تذكرت موقف اول واجب اخذته بأولى ابتدائي وبحكم اني اكبر اخواني يعني على قولتهم اعتماد ذاتي المهم مستانس بأول واجب ابغى أحله كأني محضر دكتوراه على غفلة وأطلع الكتاب واحطه على الأرض وأطلع الكتاب اللي بننقل من الجمله ونكتبها 5 مرات المهم وأنام على بطني وارفع رجولي واشبكهم ببعضهم وقمت أكتب ( طبعاً الحركة هذي كنت اتوقع ان اللي يبي يحل الواجب لازم يسويها لأني كنت اشوف بنت جيراننا كانت تحل واجبتها كذا وبحكم انها بثاني وانا لسا بأولى قلت اكيد هي اعرف وصرت احل الواجب كذا ) المهم انا فتحت الكتاب بالمقلوب وقعدت اكتب الزبده خلصت الواجب بكره جانا الاستاذ ومر على اللي قبلي وقاعد يمدح فيهم ويعطي كل واحد مصاصه وأنا اقول ياربي متى يوصلني عشان يمدحني مثلهم يوم وصلني مسك الدفتر وبدا يفرفره يمين يسار ويقلب الا يوم صار كنه خط من خطوط الفراعنه وانا اطل في وجهه ياربي طول مامدح ويوم طليت والا اثاريه واضح كاتم ضحكه قلت له ببراءه ليه ماقلت لي مثلهم عاد هنا وهو ينفجر ضحك والفصل يضحكو وقال يا ..... انت ناقل من الكتاب بالمقلوب وهم مايعرفوا شي انا قمت وجري للباب قلت والله لا اعلم ابوي عليك مسكني قبل اطلع ويضمني ويعطيني المصاصات اللي معه كلهم انا نثرتهم بالفصل قلت ما ابي لك شي وابوي غير اعلمه انك تضحك العيال علي قال لا خلاص قلت تبيني ما اعلمه قال ايه قلت يله حل لي الواجب
كنت شايل هم يتراكم واجب امس وواجب اليوم ... وبعدها رجعت للتبطح بس ما أحل أي واجب الا انا متأكد ان الكتاب مش مقلوب وكنت ما اعرف الا عن طريق الصور
الله يرحمك يا استاذ احمد جلس يذكرني فيها لين الثانوي