حبيبتي دموووووووع والله حاسة بيك
لاني مريت بظروفك
بس اسمحيلي اقول لك مافي شخص يتمادى في الدنيا إلا ولقي طريق سهل وممهد
وأنت سهلتي عليهم درب التمادي والغلط عليك بسكوتك ودموعك
أختك لما تناديك يالمطلقة ردي عليها بمنتهى البرود بدون أي انفعال:: أنت عارفة وش الله كاتب بنصيبك يمكن تتطلقين ولا
تترملين..؟؟؟
ولا تزيدي ع هذه الجملة عشان مايصير حوار ثم شجار
يادموع والله وثم والله ثم والله ما تنفعك دموعك وإنطوائك ع نفسك
اللي ينفعك شهادتك وأنا ما أقولها لك من فراغ وربي أقولها لك من تجربتي
كنت أدرس بالكلية واقسم بالله إني مسؤولة عن طبخ 9 أشخص وغسل وكوي وتنظيف بيت
وشغل الكلية واختبارات وصعووووووووبات الله وحده يعلم فيها ومااااااااااافي شغالة مو الإمكانات المادية ما تسمح لأ
أمي ما تبغى شغالة لأنها سخرتني انا شغالة للكل... ما اقول غير الله يسامحها ويغفر لها ولي
كنت صامتة ما أرد ولا أتكلم رغم الضغط النفسي والبدني وما في رحمة ولا مساعدة من احد
قمت حطيت حرتي بالمذاكرة وشغل الكلية وكنت كل مرة أجيب الاولى ع دفعتي
المهم إني تخرجت وجلست سنة مافي تعيين ولا ضمان يعني مافي فلوس وانا مطلقة وعندي بنت أبوها ماااااااااا يصرفها
وأبوي ما يصرف علي وعلى بنتي
بالعربي عشت أيام قاسية قسوة الصخور والجبال وذقت الحرمااااااااااااان والمر بأشكاله وألوانه
والله كل ما أتذكر ذيك الأيام أحس بمراة الصبر في حلقي
المهم
أخذت دورة كوفيرة وصرت أصلح خواتي وجيراني بالفلوس وكل من سمع يجيني
صحيح ماصارت عندي فلوس كثير بس صارت معي فلوس أقدر استر نفسي وبنتي
ودارت الأيام وجاني التعيين الحمد لله الحمد لله الحمد لله حمدا وشكرا يليق بجلال وجهه وعظيم سلطانه
يادموع انا تركت البشر ولجأت لرب البشر
كنت كل ماتضيق بي الدنيا أجأ لله وأنا واثقة إن الله يختبرني والفرج جاي جاي
بس الصبر مطلوب ............و جاني الفرج بعد انتظار ...
وأحب أقول لك معلومة أني تزوجت عبر موقع زواج... الفرق اللي بيني وبينك إنت انهرتي واتصرفتي غلط..
أنا ما أنزه نفسي وأقول أنا ملاك... لا بس ما تتخيلين قد ايش أنا كنت حازم وصارمة في التخاطب
ولا أرسلت صور ولا شي لأن منهجية موقعهم ماتسمح..
وإن كان الوضع يسمح برضه ما أرسل
ليش مالي بيت يدخله من بابه عشان يشوفني الشوفة الشرعية اللي الله سمح بها؟؟؟
حتى زوجي قال لي أنا سجلت بمواقع زواج كثيرة
اغلب البنات ضعيفات أو لهم أهداف أخرى ...زيك ما قابلت في تعاملك وتخاطبك...وهذا اللي خلاه يصر يتزوجني
وهذاني الحمد لله حياتي ماشية زيي زي غيري.. حياتي فيها الحلوة والمرة..
أهم شي لا تستعجلين الزواج وتتخيلين إن الزواج هو المخرج الوحيد لهمك وضيقك..
لا لا لا يادموع اصبري اصبري اصبري مخرجك الوحيد هو اللجوء لله
ربنا يختبرك يادموع يشوف صبرك
متى ماجا النصيب يجي الخير معاه
في التأني النجاة والسلامة من عواقب الإختيار الخاطيء
وفي العجلة ع الزواج الندامة في سوء الإختيار
ادري إني طولت عليك بس أتمنى تاخذين فوائد من تجربتي
الله يوفقك امسحي دموعك وخلك قوية مع نفسك عشان تصيرين قوية قدام غيرك..