بوصي يا حور انا هجاوبك بصراحة

انتي جوزك نعمة من رب العالمين عليكي

بوصي يا بنتي انتي مبدئيا عندك مشكلتين رئيسيتين

**وقت فراغ كبير ومافيش حاجة شغلاكي ..**تاني حاجة انتي شخصية مودية شوية زي أمواج البحر

ومن فضل ربنا سبحانه وتعالى انه رزقك بزوج هادئ مقدر لطبعك متحمل لشطحاتك النفسية وكمان راجل بيحتويكي كويس اوي ورومانسي لآخر درجة وأي زوجة تتمناه ومسترخي جدا يعني بجد مافيش أحلى من كدا..

شخص زي جوزك ده يا حور لو غار او أثرتي غيرته هتضيعيه لإن الغيرة جواه معاناها بداية النهاية وانه مش بتكون الغيرة اللذيذة دي لأ بيشك فورا .. الغيرة عنده مش بتتجزأ .. يا حرية وثقة تامة يا اما شك واتهام لشخصك لإنك اكيد هتكوني عملتي حاجة كبيرة!

ولو حتى اتناقشتي معاه في مسأله الغيره كموضوع هيقولك ليه اغير انا واثق فيكي وواثق من نفسي .. وهو فعلا كدا

بشخصيتك دي ياحور ماينفعش معاكي واحد غيور عارفة لو غيور هيعمل ايه ؟؟

لا كنتي هتسافري لوحدك نهائي ولا تركبي مع حد لوحدك نهائي ومستحيل تنزلي لوحدك ولا حتى تروحي لدكتور نفسي ولا تتحركي الا بإذن ومعاه شخصيا ومش بعيد كان ضربك وكمان موضوع السجاير ده كانت بقت نهايتك على إيده

انا بتكلم بجد انتي قد تجذبي النوع ده من الرجال عشان بس يروضك مش أكتر ويثبت نفسه ورجولته لشئ ناقص فيه

بينما جوزك شخصية من الاخر بيحب المراة المتحررة المتدينة... اللي هي بتتمثل فيكي ..

كانت عايشة برة عندها حرية حلوة في اختياراتها مش مسيرة بحد ولا مستنية اوامر من حد .. زي الطير الحر .. انتي كدا زي مانتي

وياريت تحافظي على اطار صفاتك دي دايما اياكي تمحيها .. ولكن طوريها

فتخيلي لو كان غيور كانت هتبقى في نار مولعة في البيت لإنك لن تتحملي شخص يتحكم في تصرفاتك ويقمعك ويمحو شخصيتك وكانت هتبقى كارثة نفسية بالنسبة ليكي وعادة الشخص الغيور ايضا غير هادئ وعصبي ... يعني البيت كان هيولع

فيابنتي .. تقبلي زوجك وتفهميه فهو كنز ولا تتبطري على النعمه ..

حاجة كمان دوري ان تشغلي وقت فراغك بأي شكل ..

ياتحملي وتشوفي انتي مخلفتيش ليه

ياتدرسي شئ تاني ياتشتغلي

خططي لحياتك عاوزة تعملي فيها ايه .. وارسمي لها شكل عام مثلا وابدئي اعملي خطوات وحققيها

فكري في أحلامك

طوري من قدراتك .. حاولي ان تزودي من أورادك اليومية وعباداتك

إشتغلي على نفسك فلن تجدي الوقت لتفكري في زوجك وموضوع الغيرة ..

وصدقيني الحاجات دي لو عملتيها وكمان تطورك المستمر في حياتك هو في حد ذاته عامل جذب مهم مابينك وبينه

وربينا يعينك يابنتي