السلام عليكم ورحمة الله وبركاتة ..

شهران مرا مثل الحلم .. تعبت بدايتها وكلي اصرار .. اصرار نادر وإرادة اول مرة تجيني .. وبعد هالمدة نقصت من 9 إلى 10 كيلو .. بصراحة مو مصدقة !!!

الحمدلله .. كان في بالي وقتها (اني بتعب شهر شهرين عشان اغير حياتي كلها) وفعلاً .. تعبت ونلت .. ومن حبي لكم احب اني اشارككم الطريقة اللي انا مشيت عليها وهي مو صعبه، بس يبي لها إطلاع وما اغني النت بالمعلومات اللي تقدر تساعدنا .. يعني مو ضروري خبير تغذية (في حالة عدم وجود امراض او حساسيات طبعاً) ..

المهم .. بالنسبة للرياضة .. نص ساعة مشي يوميا تقريبا (او 5 مرات بالإسبوع) واللي ساعدني ان في ممشى في منطقتي .. والجو الحلو يخلي الواحد غصب يمشي .. كنت امشي لأن للمشي فوايد قريتها في النت .. يعني اهم شي انه يعدل النفسية .. ويعدل الجسم .. ويقى من امراض العصر ..

وبالنسبة للأكل .. كنت أكل الأشياء اللي احبها وبس .. كل شي احبه آكله .. بس استبعدت نهائيا (الخبز الأبيض والرز والمشروبات الغازية والعصاير المحلاه) .. يعني اذا ابي اشرب شي غير الماي .. كنت اطلب عصير فرش بيور بدون سكر .. وبس ..

انزين .. قبل الفطور ومن الصباح الباكر كنت اشرب كوب ماء دافي .. هو ينظف الجسم وينقي البشرة وانا عندي (فرضية) انه يذوب الشحوم ..

الفطور .. كنت أكل نص خبر اسمر بالنخالة مع جبن .. أو زبادي اكتيفيا .. أو زبادي قليل الدسم ..

بعدها بثلاث اربع ساعات (وقت اللي اجوع) كنت آكل خضروات او فواكه مثل خيار، جوافة، تفاحة، خس .. اقطعهم وآكلهم بتلذذ .. او كنت أكل (جرجير) لأني سمعت ان الجرجير زين للشعر ..

الغدا كنت آكله متأخر .. يعني العصر .. ويكون لذيذ ممممم .. تقدرين تبتكرين شي على حسب اللي تحبينة بس بدون خبر او بدون رز ..

1. علبة تونه صغيرة بالماء .. على كيفك تسوينها .. تقدرين تسوينها (سلطة) او (تحمسينها مع طماطم وفلفل بارد وبصل وتسوينها سبايسي - حارة)

2. عدد 2 سوسج مفيوح (مغلي في ماء) - وتضيفين عليه طماطم مقطع / خيارة مخلله مقطعه / هلابينو مقطع / ملعقه مسترد / جبن .. وخليه في المايكروويف وتللذذي بطلعمة اللذيذ ..

3. عدد 2 بيض مفيوح / تقدرين تسوينه سلطة .. او على كيفك ..

بالنسبة للعشا، كنت اقطع كيوي وفراولة .. على اساس انهم يساعدون على تذويب الشحوم مثل ما سمعت .. او نص ثمرة جريب فروت .. او عصير فرش .. يعني نامي خفيفة .. او يمكن سلطة .. وعلى فكرة ترا قريت ان الجريب فروت يخفف حب الشباب ويحسن مظهر البشرة .. يعني قيمة مضاعفة ..

وطبعاً وقت الريجيم يكون الشعر والبشرة معرضة للخطر .. فكنت آخذ حبه فيتامين اسمها (سترس تابس ويذ زنك stress tabs with zink) وصفها طبيب تغذية حق صديقتي .. هي زينه حق اللي يسوون ريجيم وسمعت انها رهيبه للشعر وفعلا الحمدلله شعري بخير ..

اهم شي حطو في بالكم انكم بتتعبون وترتاحون العمر كله ان شاء الله .. وصدقوني الجوع يتنسي في لحظة تشوفين فيه مقاسك صار احسن .. والأكل مو كل شي بالدنيا ..

بعد كل اللي قلتة اتمنى يصير عندكم ارادة واصرار يا بنات وشباب بعد ..

مع التحية والإحترام للجميع ...

أم كريم ..