الرشيد ..يعنى فكرته عن الزواج أسطوريه جدا جدا بشكل يضحك

لكن قلت ماشى استحمل الى ان اتكلم معه بشكل عاطفى واقنعه ان الزواج مش كده خالص

يعتبر المرأه جاريه _ واقصد كلمه جاريه بكل ما تعنيه الكلمه وطبعا الدين لم يأمر بذلك ...وانا شعرت ان كيانى كأنسانه بدأ ينهار وحسيت ان الزواج فى النهايه مجرد تنضيف وغسيل واولاد فقط

لكن اين العقل ؟؟؟؟ اين عقل الزوجين ؟ والتفاهم اين الحوار بينهم اين مشاركتهم فى قراه كتاب معيين او فكره معينه يناقشوها مع بعض....لم اجد كل هذا

وبصراحه قبل قراه موضوع الاخ الفاضل جوجيتا كنت اتخيل ان اغلب الرجال مثل زوجى ...أستغربت جدا انى اجد رجل يبحث عن الثقافه فى المراه

وطالما قولتوا بدون تحيز ....ومش لانى أمرأه لكن لا تنكروا أن الرجل فى المجتمع الشرقى مدلل او بمعنى أصح الموروثات هى التى تدلله على حساب المراه مش كل الحالات ساعات بتكون المرأه وأسمحولى أقول مفتريه

وبما اننا كجنسين مختلفين اكيد بيننا فروق فرديه طبعا ...ومش كل الرجال كده ومش كل السيدات كده
طيب الاخ ( لا أستحقها ) سالت عن حلول للموضوع وانا عملت شئ بعد زواجى بقتره وهذا الشئ غير مقصود ولكنه كان ضمن مشاجره عاديه
كنت اسأله انى تمللت من الحياه التى اصبحت فارغه بالنسبه لى ولم اجد من يفهمنى ويشعر بى وانا احبك واريد منك ان تتكلم معى وتشعر بى ككيان كلى وليس كأمراه فقط

صارحته بما فى نفسى وانى أريد ان اجد زوجى يفهمنى ويتكلم معى فى كل شئ واى شئ ...صارحته انى كنت احيان كثيره لا اريد الحديث معه لانه لن يعرف كيف يكمل الحديث او احيان كثيره يعمل نفسه لا يسمعنى او يتركنى ويمشى....كنت اشعر انى فى وادى وهو فى وادى اخر

صارحته انى احبه واريده ان يكون احسن انسان فى الدنيا ... حتى امام الناس الاخرين وليس لأجلى فقط وان تفكيره للاسف مفتقد الكتير من معانى الحياه......حتى الدين تفكيره مفقد الكثير ولا يعرف الكثير وطبعا لا اقصد الفرائض العاديه ...لكن المعلومات الدينيه العاديه الاخرى

قلت الكثير من الكلام واعلم انى اثقلت عليه كتير لكن ....الامر فاض بى ... لدرجه انه صار ينظر لى ولم يستطع الرد لفتره طويله وانااقول كلام لا اعرف كيف قلته اقوله وابكى.

بعد عده ايام جاء ليتكلم معى ويحكى لى عن معلومه معينه ....لم ابين له فرحتى الداخليه ...تكلمت معه وكأن هذا طبعه العادى

كنت بداخلى فرحانه جدا ...أحسست انه ابنى وليس زوجى ...اجده يتصفح النت وياتى لى بأخبارواشياء اى اشياء افرح واسعد لأجله حسيت انه أنسان طيب لآن افعاله كان بها الكثير من البرأه ولكنه كان ينقصه التفكير الجيد...أحسست انى بنيت زوجى اللى ابغيه ليس لى فقط ولكن لنفسه ولعمله

ولن اكذب عليكم طبعا الطبع بيغلب لتطبع ...واللى اتربى عليه عمره كله ...لن يغيره فى عامين اواقل
لكن...انا سعيده انى غيرته ولو شئ بسيط وكان لى بصمه فى حياته
وبستحمل بعض فلتاته ....لانه فى الاخر حاول يتغير لآجلى
ساعتها بس حسيت باهميه الحب ....اللى كنت بقول فى اول زواجى طب فين الاشياء الاخرى

الحب هو اللى دفعنى اكلمه بشكل قوى ...وجعله يبدأ يصلح من نفسه للآجل انه يحبنى ...جعلنى احاول معه مرات كثيره لانى احبه وبالغم من كده اريده هو ولو امامى كبير المثقفين سوف اختاره هو

فى رايى ان طالما الحب موجود طالما ان الامل موجود فى اصلاح الطرف الاخر ...لانك ستشعر انك تغير انسان لأجلى شئ اكبر وهو حبك له
فى حين انه فى عدم وجوده ...سوف تمل من ان تغيره او حته تكلمه لانك لاتجبه

طولت عليكم لكن كان يجب ان ارد لانها مشكلتى الشخصيه