المشاركة الأصلية كتبت بواسطة fatoushi

أم داليا

هتكلم فى موضوعك نقطه نقطه

الاول : الطلقه هى اللى خربت بيتها وطفشت الراجل وست ماتتعاشرش........والارمله مسكينه مالهاش يد فى قضاء الله
المطلقه خرابة بيوت وهتموت على راجل ، وست مش تمام يعنى بما انها مطلقه يعنى ما تقدرش تصبر على روحها من غير راجل وعندها استعداد تخطف اى حد انشالله من غير جواز ماهى هتفقد ايه يعنى
المطلقه دى اصلا ست معقده وعيانه وعاوزه تخرب بيوت كل الستات اللى حواليها وخلوا بالكم كل نصايحها وراها خراب بيتكم لانها عاوزه العالم كله يبقى زيها
المطلقه حاسده كل حاجه عند المتجوزه لانها هتموت عليها وانها يبقى عندها زيها فخافوا على حاجتكم واجوازكم وعيالكم
اوعى تدخلى مطلقه بيتك ولاتعزميها ابدا مالهاش وجود كلكم متجوزين او بنات هى مالهاش مكان
اولاد المطلقه فاسدين ومافبش راجل يحكمهم وبايظين ابعدوا اولادكم عنهم
المطلقه ست دايره على حل شعرها لا ظابط ولا رابط ماهو ما فيش راجل ...........
تخيلوا يا جماعه كل ده فى المطلقه طاب ما نقتلها ونخلص مادامت هى الشيطان يمشى على قدمين
وياترى ربنا حلله ليه ....... يمكن عشان يعذب النساء المطلقات

نقطه تانيه مهمه
اى راجل او معظم الرجاله بيبصوا للمطلقه على انها صيده .......ست مالهاش طلبات يعنى للمتعه وبس .......حاجه تروق المزاج لا مهر ولا شبكه ولا بناء عيله
يعنى ده فى المجتمع العربى كتير اوى
ولو سنه كبير وما سبقلوش جواز يبقى برضه مالها بنت البنوت ........مطلقه خرج بيت ليه
واهله يبصوا لها الستات بالذات بصه مش كويسه بصه انتى خطفتى ابننا اللى ممكن يكون اكبر منها بعشرين سنه وانتى كنتى فى يوم تحت راجل تانى
ولو اتقدم لها الارمل برضه اهله هيبصوا لها ذات النظره
والمطلق عاوز كتكوته والمتجوز عاوز مفعوصه مش كتكوته
يعنى من الاخر المطلقه خرج بيت تنتحر احسن
او تمشى فى السكه البطاله
الستات اكتر من الرجاله طريقتهم تموت المطلقه والارمله ويقولوا على اللى من غير راجل تعبان وسم
قصه بسيطه حقيقيه
شابه اتطلقت سنها كان 33 سنه وعندها اولاد مثقفه وبنت حلال المهم بعد ما اتطلقت اصبحت منطلقه
منطلقه بمعنى وزنها قل جدا ولما وزنها قل بدأت تلبس زى ما كانت زمااااااااااااااان لبس ماحطتهوش على جلدها من 15 سنه هى مش محجبه رجعت تلبس هدوم مقاسها مش عريانه ولا مبينه مفاتن بس جذابه وشيك وبما انها ماعندهاش راجل فى البيت اهتمت بزياده بشعرها وبشرتها المهم انها تألقت.......وبدأت تخرج للحياه ( ملحوظه كل ده مع اولادها ما بيفارقوهاش ابدا لانها ما بتحبش تبقى لوحدها ) اول اللائمين اخواتها البنات انتى اتغيرتى وبعد طلاقك مخك باظ!!!!!!!!!!!!!
مخها باظ لانها حبت نفسها شويه
خلعت دبله جوازها واشتغلت ولما حد يسألها عن وضعها الاجتماعى بتقول بكل فخر مطلقه.......الاول بدأ يطمع فيها كل الرجاله اللى فى الشغل معظمهم يعنى بدأوا يبصوا لها بصه تفصصها بصه اشتها ما بتتبصش للمتجوزه.........بصه ضايقتها أوى
واتقدم لها اللى عنده 70 سنه عاوزها للمتعه ..........فى السر عرفى وكله بتمنه
واتقدم لها اللى ما ينفعش اصلا لاى ست
المهم اتصاحبت على ستات زيها وبقت تزورهم كتير بحكم ان الستات دول رجالتهم بيشتغلوا لحد نص الليل وبقت تزورهم كتير وحبتهم وحست انهم اخواتها واولادها واولادهم بقوا اصحاب وفرحت بيهم اوى ......بدأ يبقى فيه شغل وفلوس بينها وبين جوز واحده من صاحباتها وصمرات الشخص ده حاضره كل الكلام والاتفاقات .... واتفقوا ان ما حدش من باقى الصاحبات يعرف ، صاحبتنا المطلقه غصب عنها غلطت واتكلمت قالت جوزك يا فلانه اتصل النهارده هو فيه حاجه ؟؟؟؟؟؟؟؟كانت مصيبه على دماغها واحده من الصاحبات بدأت تحذر منها ومن انها قالت جوزك اتصل ؟؟؟؟؟ الكلام وصل المطلقه بمنتهى الهدوء اختفت من حياه الستات دول
اتقدم لها شاب كويس اوهمها ان اهله عارفين انه طالب الجواز وانه يعدد ... وافقت واتخطبت .......اهله بهدلوها تليفونات ومراته مرمطتها وسمعوها اقذر الكلام وانها خطافة رجاله وخرابة بيوت وكانوا هيتعرضوا لاولادها .....وكلموا طليقها عشان ياخد ولاده منها؟؟؟؟
قرارها الاخير رفض الجواز اطلاقا من اى حد ورجعت لبست دبلتها تانى وقالت انا رجعت لطليقى
طولت عليكم بس المجتمع بوشين ........مجتمع حاقد وسماوى عنده سم بيبثه .......وكل واحده مش حاسبه حساب انها فى يوم ممكن تكون مكان المطلقه دى ........
رأيك أيه يا ام داليا؟؟؟؟؟؟؟
حقها تتجوز ؟ ما ينفعش
حقها تحب وتتحب ؟ فاجره
حقها تقول وضعها الحقيقى ؟ هتبقى مصدر خوف
صدقينى فى الجنه بقى تبقى تعيش اللى الدنيا حرمتها بناسها منه
سلام