الحمد لله على كل حال

انا هدخل بالموضوع على طول مش هتفلسف عليكى

الاول جوزك لازم يتعالج لانه مش طبيعى اللى هو فيه ده ..... لازم تتكلمى معاه وفهميه ما فيه ست تصبر على نفسها كل الوقت ده وانا بقولك شهوه الست اقوى من الراجل
المرأه تستطيع ان تاتى بشهوتها بعد 7 دقائق من قذفها الاول بينما يحتاج الرجل 45 دقيقه حتى يستعيد لياقته
عارفه يعنى ايه 31 سنه يعنى اللى زيك لسه انسات وانتى اتعودتى عالجماع بقى لك 13 سنه يعنى ما تصبرى وان صبرتى الرسول والصحابه فى الحروب سألوا النساء كم تستطيع صبرا على نفسها قالت 3 شهور فكان بينزل المحاربين لزوجاتهم كل 3 شهور عشان الفتن
حاجه كمان معلش انا اسفه دى للمجتمع كله ( لو اللى بيشتكى راجل لنصحتوه بالطلاق او التعدد او الحديث معها بعنف ولكن بما ان المشتكى امرأه فالحل اصبرى ، حرام ، ليه كده ، واكيد اكيد لو اتطلقت عشان السبب ده بتكون ست مش تمام من وجهه نظر المجتمع ، ياريت كلنا نراجع ردودنا ومواقفنا فى الحياه واللى بتتغير فى الرد على اللى بيشكى سواء كان ذكر ام انثى والا بجد نبقى كلنا بنطق حنك وبس )

نرجع لموضوعنا
مش سبه انك اتجوزتى راجل اكبر منك ولا مطلوب من بنت ال17 انها تحسب يا ترى هيصاب جنسيا امتى لان ده ما حدش يعرفه الا ربنا سبحانه وتعالى
انا فاهمه يعنى ايه تبقى الاسم متجوزه وعلى ذمه راجل وانتى فى الحقيقه عايشه مع حد اتعودتى عليه ما يفرقش عن اى حد تانى من العيله بما ان ما فيش حياه جنسيه واولادك
فاهمه يعنى ايه ابنك يبقى راجلك وهو اللى تخرجى معاه او تترزعى فى البيت

دلوقت جوزك تتكلمى معاه وتقولى له الحقيقه قولى له انا تعبانه جدا ما ينفعش كده
مش هيبقى قله جماع وقله حنان
انا حقى احس انى ست انا لسه صغيره وبحبك بلاش تخلينى اكرهك
لو حابب نروح لدكتور سوا

واصبرى عليه لفتره
لو ما عالجش روحه وماعوضكيش حنان واهتمام
انا اسفه الشرع بيقول فراق باحسان
ده كلام ربنا يا جماعه بلاش نلف وندور
الولاد ماشاء الله هيتربوا ، بس مع ام مطلقه احسن من ام طايشه بسبب الكبت والنفس والشيطان او ام مجنونه متعصبه دايما
بس قبل الطلاق لازم تفكرى فى حاجات كتير

هتقدرى على الولاد لوحدك
لو والدهم رفض الصرف عليهم تقدرى تصرفى عليهم
انتى تعرفى تعتمدى على نفسك لوحدك خالص من غير وجود الراجل ده فى حياتك
لو اتجوزتى تانى اولادك لو طالب بيهم ابوهم هينفع تستغنى عنهم

لو طالبك بالطلاق عالابراء هتوافقى
لو الراجل ده اتعالج هل هتعيشى معاه عادى وللا عندك حاجات تانيه ضده

خطتك ايه لو اتطلقتى؟ هتشتغلى ؟ هترجعى بلدك ؟ هتكملى فى الغربه ؟
هتاخدى اولادك معاكى وتروحى بيت اهلك ؟ هتسيبى له الولاد ؟
ردى على كل الاسئله دى الاول وبعدين نبقى نتقابل هنا تانى
وربنا يهدى لك الحال

__________________