أختي القانتة ، و إن شاء الله لك من اسمك نصيب

فكرتيني بجملة قلتها له بداية زواجنا ، قلت له ( ما أبغى من الدنيا هذه كلها ، غير إنك تحافظ على الصلاة )
أنا و الله ما تنازلت عن حقوقي و عن أشياء كثيرة إلا عشان كنت أبحث عن ( الدين )

كتبت عيوبه و اللي اكتسبها من التربية ، لإنها مو بس فيه ، في العيلة كلها
و قال لي بنعالج الموضوع هذا ، إنه إذا رجعنا بنسكن بعييييييد عن أهله ، هو اللي قال كذا
لإنه هو بنفسه ما يتحمل طبايع أهله ، و هو في السعودية ما كانت هذه الطبايع ظاهرة فيه
بس ماعرف ليش يوم يبعد عنهم ، تبدأ تظهر كلها و يتغييييير ؟ هل الغربة لها تأثير ؟ هل هذا هو وجهه
الحقيقي و أنا ما أدري ؟


طيب بأكتب هنا تغيره من الناحية الدينية و اللي كان متعبني فيها زمان :
1 - بدأ يقوم للصلاة إذا صحيته ، و ما يطنش و يرجع ينام و زمان كان يخليني انام معاه و يقفل المنبه
2 - صار يقوم من نفسه و يصلي و زمان كان يحافظ على صلاته بس إذا كان أبوه موجود و قلت له أنا ما أبغاك
تصلي عشان أبوك ؟ أبغاك تصلي عشان ربنا ، لازم يكون هناك احساس طالع من قلبك و من داخلك
3 - يقول لي خلينا نراجع القرآن مع بعض
4 - أول مرة يصوم العشر أيام من ذو الحجة ، كنت تاركته براحته بس أجي أسأله إيش رايك نصوم بكرة ؟
يقول لي لأ ، ما أبغى ( لإنه كان في بيت أهله مجبر على العبادات و مكبوت )
هذه المرة قبل الفجر ليلة 1 الحج ، قلت له إيش رايك تتسحر و تصوم ؟ و النهار دحين قصير و ما راح تتعب
بالصيام إن شاء الله ، قال لي طيب و ماشاء الله صامها كلها ما عدا ثامن يوم عشان كان عطشان و جاي
من برا
5 - أول مرة في رمضان هذه السنة يحافظ على التراويح و يختم القرآن 4 ختمات ، و كان قبل مرة وحدة
بالكثير
6 - ما صار يسمع الأغاني عن ( قناعة ) و زمان كان بس قدام الناس ، بس في جواله كانت مليانة
فيديو كليبات و حذفها يوم شافني تفاجأت منه ؟

المهم ، إني اختبرته مرة من شهر و فتحت على مقطع موسيقى ،، قام قفل الجهاز و قال لي تبغي تسمعي أغاني مافي نت ، مثلت عليه إني خلاص طفشانة و ماني ملتزمة مثل زمان و أبغى أسمع الأغنية
قال لي ( مافي ) و راح شال المودم

( هذه الناحية الدينية ) و ما يمنع إنه فيه أحيانا تقصير و كذا
بس مقارنة عن قبل ، فأفضل بكثير

-----------------------------------------------------------------------------------

حكاية الدين اللي عليه دحين ، تبع المحكمة و كذا
صحيح إني مجمدة قلبي و عاملة كأنه الموضوع ( ما همني ) لإنه ذكي في النقطة هذه و يعرف كيف
يستدرج عطف الإنسان ،، فأبين له إنه عاااااااااااااادي هذه مسؤوليتك و إنت تتحمل نتيجتها ، لإني حذرته
كثير و أبغاها ياخد ( ضربة في راسه عشان يصحى ) و المحاكم ماعندها لعب و خاصة هنا في بلاد الغرب

بس مع كذا ، بأطلع من البيت و أروح الجامعة و أنا مهمومة و أفكر كيف أقلل من مصاريف البيت و أوفر
من غير ما أحسسه أبدا ، بس أخليها احتياط على جنب

بالإضافة إلى إني قلت استغل الموقف هذا ، و أبين له كيف ممكن الإنسان يحرم نفسه و يمد رجوله على قد
لحافه في سبيل تسديد ديونه و حقوق الناس ، لإني أول مرة أشوفه يهتم و يشيل هم إرجاع الفلوس
مع المحكمة ، لإنه ما عندهم لعب المحكمة

فجلست معه الأسبوع الماضي ، و قلت له أنا مستعدة المرة هذه أوقف معاك من ناحية ( إننا نقلل من
مصاريف البيت في الأشياء الثانوية ، و مطاعم و طلعات و كذا و ألعاب لولدي و إلخ )
بس بشررررررررررررررررررررررط ، إنك تحط يدك على يدي ، و مو بس أنا اللي أتحمل ، لإنك تدري إنه ماني
مستفيدة شئ و ما راح اتضرر بشئ ، بس عشانك و عشان مصلحتك

و رضي يسمعني ، و جبت ورقة و قلم و سجلت فيها كلللللللل الديون اللي عليه و فواتير و ضرايب و كذا
و بينت له كيف راح تتسدد لو عملنا جدول و نظمنا فيه كل شئ
( حبيت أعلمه كيف ممكن ينظم حياته ، بطريقة عملية )

بس هذه من الفلوس اللي نصرف فيها على البيت و الفواتير و الإيجار

يعني صح موقف المحكمة ما أرضاها على الغريب و لا القريب ، بس كانت لصالحه عشان ممكن تخليه
( يصحى ) من دحين ، بس بينت له إنه مالي دخل ، و اللي أقدر أعمله إني ممكن أقلل المصاريف لو
حسيت إنه بالفعل حاط يده بيدي