ربنا يكون فى عونك

حبيبتى سنك 30 لسه صغيره
والله لسه صغيره البنات سنهم ارتفع جدا .............. صديقتنا سنها بقى 35 ولسه عروسه لها كام شهر بس واتجوزت واحد ما اتجوزش اصلا قبل كده ومحترم وراجل وشاريها

والله قعده الخزانه ولا جوازه الندامه

اخوكى يخليه فى حاله ويفوق لبيته وعياله ويفكه منك أحسن له ربنا يديم عليكى والدك

حبيبتى انتى كل ما هتنقهرى هتدى سبب للى حواليكى يتنططوا عليكى زى القرود .......زوكل واحد وللا واحده بتاخد على دماغها فى بيتها هتعملك تسليتها وتعوض او يعوض النقص اللى عنده فيكى
اضحكى حتى لو من ورا قلبك
بينى للناس وش عليه ابتسامه حتى لو زايفه ..........

اعملى خطط لحياتك طورى نفسك وحياتك
اخوكى مش هو اللى هينام فى حضن الزوج الغير كفء
ولا حد غيرك اصلا هيشيل الهم بعد الشر لو اترميتى لاى راجل

انتى مش خضار بايت ولا انتيش عاله..........
انتى انسان وروح قيمتها عاليه اوى اوى مهما ان تواضعت مقوماتك..........
انسان ............

فيه دعاء جميل .......حسبى الله ونعم الوكيل ...........لا اله الا انت سبحانك انى كنت من الظالمين .......اللهم انصرنى ممن ظلمنى وارنى فيه ثأرى واقر بذلك عينى

سيبك من اخوكى ده مجنون......

احتمى بوالدك وقولى له شكوتك كأنه صديق و الله ليكفخ اللى يقولك كلمه وحشه والله ما يرضى لك ابدا الا الخير
روحى له واترمى فى حضنه واشكى له قولى له يا بويا بيأذونى

ولو ما وسعكيش حضن ابوكى يساعك من قبله ومن بعده حضن ربنا وحضننا

اوعى تيأسى أوعى

انتى بتموتينى انتى واى بنت تانيه رغم انى ما اعرفكيش لما تنعى حظك وتنقهرى
اياكى تنقهرى لا حبيبتى شبابك وعمرك ما يستاهلوش منك كده
انتى احسن قسما بربى انتى احسن وهتبقى افضل منهم كلهم