بالنسبة للموقف اللي صار
ما كان على اختك الله يهديها التدخل حتى لو هي مقتنعة بشيء دام انتي راضية عن بنتك وهو في الأساس الصح
لكن الحلو إن بنتك راح تتعلم وبيصادفونها كثير من هالنوعية ومحد يخلي احد بحالة
صحيح هو مزعج لكن الواحد ايش يسوي إذا إحنا ما سلمنا من التدخل والنصايح اللي تجينا ومو على سنع
فلازم نعلمهم الصح ومعرفته عن الخطأ ولازم يشوفون الخطأ عشان يقدرون يتجنبونه مستقبلا
وكيف ممكن يواجهون مغرياته وكيف يثقون بنفسهم وبقرارتهم وهذا الأصعب كيف الواحد يغرسه فيهم
وكيف يقنعهم أساسا
وبالنسبة للأمر بالمعروف والنهي عن المنكر عني ما أفضل أحد يتدخل في نصح أبنائي الصغار
ممكن يتوجهون لي أولا لو كان في شيء خطأ وأنا أقوم بهذا الدور على أبنائي
لأني ماأدري الشخص هذا كيف بينصح ولا يتكلم ولا ايش هي قناعاته من الأساس
مرات يكونون نفس نصيحة اختك ومرات يكونون متشددين زيادة
يعني مثلا وأنا ما أدري هل اعتقادي هذا صحيح لكن على سبيل المثال وهذا صار لناس
- لنفرض بنتي ما تسمع أغاني بفضل الله واللي في عمرها وحولها يسمعون
وكان في يوم برنامج علمي تلفزيوني وهي تتابع المعلومات اللي فيه تجيها ذيك الوحده اللي تقولها حرام تسمعين أغاني وقصدها المؤثرات الصوتية اللي فيه
واللي ربما أساسا البنت مو حاطة بالها على الازعاج اللي عادة يترافق مع البرامج الجيدة
صحيح الواحد يفضلها بدون هذه الأمور لكن لا أدري -
- ولا تكون صلت وما أتبعت صلاتها بالسنن الرواتب يطيح فيها الشخص الفلاني ويجيها باسلوب منفر -
وربما نصائح الآخرين تتضارب مع أشياء أنا قلتها لطفلي
إلا إن كانت من أناس ثقاة صالحين متزنين
وحبذا الطفل يقدر يعبر يجي يقولك إن فلان قاله كذا
وبكذا تكون عندك الصورة متضحة
أما إذا كان طفلي عدى مرحلة البلوغ بفترة وصار له كيانه الخاص يصير هو عنده القدرة على الأخذ والرد
وتكون بإذن الله القيم منغرسة وعادي يسمع توجيهات من الغير سواء ناصحة أو هادمة
والله يعين لأن قناعات الناس تختلف في كل شيء الأمور الدينية والأمور الحياتية
طبعا في أشياء ثابتة خصوصا في الأمور الدينية لكن كيفية إيمان الشخص بها وفهمه لها تختلف
إن كانت من إنسان ناصح وفعلا طفلي اللي صار شاب ولا بنتي اللي صارت شابه عندهم أخطاء لازم أحد يوجههم
سواء أنا ولا غيري لأن هذا من دينا
والله يعينهم على شياطيم الانس
الله يصلح لك بنتك وباقي عيالك ويحفظهم من كل شر ويريح قلبك