صدقيني انه بيرجع لك بس يبيك تتأدبين صح ..



اسمعي انا تقريباً مثل زوجك نوعيتي , اكتم واكتم واكتم بعدين اخربها , مثل ما يقول المثل ( علي وعلى أعدائي ) ..



شوفي انا خطيبتي يمكن من اربع شهور ما صار بيننا شي ابد مع انها رفعة ضغطي في اكثر من موقف وزعلتني وصرت اكتم واكتم , طبعاً هالاسلوب غلط وبحاول اعدله , ثم بعد هذا كله خربتها ههههه وأدبتها صح حتى انها فكرت اني خلاص بطلقها مع اني ما بعد تزوجنا وكلها فترة ملكه لكن عرفت اني كتمت بعدين انفجرت في لحظه وطنشتها ولا رديت عليها وبغيت افصل جوالاتي , لكن كانت ترسل لي رسائل عاطفيه , انت وانت وانت وما فيه مثل حنيتك والله اني لو ادور ما احصل مثلك ومن هالكلام , تخيلي والله اني قبل ما انام كل ليله تقريباً افتح رسايلها واقراها وتخنقني العبره بعض الاحيان بس ما زلت حاقد عليها في هذيك الفتره لين تيسرت الامور ...



ومثل ما قال الاخ عامر عبدالله في رده الرجال كتم وكتم وكتم وجاب الاولي والتالي , انا سويت مثله بالضبط كتمت وكتمت وجبت كل شيييييييييي صار وسوته , والحين الحمد لله الامور رجعت تمام بعد ما خليتها تتأدب ..



المطلوب منك مثل ما قالوا الاخوان كلهم ما عدا رد الاخت الملكه يونا ( مع فائق احترامي ) لانه راح يضرك ما راح ينفعك ..


ونصيحة الاخت دلوعة ابوها على ما اعتقد اللي هي

^

^


احذري احذري احذري , انا اكلمك بما اني رجل ومسئول امام الله عن كلامي كله , وهالشيء والله ان يخرب بيتك , هذا كلام لو يصير لي راح اخربها صح وراح ابطش مع اني رجل اخاف الله لكن اتوقع لو صار هالشيء راح انفجر واخربها على الاولي والتالي ..




انتي اتبعي كلامي وان شاء الله امورك تصير تمام ..



اول شي لازم تصبرين ولو ان الامور هذي صعبه عليك واعرف انك محترقه عليه وميته عليه بعد , والشيء الثاني هو يبي من يحرك عواطفه وهذي مهمتك , والشيء الثالث هو يبي حاقد عليك بسبب كلامك قدام ابوه وامه اللي ما كان له داعي ابد , ولازم تحسسينه بانك واثقه فيه وانه هو مصدر الامان لك وانه هو اطلق رجال في العالم كله وان الرجال لو يصفون من المحيط الى الخليج ما يساوون اصبع من اصابعه , لان كلامك افقده الثقه وزعل عليك وحاب يأدبك ويمكن انه متعمد يبي يقطع الجوال علشان تنقطع الصله بينكم علشان ما يحن قلبه لان كلامك قوي مره ولا يتحمله الرجال , لكن انتي راسليه بالجوال الثاني بين كل فتره وفتره ووضحي له ان الحياه من دونه ولا شيء وانك وصلتي إلى مرحلة اليأس وانه ما فيه احد في الدنيا بعد الله راح يعينك الا هو وانك بدونه ولا تسوين , لأن الرجل يموووت في المرأه الخاضعه الضعيفه اللي ما تقدر تستغني عن زوجها , يعني مو كل شي يصير تسوين انك مستغنيه , لا المفروض حتى وانتي في البيت معه تبينين له انك ضعيفه , على سبيل المثال لو مثلا حاولتي تفتحين علبه او شي تحسينها قويه شوي بس انتي قادره انك تفتحينها , لا تفتحينها وقولي له فلان تعال ساعدني ما قدرت افتح هالعلبه , صدقييني بينبسط لانك بتحسسينه انك بدونه ما تقدرين تعيشين وبعدها قولي له والله من دونك ما اسوى , اذا كانت العلبه وما قدرت افتحها فكيف غيرها خخخخخ صدقيني بيطير في العجه ويستانس ..




بالنسبه للي بينه وبين ابوك انتي مالك دخل فيه ابد ولا يخصك اهانه او مو اهانه , ابوك ما جاء لين عندك وقال زوجك اهاني او طلب منك تفزعين له , ابوك عارف وش يسوي ..




بالنسبه للآراء الخارجيه من اهلك او خالاتك ابتعدي عنها لانهم حتى وان حاولوا ينفعونك ما اتوقع انهم بيخرجون لك بحل وافي وممتاز , بس انتي خليك معنا هنا ومع الاخوان وصدقيني حلولهم بتكون افضل الحلول , وانتي جربي واعطينا آخر اخبارك وبتشوفين كيف بيشتاق لليوم اللي بيرجعك فيه , والله ان يتشقق من الفرحه اذا ردك حتى لو ما بانت عليه لان الشوق بيغلبه , بس طبعا اذا سويتي اللي نقول لك علشان يدري انك متولعه فيه ..



وفقك الله

__________________
يالله ياللي بيدك الضيق وافراجه .. يا خالق الخلق يا قاضي حوايجها
تفرج لعين الذي اغفت بسوهاجه .. تجهز عليها الطواري لين تزعجها