الحقيقة أنا أحب أسمي الاشياء بمسمياتها .. وما أحب التحايل على الواقع

خاصة لما يكون واضح وضوح الشمس ...

أنا بقول رأيي في زوجك ..

أنا متابعه موضوعك من البداية .. وزوجك رجل يحتقرك ويحب يذلك وكل اتصالاتك ومحاولاتك

عطته غرور زيادة وشاف نفسه عليكِ وخلاه يتأكد انك وحدة مالك لا حول ولا قوة

وانك بدونه ولا شي .. وانك ضايعه في هالدنيا وانك تدورينه

حتى في أحلامك وهواجسك وهذا الشي فيه نوع من الصحة

لأنك ما تقدرين تستقرين إلا بذكراه حتى لو كذبتي على نفسك وكتبتي موضوع

بصيغة الكره أو انك ما عدتي تتحملين او تنسين اسأته

الواقع غير كذا ..



زوجك بصراحة وشخصياً اشوفه ما يستاهل لأنه فيه صفات سيئة المفروض الرجل الشريف

ما يتصف فيها .. اذا كان ما يقدر يحمي المرأة من لسانه وظلمه .. شلون يحميها من الأخرين

الرجل الي ما يقدر يحكم شهواته ويتكلم على الطالعه والنازلة وينشر كلام عنك .. ايش تسمينه ؟؟

حتى المرأة العاقلة المتزنة ما تعمل هالعمايل .. يجي اهو كامل

العقل والدين يسوي كذا !!!!

احنا قاعدين نتعامل مع رجل مو مع طفل ..

رجل كلمته لها وزن في المجتمع .. الطفل ممكن نعدي كلامه لأن كل الناس بيقولون طفل ما يفهم

لكن الرجال لما يقول زوجتي فيها وفيها .. ايش بيصير .. الناس تصدق

حتى لو خطب بيزوجونه لأنه ملاك وانتي الشيطان الي عادي سمعتك تروح

بس اهو مسكين قلبه محترق وما يبي يسمع خبر زواجك ... ايش الكلام هذا !!

هذا انتي متزوجة كامل العقل والدين !!!

ماله داعي نحاول نطلع له مبررات انه غيران وما يبيك تتزوجين

هذي مو مبررات .. الموضوع مو بينك وبينه ..

السالفه فيها سمعه وناس كلامهم ونظراتهم مثل السم

تصرفات زوجك خالية من الرجولة تماماً

إذا كان الله يغضب من البهتان ويتوعد الذي يفعله بالعقاب الشديد .. احنا نجي نبرر له

(وَتَحْسَبُونَهُ هَيِّناً وَهُوَ عِنْدَ اللَّهِ عَظِيمٌ)

ترى الكلام في الناس مو سهل .. الله يقول عظيم واحنا نبرر

اعتقد انه رجال محاسب على كل نفس يتنفسه مو مرفوع القلم عنه

( رفع القلم عن ثلاثة عن النائم حتى يستيقظ، وعن الصبي حتى يبلغ وعن المجنون حتى يعقل )

ما قال بعد رفع القلم عن المطلق حتى يبرد قلبه والغيران حتى يخف

زوجك حتى ما يستاهل التفكير فيه

احنا نزن الرجل بكلامه وتصرفاته .. فإذ كانت تصرفاته كذا وكلامه ما فيه رجوله

معناته انه رجل بالمسمى ..ماله وزن

__________________