عزيزتي لما قريت موضوعك على طول قلت في نفسي هالانسانه بحاجة لطبيب نفسي.. انتي عندك عقدة طفولة وعلى مشارف الاكتئاب ولكن اتوقع بيكون صعب عليك الذهاب لطبيب نفسي لذلك مالك الا حل القرائه.. النت عندك فيه منتديات نفسيه تحت اشراف اخصائيين نفسيين ادخلي اقري المواضيع واقري هالاطباء وش يكتبون مافيه مانع تشاركين وتشوفين رد الاطباء..ابحثي عن البرمجة اللغوية العصبيه واقري عنها اقري عن المواضيع اللي تعالج مشاكل الكره والحقد وكيف ممكن التخلص منها خليك صبورة مافيه شي يجي بيوم وليلة.. كل مشكله لها حل والصبر اخره فرج..
عزيزتي اساس مشاكل حياتك كلها الفراغ.. انا اقولك من اليوم دوري شغل اتوقع انك سعوديه واكثر ما كثر الله المشاغل بالسعوديه ما يشترطون شهاده ولا شي روحي اشتغلي حطي بناتك عند امك ولا شوفي لك هالدي كيرز اللي بالبيوت طايحين فيها الناس حطي بناتك عندهم وروحي داومي اشتغلي اي شي المهم تستفيدين من وقتك وتتعلمين شي جديد..
انا اشوف انك لو اشغلتي وقتك بوظيفه وبالقرائة رح تتطورين كثيير وتتغير شخصيتك وتزيد ثقتك بنفسك ويصير عندك مصدر دخل بعد وبتتعرفين على ناس وبتتغير حياتك كثير.. لا تقولين ما فيه شغل ان شاء الله تشتغلين ببيتك قولي لاقاربك وجيرانك انك بتسوين دي كير ببيتك بمعنى اي وحده عندها عزيمة ولا بتطلع تحط عيالها عندك وتدفع لك بالساعه او بالشهر اذا بتجيب عيالها كل يوم.. عاد انتي تفنني بشغلك سوي لهم برامج والعاب وابدعي بهالمجال.. ممكن تطبخين اذا تحبين الطبخ وتبيعين.. روحي قدمي على مدارس اهليه يوظفون شهادات ثنوي على مراسلة ولا استقبال.. ما تدرين يمكن مع الشغل تتعرفين على ناس وتحصلين فرصة شغل افضل لزوجك ممكن تغيرين حياتكم انتي بس لازم تطلعين برا البيت وتشوفين العالم عشان تقدرين تتطورين وتطورني حياتك..
انا انصحك بانك تشغلين وقتك بما يفيدك عشان ما تقضينه بسخافات وعلاقات وهمية.. حطي ببالك اذا انتي ما وقفتي وقفه حازمة وقررتي تغيرين حياتك مارح تتغير من نفسها وحرام هالبنات انتي امهم وبارادتك تقدرين توفرين لهم حياة افضل بقوة شخصيتك وارادتك.. اذا انتي قريتي كتب وصرتي مثقفه وعندك منطق الكل بيحترمك ويضرب لك تحيه اذا جيتي تتكلمين بغض النظر عن وظيفتك ولا وظيفة زوجك.. ثقفي نفسك وخلي شخصيتك قوية والكل بيحترمك وصدقيني الثقه بالنفس تفرض الاحترام..
__________________
التعديل الأخير تم بواسطة البحلة بالنفس ; 04-03-2010 الساعة 09:47 AM