وحنا صغار كانوا أهلي مسجليني بتحفيظ القرآن بالقوة عشان مايكون لي وقت العب العصر وكانت الحلقة تبدا من بعد صلاة العصر حتى صلاة المغرب وانا كنت مدمن لعب كرة قدم وقلت مالي الا اشوف لي حل وصرت يوم الاربعاء اهرب من الحلقة ويوم السبت الشيخ يكون نسي اني هربت طبعاً الكلام هذا كنا في بداية الدراسة بالتحفيظ يعني مافيه معرفة بالمره لا للاسماء ولا للوجيه الا الطلبة اللي كانوا معاهم من العام المهم انا كان الاربعاء عندي يوم الهروب وعلى طول للملعب وفي ذاك اليوم اللي هربت بعد ماخلصنا لعب كان فيه واحد معانا بالحاره وكلمني وقال كيف تتجرأ تهرب قلت انا بقول لك بس اهم شي ماتقول لأحد قال خلاص قلت انا اهرب كل اربعاء لأن فيه خميس وجمعه ولاراح يتذكر الشيخ ان فيه احد هرب والمسأله سهله جداً تحط ( النعال ) تكرمون بعيد شوي واذا كان الشيخ بعيد عن الباب ومعطيك ظهره حط رجلك المهم الفكرة اعجبت الولد وقال خلاص الاربعاء الجاي اهرب معاك قلت خلاص جينا السبت وأول مابدينا قال الشيخ انا كلفت فراش المسجد يجلس قدام الباب لأجل اللي يبي يهرب مايمديه يقوم الا انا مصوت للفراش ويمسكه المسجد ماله الا باب واحد ويصير الفراش بوجهه وانا وراه ونبي نمسكه وراح اجلده قدامكم لاجل يتأدب هو وغيره انا ضاق صدري بس قلت نشوف وش يصير المهم اني لاحظت انه بعد ماندخل الفراش يسحب الباب بس هل يصكه بس والا يقفله هذا اللي ماكنت عارفه ... وجا الاربعاء وطرطعت لأن الهروب شبه مستحيل ومغامره خطيره خصوصاً لما اشوف الخيزرانه اللي معا الشيخ اطول منه ... جاء الاربعاء وقال صاحبي هاه نهرب اليوم
قلت اكيد هذا الربوع لعب ووناسه وبكره مافيه دراسه ... قلت اسمع لازم اذا هربنا نهرب جميع وبحكم انك ماقد هربت لازم تطبق اللي اقول لك عليه قال كيف قلت انت خل تركيزك علي اذا غمزت لك بعيني استعد حتى لو كان جنبك واذا شفتني فزيت فز بسرعه اهم شي السرعه لأني انا قبال الباب وانت ماتشوف الباب وانا اهم شي الفراش اذا شفته ماهو فيه ماعلي من الشيخ لأنه شايب ولايمديه يلحق المهم غمزت له بعيني وسويت نفسي كأني ابغى انط بس رفعت جسمي بسرعه لفوق وأنا جالس يعني كأني ابغى اعدل جلستي وانا جالس ... صاحبي ماصدق خبر رغم ان بينه وبين الشيخ مترين وعلى طول جري للباب والشيخ يلحقه وصاحبي طاير للباب يوم وصل الباب الا هو مقفل والا الشيخ وراه وهاتك ياجلد ... جلده لين تفل العافيه ويقول للشيخ ماكنت ابغى اهرب انا ابغى الحمام
بس مانفع ويرجع لنا وطول الوقت وهو يشاهق وانا ماغير كاتم الضحك وكل شوي ابغى انفجر بس ربي ستر ويوم طلعنا قمت اضحك عليه وعلمت عيال الحاره وفقسوا ضحك عليه وقال هين تشوف يوم السبت اذا ماعلمت الشيخ انه انت اللي تهرب كل اربعاء وانت اللي اقنعتني اهرب المهم يوم جا يوم الجمعه قلت لابوي الاستاذ يقول ان مستواي الدراسي نازل ومابغيت اقول له ان السبب عشان الحلقه فإذا مايهمك مستواي اروح السبت للحلقه واذا تبيني اصير ممتاز خل الحلقه بالاجازه الصيفيه ... قال خلاص اجل التحفيظ بالاجازه ومن ذاك اليوم مارحت لهم ابد .