مافيه شي في هالدنيا ما يتغير

طبعا الحياه الزوجيه تتغير بعد مده من السنين

لكن المحظوظ اللي تتغير من صالحه والمسكين اللي تاخذ منحى ما وده فيه

من تجربتي انا مع اني ماكملت عشر سنوات ولكني مو بعيده عنها

كانت الحياه صعبه جدا في بدايتها ولا اتمناها للعدو بعد

وكانت زي ما قلت مجرد واجبات لاا اكثر ولا اقل

لكن الان الحمد لله ..افضل من اول بسبب جلسات طويله من التفاهم و المصارحات

كانت جلسات مؤلمه جدا ... اشبهها بعملية قلب مفتوح ولكن بدون تخدير

مؤلمه لأبعد حد لأنك تصارح نصفك الثاني واللي هو جزء منك .. ان انت منزعج منه وتتمنى تفارقه وزعلان منه

ولكن الحمد لله جت هالجلسات بفايده وانصلحت امور كثيره ولو انه لازال في الجو غيم ولكن تعدي وتروح


هذا بالنسبه لمتى بديت احس بالتغيير في حياتي
اما من ناحية الروتين الممل

فلابد من هالروتين

ولو لم يكن ممل ما احسسنا بطعم التجديد

ولا نقدر ولا بأي حال من الاحوال اننا نخلي حياتنا متجدده على طول .. يعني حتى اللي حياتهم سفر متواصل تلقاهم يملون ويتمنون الاستقرار . مع ان غيرهم يحسدهم على تنقلاتهم المتواصله ويحسبونهم في تجديد مستمر
هذي طبيعة بني ادم .. لا يشبع ابدا ولا يقتنع


اما عن كيفية جعل حياتنا ممتعه .. فهذا جانب واسع جدا ولا مجال للحصر

لكن مع مواصلة الاقارب .. وتغيير اماكن النزهات .. و كل فتره نعمل طلعه جماعيه كبيره نجمع فيه اكبر قدر ممكن من الاهل
غير الشوي برا البيت ... والسفريات الخفيفه للمناطق القريبه منا
هذي كلها تجدد في الحياه

اتمنى اكون افدتك و في انتظار مشاركات البقيه