بوصي يا ملك

حطي نفسك مكان الولد

حد صحاكي الساعة 4 الفجر (بالنسبة ليه الوقت كان كدا ) ولبّسك غصب ونزلك !!!

أكيد هيعمل مناحة .. اقل حاجة يعملها وقتها

دي حاجة

الحاجة التانية اللي لاحظتها بشدة ... وراقبي نفسك فيها

ان على حسب ردة فعلك مع ابنك جوزك بيتبرمج

يعني لو انتي متضايقة اوي من تصرفات ابنك وبتبيني كدا ... آه جوزك شايف وممكن يرحمه ومايتصرفش بس هيبقى شايل ... وماسك نفسه عشان الولد طفل مش أكتر

يعني احنا كأمهات بنطلع غضبنا بالكلام انما مش معقولة ابدا هنلمس الولد مهما اتعصبنا ... الرجالة مش كدا وقت مابيتعصبوا بينسوا نفسهم ... وانا اعتبر جوزك بطل انه بس قعد يعنف الولد بهدوء لأن في رجالة لو مكان جوزك كانت ادت ابنها بالقلم على وجهه وهتقوليلي وهو صغير كدا اقولك وهو صغير في ناس بتعملها !!

يعدين لو كانت ردة فعلك مع ابنك شوية مختلفة وقولتي ياحرام مسكين ايه مالك يا حبيبي

أنت مش طبيعي .. سلامتك في ايه ... وقعدتي تحضنيه واستحملتي .. على كل صريخه ده

صدقيني كانت ردة فعل جوزك اختلفت تماما

وغير كدا نوبات الغضب معروفة عند كل الاطفال .. ولسة لما يكبر ويتعصب ويرفس ويرمي نفسه في الارض بصريخ في وسط الناس في التجمعات مول باه ،جنينه ،سوبر ماركت ، زيارة وهكذا.. هتعملي ايه ساعتها ... هتدبحوه ؟؟!!!

لأ طبعا الفعل الصح والمعروف ان انتي تطنشيه وتكوني هادية جدا في انفعالاتك (باردة) وماتسمعيش كلامه ولا تشيليه ولا تحضنيه ولا اي حاجة وكمان تبعديه عن انه يئذي نفسه واللي حواليه .... وخليه يصرخ واللي يتفرج يتفرج ... ماحدش معلق حبل المشنقة وده طفل خليه يجيب اخره ويعيط لحد مايسكت ... هيتعلم انه يسيطر على نفسه وان رغباته مش مجابه.. وبعد فتره هيبطل

طبعا مش هناقشك على اللي قولتيه بعد كدا مع جوزك عشان غلطانه طبعا

وكمان انا راحماكي بصراحة عشان حملك هتكون انفعالاتك وقوة تحملك شوية مش زي طبيعتك

ربنا يكون في عونك