انا ماراح اعلق على سوالف الحريم الي ذكرتيها كلها،ولكن بخاطري شي ودي اقوله لك ولهم اذا بيسمعوني...


لو يصير الي يصير بينكم العيال ، سواءاًَ عيالك ولا عيالهم مالهم ذنب با اللي يصير، لا تربونهم على القطاعه وقطع الارحام والكراهيه والحب، ماعمري كرهت شخص عشان امي تكرهه ، ولاعمري حبيت شخص امي تحبه. انا مالي علاقه بعلاقات امي وحبها وكرهها.

اذكر سوالف الحريم الي كانت تصير مع امي مثل الي تصير معك، وكانوا عيال الحريم الي امي ما تتقبلهم يجوني بمجلسنا ، والله من تدري انهم هنا انها تشيلهم على راسها وتسأل تبون شي ناقصكم شي، لا تأذيهم ، عطهم الي يبون، وانا فعلاً وقتها كنت مستغرب، لدرجه اني سألتها وقلت لها يمه انا الاحظ انك ما تتقبلين فلانه وفلانه،واذا جاوني عيالهم تهتمين فيهم، تقولين انا اهتم في اي ضيف يدخل بيتي،و كانت تقولي حرفياً، انت رجال ، ومالك شغل بسوالف الحريم ، اليوم نزعل وبكره نرضى، بعدين انا عشت حياتي مثل ما ابي حبيت الي ابي وما تقبلت الي ما ابي ، انت عيش حياتك حب ولا ما تحب ، سو الي انت مقتنع فيه.

ادري طولت عليك ، ولكن حبيت اوصل لك ها الفكره انه فعلاً حرام تربون عيالكم على قطع الرحم وكره فلان وعلنتان والسبه انتوا ، والقهر انكم تكبرون وتنسون ، والعيال ما ينسوون.

الله يوفقنا ويوفقكم.

__________________
ديمـا الله يصلحها ويهديها كبرت، وبدت تحبي، وتحاول تمشي بسم الله عليها.
هبلت بي وطلعت الشيب في راسي، الله يعيننا على امانه تربيتها، ويعينها علي. اللهم اصلح لي النيه والذريه.