بسم الله الرحمن الرحيم



أشكر كل أخ أو أخت تجشم العناء وشاطرني همي وسأل وأبدى مرئياته .


طبعا بندخل شوي بالتطورات :

انا أمس بعد ما حصل الخلاف طلعت من البيت وهي تتصل وأنا مب معبرها ولا رديت عليها إلا الساعة 11 بالليل صار كلام وأخذ وعطا قلت لها أنتي منتي تبين أهلي ما يجون هذا هم مب جايين رجاءا ً لا تكلمينن بالموضوع أبد أنا جاي البيت ألحين .

ودخلت البيت ونمت مباشرة ولا عبرتها بس دخلت كنت جايب حلاوة لابني عطيته وقعدت معه شوي بغرفتي وسكرت الباب ونمت .
اليوم أنا ما داومت ونايم بالبيت وصليت الظهر وللحين مارجعت .


إخواني وأخواتي :

أنا الحين الموضوع بالنسبة لي مش موضوع أهلي أو لا ؟
الموضوع أنا مليت منها ومن تصرفاتها ، أنا شباب وعمري توه حرام أعيشه مع وحده تستغل طيبتي .

يعني أنا لما أنه مايعجبني أمر من الأمور يبين بوجهي وإذا حصل وكان هناك خلاف أنا مباشرة أبوّز وأتركها ووالله مايوم في حياتي مديت يدي عليها أو ضربتها وأنا أكره هالشيئ لأن هالعلاقة مب ترويض ثيران لا هي علاقة حب وتضحية .

يا إخوان أنا أفكر جديذا في الطلاق .

اللي يسألون أنت كلمتها قلت لها حاكيتها :

بالنسبة لموضوع نظافة البيت فأنا والله العزظيم بالتلميح وبالتصريح وبالزعل كله مافاد ، طبعا تضحكون لو تدرون أنه كل هالإهمال عشان أجيب لها خدامه دائمة .طيب أوكيه أنا بجيب خدامة لكن لما أشوف أنه زوجتي باذله مجهود ولكن ماقدرت .

بالنسبة للفراش والله العظيم يا إخوان أنه مشكلتي الأزليه التي لا تنتهي . والله يا إخوة إن انتهت مشكلتي اليوم فهي عشرين يوم لا تنتهي والله يا إخوان أعيش في غم لا يعلمه إلا الله يعني أنتم جميعكم متزوجون من إخوة وأخوات وتعلمون حجم أهمية هذا الشيئ خصوصا لشاب مثلي .


هل أنا أفضل الرجال ؟ هل أنا أكرمهم ؟ هل أنا أجملهم ؟ :

بطبيبعة الحال لا . ووالله إنني أتوسم عدم رضاها توسُّما وأحاول تصحيح الخطأ الذي لا تريد .

أنا حمقي لكن بلسانها هي تقول أنت سريعا ما ترضى ، والله يا إخوة لا أقولها تعزيزا لموقفي أو حتى تتعطفوا معي فبالنهاية نحن جميعا هنا لا يعرف بعضنا بعضا ً .

والله يا إخوة إنني أصرف عليها وأنا راضي عنها تمام الرضا , وأسعد لحظه على قلبي يوم أشوفها تضحك ومبسوطه لكن الله تعالى يبي ياخذ كل ٍ على نيته .

قال بعضهم رومنسيات وخرابيط وأقعد معها برومنسيّة :
هذي للحريم اللي تستاهل والله يا إخوة أنا بطبعي عاطفي وأحب هالحركات ووالله بمناسبة مرور ثلاث سنوات على زواجنا قبل تقريبا شهرين سويت لها حفلة أقسم بالله أنها ماتحلم بها طول عمرها بس هل تغيّر شيئ هل قالت والله هالرجال يحبي وقاطع قلبه من شاني لا ما تغيّر شيئ .
من بكرا جايب غدا من المطعم لأنها نايمه ؟ هههههههههههه .

قاعد أتأمل تلك الرسالة التي كتبتها لها على بوكيت الورد بهالمناسبة أمس وأقول الله ياخذ أم الدلاخة لا يكون أنا كاتبها لها الغبية اللي قاعدة تحت عند التلفزيون ؟ لا يكون أنا كاتبها لها النذلة ؟ بس جاوبت روحي إي بالله أنت كاتبها لها لبقرة خخخخخخخ والله يا إخوان أنه مب مدح للي أسوّيه بس أقرأ هنا في المنتدى إنه فلانه من العضوات تددددعي لزوجها لأنه سوى لها كذا ولا كذا وأقول والله ياهي قنوعة أجل لو هي زوجتي وسويت لها اللي أسويه لهالحقيرة وش بتسوي هذي ( ماشاء الله تبارك الله الله يهني الجميع ) .

يعني بعرض لكم نموذج بسيط كان بعد رمضان الماضي / حضرنا مناسبة بالرياض وكنت قايل لها أنه بعد هالمناسبة بنروح الدمام نغير جو . وكانت مناسبة الزواج هذي لواحد من أبناء خواتها انتهينا ومريتها وكنا ماخذين الجوازات معنا على أساس أنه ممكن نطلع البحرين نتمشى فيها .

المهم كان الوقت آخر العصر يوم نجي بنطلع من الرياض للشرقية وانا والله كنت مشتاق لديار زايد قلت لها وش رايك للإمارات ولا للشرقية ؟ وأنا أشد للإمارات والله ما وقفت إلا أنام بالبطحاء عند الجمارك .

والله يا إخوة ماتتعشى في دبي إلا بأفضل المطاعم ، مسكنها في روز قاردن بالبرشاء عند مول الإمارات وعشاء مرة على يخت ومرة مطعم كذا ومرة في مطعم كذا .

طيب هل كنت مبسوط من ناحيتها بالسفرة لا والله .
والله مالبست يوم قميص نوم مع أنها تعرف أنه أنا أموت بهالنوع من اللبس . خخخخخخخ ياخذ أم القرف .

طيب هل هي إنسانه سيئة مائة بالمائة

بطبيعة الحال لا فحالها حال أي حرمة عندها الزين وعندها الشين ولكن كل إنسان يحبب بنفسه أو يكره وفي الأخير أنا شاك في حبها لي ويشهد الله أحسست في النهاية أنه أنا سوّاق وأنها يعني قاعدة عندي على أساس أنه تزوجنا وخلاص فما ودها ترجع بيت أهلها وحاس أنها بنفسها تقول ما دامه رجال كريم ومعطيك خليك عنده .



طبعا أعترف أنه بسبب تركي للحبل على الغارب وإكرامي لها وسفراتي وكثرة الذهاب للمطاعم والأسواق واللي تطلبه حسب استطاعتي ألبيه بمعنى أنه هي أميرة بالبيت حصل ماحصل .


لكن أنا الآن يا إخوة ما أطيق أشوف خشتها أو أناظر وجهها والله العظيم وأنا أفكر جديا ّ أن أنفصل عنها ولكن المشكلة حبيبي ولدي اللي بيضيع بسبب هالمشاكل فوش رايكم .


ملاحظة : بالأمس لم أنم حتى قرأت سورة البقرة كاملة وأنا على فراشي لعل الله تعالى أن يطرد عن الشياطين .