أختي..

راح أكون معاكي صريح جدا و إن شاء الله ربنا يوفقني في ردي و ما أتسبب في تشتيت أفكارك.

أنا ماني ضد استمرار علاقتكم و تتويجها بالزواج، بس في نفس الوقت أنا ملاحظ من خلال ردودك إن العاطفة هي اللي بتسيركم و تسير قراراتكم، و هادا الشي طبيعي جدا لأنكم لسا في عنفوان المشاعر. بس احنا بنسمع رأيك انتي بس و انتي بتقوليلنا كلام خطيبك بس حسب ما انتي شايفاه!!

في اسئلة دارت في راسي من خلال قراءتي لموضوعك و الردود..

- خطيبك ما كانت عنده علاقات قبلك؟ ما أقصد الملكة الي اتفركشت، أقصد قبلها.

- ايش عرف خطيبك بأدق تفاصيل صاحباتك، زي مثلا اللي عندها بهاق.. كيف عرف؟؟

- ما سألتي نفسك أو خطر في بالك مثلا، هل خطيبك كان في يوم من الأيام يعرف وحده من صاحباتك عن طريق الصدفه أو يعرف وحده تعرفك و تعرف صاحباتك؟ يعني بحكم انه الى الآن عارف الكلام اللي بيتقال عنك و من وراكي.

- خطيبك ليش بتجيه اتصالات من صاحباتك؟ و ايش عرف صاحباتك برقمه؟؟

- ليش ما يغير رقمه؟ لا تقولي ما يقدر عشان هذا الرقم له 10 سنوات معاه. يقدر يغيره تدريجيا، بمعني يطلع رقم جديد و يعرف الناس على رقمه هادا بدون ما يقفل الرقم الحالي، و أي شخص يتصل على الرقم القديم يعرفه بالرقم الجديد و يقوله ترى أنا حألغي الرقم القديم، الين بعد فتره حيلاقي ان كل الناس بيتصلوا على الجديد و وقتها يلغي القديم تماما.


بصراحه..
أحس خطيبك يحبك صح، بس مبالغ و مسوي آكشن في موضوع المضايقات و الصاحبات عشان بس يحسسك قد ايش هوا بيتحمل كل هادي المضايقات عشانك، لأنو هادا الشي راح يقدر يمسكه عليكي على طول. يعني كل ما دق الزير في المغراف حيقولك انتي فاكره انا قد ايش اتحملت عشانك و اتحملت المضايقات و و و و.


سامحيني على جرأتي و صراحتي، أنا ما أقصد أشكك أو أشتت أفكارك والله، بس أنا حسيت انك صادقه و نيتك صافيه و تبغي تكوني على بينّه قبل ما تطيح الفاس في الراس لأنو شوفي، في كل الأحوال المشاعر بعد الزواج تتغير حتى لو كان الحب اللي بين الاتنين حب أفلاطوني، حتتغير مو لـ كره.. أبدا بس حيسيطر عليها الروتين و يصيروا الاتنين في وجه بعض على طول ويكونوا قالوا كل اللي في نفسهم و يبدأ البرود و المشاكل الزوجيه الاعتياديه تطلع على السطح، بس اللي حيفرق معاكي انتي انو ممكن لما يحس انو طفش يبدأ ينبش في الماضي القديم و يمسكه حجه عليكي.