منتدى عالم الأسرة والمجتمع - عرض مشاركة واحدة - [ صـغار قلوبنا بيضـا نعيش بعالمٍ محـصـــور ~ دعـوه لكشف المستـوور :D

10-03-2010, 09:17 AM

#11

الحلم الدافئ

قلم مبدع

تاريخ التسجيل: Nov 2005

المشاركات: 2,522

صحتي إلاّ شوي
أنا صحت خلااااص

طبعاً حياتي كلها قبل زواجي بمدينة الورد

طفولتي إلى الآن وأنا أقول أحلى سنين عمري قبل لا أدخل المدرسه<<<ترى داخله بدري 6 سنين
والكل يستغربوا أحكيهم أشياء كنت وقتها 3 سنين وأصغر شويه يستغربوا مره إني فاكرتها

بعد المدرسه نفس ألعابكم ونفس الذكريات (حريم _ عروسه وعريس _ مدرسه) طبعاً أصغر وحده في البنات اللي ألعب معاهم أكبر مني بــ 4 سنين وتجيهم حالات نذاله روحي لاتلعبي معانا انتِ صغيره..
مع أولاد خالي شركه وأحيان ملكه وهما السواقين
وحبايبي(سالي _ ليدي_ هايدي _كنت أحب سنشيرو وأتابع كابتن ماجد )

قبل المدرسه

كنا 4 بيوت جنب بعض
أهل أبوي
أهل أمي
بيت خالة أمي وأبويا مستأجر عندهم شقه تحت
البيوت مفتوحه للكل طوال اليوم وأبواب البيوت تفتح على ممر طويل نهايته باب حديد يتقفل
طبعاً كنت الكبيره وحبيبة أبوها
ماكان في أحد في سني ياأكبر ياأصغر
ماأتذكر بيتنا إلاّ وقت النوم
كان جدي الله يرحمه أبو أمي يلعبني لعبه أنا وولد خالي اللي أصغر مني (الله يرحمك يافواز)
يحط المشابك في أذانينا(تعرفيها الخشب اللي يعلقوا فيها الملابس على حبل الغسيل)
ويقول اللي يتحمل أكثر هو اللي يفوز.

أنا دخلت الروضه بدري<<<مدري على ايش مستعجله جننتهم أبغا أدرس
فدرست وعمري 3 سنين و9 شهور (براعم _ أزهار _تمهيدي) لفيت عليها كلها
كنت أطلع من الروضه على مدرسة أبويا يجي ياخذني ويكمل دوامه
والمضحك في الموضوع كان يطلع من الفصل ويقول انتِ العريفه والأولاد كانوا كبار خامس سادس إبتدائي
وطبعاً ولا حركه ولا نفس لما يرجع أبويا <<<عارفين بأفضحهم ونهايتها فلكه

في الفتره هاذي 2 من أولاد عمي كانوا عندنا يدرسوا في مدرسة أبويا(زوجي وأخوه الكبير)
أتذكر مره كانوا يصلوا الظهر في المدرسه طبعاً يفرشوا في الحوش ويصلوا جماعه
وولد عمي الكبير في السجود يلف وجهه على زوجي ويسولف معاه<<<ماقصرت اشتكيت وانضرب يومتها مسكين
والحكايه الثانيه اللي دايم يفتكرها زوجي
يقول كنّا نلعبك أنا وأخويا في بيت جدي اش مسوين شفتي الثيران لما يحطوا لها قطعة قماش وتجي تجري عليها
المهم أنا اتحمست بزياده وطاااااخ بالجدار وبكى على طول
أبويا في بيته سمع الصوت وجاء جري وشافني أبكي وهما من الخوف شردوا ولحقهم لما انضربوا..

والله يادانتيل كان فيه النوم بس حمسني موضوعك ولو اتذكرت شي بأرجع..
تشكرات ياعسل

__________________
.. ربي لك الحمد والشكر ..