
مشكلة حياتي
السلام عليكم
انا عضوه جديده ليا شهر تقريبا مشتركه في المنتدى
اذا ماخاب ظني هذا المنتدى كنت مشتركه فيه قبل 6 سنوات بس الظاهر اتغير اسمه
المهم احب اعرفكم بظروف حياتي و اتمنى منكم دعوه صادقه في ظهر الغيب
اتزوجت قبل 6 سنوات من شخص من عائله الوالد
لما صليت الاستخارة شفت حلم بسيط و مفزع
شفت اسمه مكتوب على ورقه بيضه و خفت جدا و صحيت
و تمت الملكه و الشبكه و الزواج في وقت قياسي
بس انا ماكنت مرتاحه
يوم الملكه كانت حرارتي مرتفعه و طفشانه و نمت و سط المعازيم
ماكنت احس بحب او انجذاب ناحيه خطيبي
بعد الشبكه بشهور حاول يغازلني
و انا زعلت و كبرت الموضوع و سويت مشكله
ورفضت انه يزورني
و طلبت من اهلي يبلغوه اني ماابغاه
بس اهلي زعلوا و حلفوا عليا اكمل معاه بحجج كثيرة
وفي النهايه كان قضاء و قدر
و كملت و سار زواجي
اول اسبوع كان جميل جدا
(قبل الدخول)
وبعد الدخول
بيومين
اتغير الرجال و ضل 4 ايام مايكلمني عشان طلبت يطلعني للبحر
و بدأت المشاكل
اسمع كلام سيء يطلع من بيت اهله عني
و طلبت الطلاق بعد شهرين من الزواج
اهلي رفضوا وهوا رفض
و انا كنت تعبانه نفسيا جدا و كل يوم امرض و احس بحزن شديد
المهم بعد سنه طلقني في لحظه غضب و حسيت اني سعيده جدا يوم طلاقي
لكن بعد كدا بدأت احس بضيق و كثرت مشاكلي
و كل ماادخل في وظيفه ماتوفق
ضل وضعي على حاله 4 سنوات
وبعدها بالصدفه اكتشفت ان قريبتي و صديقتي سحرتني و حتى الكلام اللي كنت اسمع ان اهل طليقي قالوه كانت هيا اللي تطلعه عشان تخرب بيتي
المهم انا اتعالجت
ولما شفيت بدأت احس بالظلم و الندم على الطلاق
طليقي اتزوج خلال هادي الفتره و جاله ولد
الحمد لله انا راضيه بقدري و اعرف ان مافي امل لرجعتي لطليقي
لكن
كل ماطلعت لجمعه في العائله اشوفه و اشوف زوجته
المشكله ان صديقاتي اللي كانوا سلفاتي و سلفات اختي
مااقدر اجلس معاهم عشان زوجه طليقي متحسسه مره و خايفه مني
و نظرات الناس ماتخلينا نعمل علاقه طبيعيه
و انا نفسيتي تعبت من دا الموضوع
و في نفس الوقت
كل مااشوفهم نفسيتي تتعب لاني مطلقه من 5 سنوات و نصف و للان ماتزوجت
و صار عمري 29 سنه
ماابغى حل لمشكلتي
بس ابغى دعوه في ظهر الغييييييييييييب
ارجوكم
__________________
يوم مشرق أخر
التعديل الأخير تم بواسطة يوم مشرق أخر ; 11-04-2010 الساعة 02:36 PM