السلام عليكم ورحمة الله وبركاته

منقطع عن الكتابة من فترة طويلة .. لكن شدني موضوعك لأن في زوجتك صفات قريبة إلى حد ما من طليقتي الله يستر عليها وحبيت أفيدك بتجربتي

ربما يزعل بعض الأعضاء من الكلام اللي بقوله .. لكن اللي يفهم زين وش مقصدي ما راح يزعل بإذن الله

أول ما قريت كلامك زعلت عليك .. لأن التمادي في العطاء والبذل بالشكل اللي أنت تسويه ما راح يفيدك .. بل على العكس .. لا أنت ولا زوجتك .. لكن بعد ما ذكرت موقف القطيعة منك وإن البنت ردت لك مرة ثانية وحاولت تعتذر وحست بالخطأ أعجبتني حركتك خصوصا إنها أثرت على زوجتك إيجابيا ولا ظهر منها تعالي وتكبر .. لكن تصرفك بعد كذا ما أعجبني مرة ثانية !!

كان من المفترض بعد ما شفت البنت ندمت وحاولت تراضيك إنك ما تطول عليها بالقطيعة زيادة .. لأن هذا فعلا يجرحها وهي سوت اللي عليها .. أنا لو كنت بموقفها راح أحس بالذلة وهذا شعور سيء جدا بين الزوجين .. أفضل تصرف في الحالة هذي إنك تتصل عليها وتعلمها إن زعلك مو كره لها بل كان من غلاتها عندك .. وإنها لو مو مهمة بحياتك كان طنشت ولا شلت هم ولا زعلت ولا شي .. واقبل اعتذارها بطريقة تحسسها إنها سوت الشي الصحيح بالاعتذار .. وبعد كذا عطها كم كلمة حلوة .. صدقني بالطريقة هذي راح تشتد المحبة بينكم بشكل ما تتخيله .. وراح تاخذ زوجتك الموقف هذا كدرس لا ينسى بحيث ما عاد تكرره مرة ثانية .. وراح تعرف هي أيضا إن زعلك مو سهل .. صعب تزعل بس بنفس الوقت زعلك مو هين أبد .. كذا ممكن تعطيها شخصية رجل حقيقي .. لكن العطاء المستمر ومحاولة الإرضاء بالعطاء طريقة غير سليمة أبدا أبدا .. ما يمنع إنك إذا اتخذت قرار معين وشفت إنه هو الأنسب إنك تلزمها فيه خصوصا إذا شفت إن اللي عندها مجرد طيش بنات .. ممكن تزعل اليوم .. وممكن تزعل مرة ثانية بعدين .. لكن بعد كذا صدقني تتأقلم عليك وتعرف ايش اللي يرضيك وايش اللي يزعلك

جيد إنك وريتها كيف إنك حليم لكن زعلك قاسي لأنه درس جيد لمثل هذا النوع من البنات .. وهي أيضا تتفاعل إيجابيا مع الطريقة هذي وهذا في صالحها وصالحك ..

شخصية زوجتك -والله أعلم- تحب تتدلع عليك وتحب تتنفذ طلباتها .. لكن مو لدرجة إنها تكرهك لو ما سويت اللي هي تبيه .. أو لدرجة إنها تزعل زعل طويل ويقل أدبها معك وتستمر المشاكل .. بالعكس ربما تزعل في البداية - وهذا متوقع في بداية الزواج- وبعدين ترضى وتعرف لك زين

لا تطول عليها أبدا .. ارجع لها مرة ثانية .. ولا تظن إن مكالمتك لها مرة ثانية ذلة ومهانة .. الزوجين ما بينهم ذلة ومهانة .. اللي بينهم حسن تصرف وحكمة .. وخلك أنت الأعقل .. التمادي في القطيعة له عواقب وخيمة صدقني .. خصوصا في بداية الزواج


يحتاج إنك تقرأ كتب معينة في فهم طبيعة النساء .. وزوجتك تقرأ في فهم طبيعة الرجال .. احرص إنه يكون قبل الزواج .. صدقني بتنكشف لك أمور ما تجي على بالك أبدا .. أنصحك بكتاب (الرجال من المريخ والنساء من الزهرة) جميل جدا

أذكرك .. زوجتك ليست سيئة إطلاقا .. بالعكس أعجبني تصرفها لما حاولت تعتذر .. واستغل ذلك في صالح حياتكم الزوجية

وعلى سالفة دخول أحد بينكم .. صارحها بالموضوع وقل لها أنا وأنتي واحد .. محد يدخل بيننا مهما كان .. واتفقوا على السرية التامة .. لا تطلع مواضيعكم لأحد أبدا حتى أبوها وأمها .. اتركوا مشاكلكم بينكم صدقني ترتاح مرة وهي ترتاح .. مو حلو إنها تدخل بيت أهلها وبعيونهم زعل عليها أو عليك وتسمع بس نصايح من يمين ويسار ..

كل اللي كتبته لك من واقع تجربة .. والله يوفقك ويكتب لك كل خيرة