لو لك اخت انت بالنسبة لها كل شي ( الاب والام والصديق) وانت تعرف اختك انها انسانة متدينة وطموحة

وصاحبة همة عالية وكل اللي تقدموا مو على المستوى المطلوب من ناحية دينهم واخلاقهم

وانت لك اخوان في الله طلبة علم وخلوقين , هل فيها عيب لو عرضت اختك على واحد منهم؟



قبل فترة تناقشت مع اخوي في موضوع خاطب لاانا ولا اخوي مرتاحين له

الشاب كان مبتعث وتوه رجع من اربع شهور وعمره 30 سنة

اهله مبسوطين جداً مادياً , يسكنون قريب مننا بس هو وظيفته بأحد المدن الصناعية

مااحد يعرف عنه شي لأنه حياته كلها من مراهقته الى هالعمر بالخارج

الجيران يمدحون بالشايب ابوه , بس الولد مايعرفونه

بالنسبه لعمله فالقسم اللي هو فيه اغلبه امريكان من الجنسين

وهو عمله يعطي دورات للمتدربين السعوديين في مجال الهندسة والمتدربين مايقدرون يزكونه في اخلاقه

ودينه لأنه علاقتهم علاقة مدرس بطلاب فما فيه احتكاك بينهم بس هو عملي ونشيط في شغله ومتميز

بوظيفته وزملاؤه اللي يحتك فيهم هم الأمريكان اللي معاه بالقسم وماراح يستفيد اخوي شي من سؤالهم

اللي عرفته علينا زوجة اخوه واكثر ماكان يسأل عنه كيف شكلها وخاصة جسمها ويدقق كثير بالسؤال لدرجة انه يركز على تفاصيل دقيقة وتخصصها بالجامعة ؟

انا استغربت من اسئلته ليش مايسأل عن دينها واخلاقها ومايمنع جمالها بس مو يدقق لهذي الدرجة

وبعدين كثرة اتصالاته على زوجة اخوه انا مايعجبني كذا

ليش مايخلي اخته او امه تدور او على الأقل يكون التواصل بينه وبين اخوه مو كل شوي يدق عليها

وبعدين الشاب عاش سنين في بلاد فتن واهله اغنياء ويقدرون يزوجونه ليش ماتزوج عشان يعف نفسه في الغربة؟

وطبعاً ماعليه علامات استقامة حليق ومسبل و ...


انا مو مرتاحة له ومابعد رديت على الناس , احس اني محتارة

لأني راح اترك عملي واخواتي في الله وابعد مع واحد احسه غامض وفري



المهم انا قلت لأخوي عمر بن الخطاب عرض حفصة على ابو بكر وعلى عثمان

ولا عاب هذا الشي عمر ولا هو نقص في ام المؤمنين حفصة

اخوي وجه حمر وتضايق وقالي لا انا عمر ولا اصحابي ابو بكر وعثمان والله يجيب الخير

انا طاح وجهي وتمنيت ماكلمته

يعني اخوي شايف الوضع ويعرف المشكلة مو في قلة خطابي المشكلة في قلة صلاحهم

حتى والله في الأخير صرت اقول المهم يصلي بالمسجد وما يدخن و ماابي فضائيات غير اسلامية بالبيت بس

ماعندي شروط ثانية ومع كذا يعترضون على موضوع الفضائيات

واحد كان يقول انه الزوجة هي الملكة بالبيت وهذي مملكتها ومن حقها تختار عفشها من اي مكان

وانا حاضر مع انه انا مااطلبت ولا شرطت هو من نفسه قال , انا فرحت وقلت انا بس ابي يحط الريسيفر

الاسلامي قام ابو الشباب زعل وقال هذي شكلها معقده ومن اولها تبي تحكرني

ومو بس هذا كذا واحد نفس الشي والله انا احترت البنات يتشرطون قاعات وذهب وانا بس اقول ماابي دش ويصير كذا , عشان ماابي منكر في بيتي الله المستعان

بالله عليكم شرطي هذا وش فيه؟