السلام عليكم حبيبتى

أولا ربنا يهديلك جوزك ويريح بالك

تانى حاجه جوزك بيحب الشغالات انتى ما سألتيش روحك ليه؟ طبعا انا عارفه ان مش مطلوب منك تفكرى وتحللى بس واضح انك مش ممكن هتنفصلى عنه يبقى بلاش نواح وتفكرى شويه
كل راجل له مزاج وحضرتك شمعه منوره وتقريبا هو كاره تلميعك ونضافتك دى وده مش سب ولا عيب فيه كل واحد له مزاج
يمكن حابب الست اللى بتعمل الحاجه بإيديها له ......تنضف وتمسح وتكنس له هو
توطى وتقوم وتفرفر من التعب عشانه وعشان بيته
اه انتى تعبانه وعندك 7 اولاد ربنا يبارك لك فيهم بس عندك نقطه غايبه
تخيلى انتى الوضع بالمقلوب لو جوزك بيخلى حد تانى يشتغل بداله وييجى يديكى راتب الراجل التانى ده اللى هو المنفعه يعنى ......طبيعى راجلك هيقل فى نظرك وهتحبى التعبان الشقيان عشانك
سيبك من انه دنىء وانه وانه هو ياستى منه لله ........بس انتى فينك اه مش كل مشكله سببها الست ولا انا باجى مع الراجل على الست بس دى وجهه نظر ما حدش طرحها فى المنتدى
انتى تعبانه هاتى شغاله باليوم وهو مش بالبيت تنضف وتمشى
ما ينفعش يبقى اطلبى من بناتك شغالتهم تساعدك واكيد هيخاف يتحرش بشغاله بنته لتقول لها
ما ينفعش يبقى تنضفى انتى
ما ينفعش برضه يبقى تسريح بأحسان انتى بناتك كبروا واتجوزوا واولادك رجاله يعنى مش لسه بيرضعوا
فكرى فى كلامى
كل انسان له شىء يثيره وهو بيموت فى ريحة الصابون والكلوركس والست المنكوشه ......يبقى راجل بدائى صياد زى الراجل فى العصور البدائيه انتى كمان ما تعمليش نانسى عجرم وعاوزاه يقبل عليكى ....يعنى يا توافقى مزاجه يا تشوفى لك حل ضمن الحلول اللى اقترحتها عليكى
وربنا المستعان