مساء الخير اولا

انا لى فتره منقطعه عن المنتدى
ولان حكايه ان اقص والزق الردود دى متعبه جدا جدا بالنسبه لحد مش خبير فى التعامل فانا هقول ردود عالاسئله من غير الوان ولا تفصيل بالخطوط

اولا يا اخى انا ست زيى زى اى ست وموضوع صاحبك ده كجير جدا جدا جدا

يعنى انا لو قلت ام عياله يرجعها طاب ذنب اللى معاه ايه؟
ولو قلت مايرجعها طاب ذنب عياله ايه؟
ولو قلت اللى تتجوز مطلق تبقى حاطه فى راسها احتمال رجوعه لام عياله ، يبقى اللهم ما فيه مطلق هيتجوز ، وده حكم فيه جور وظلم
ولو قلت انه يجمع الاتنين يبقى ذنبه هو المسكين ايه؟
اخى ابو فراس كل حاله تقدر بقدرها
يعنى كل راجل وله دماغه فى الحته دى
واحد ما يحب القرف فمش هيرجعها وواحد يقول الم الدنيا والام بعيالها
وواحد يقول لا اادبها .......
دى نقطه انا مش هفيدك فيها اوى ..........

نيجى لبافى النقط
اولا حته انها فضلت الجواز على العيال.........
اسمح لى ده كلام حرام يتقال
ربنا شرع الجواز تانى يوم انتهاء العده، والقانون بيقول الست اللى تتجوز تسيب عيالها لابوهم
يعنى الست اتزنقت يا تتجوز وتبقى من الجاحدات ، يا تعيش تربى العيال والوحده تجننها
لو انت مكانها والمجتمع والقانون هيحرموك من عيالك لو اتجوزت والمجتمع بيضغط عليك انك ما تقعد لوحدك لتفسد ، ياترى هتتصرف ازاى؟
بجد والله هتتصرف ازاى؟
تضحى بايه او بمين عشان ايه؟
وللا برضه تضحى بالجواز وامكانيه حياه تانيه عشان برضه الاب مش هيفوت فرصه الا والعيال لو مااتجوزت الست عند سن 12 سنه للعيال هياخدهم منها، ماهو كيد الرجاله برضه يموت
يعنى لما تعجز وهتكون وحيده برضه ابو العيال هياخدهم منها
انت فاهمنى؟

تانى حاجه كونه يفكر انها كانت فى حضن راجل تانى، مش حقه لان هو كمان فى حضن ست تانيه ، واحنا بشر الغيره ما فيه فيها فرق بين راجل وست ابدا ابدا
يعنى اتمنى انك تتفهم ده

شىء مهم الست هى اللى طلبت انها ترجع يعنى هى مازالت باقيه او يمكن جاى لها عريس تانى وقالت ابو عيالى اولى........

يعنى ومش تعثر حظها مرتين ادانه ليها السيده خديجه اولى زوجات الرسول مطلقه مرتين
وقبل ما تقول دى السيده خديجه معلش هى بشر ولم تكن حين تزوجت الرسول لاهى ام المؤمنين ولا هو كان رسول ........يعنى الجزء البشرى فيهم زينا تمام

وهل انت لو كرجل اتطلقت من زوجتك مرتين هتكون عابث وكلام كبير كده؟

سبب طلاقها مش مشكله زوجها اللى هى هترجع له ابو عيالها يعنى الا لو مهتم اوى يعرف اظن اللى يسال ما يتوهش
يعنى بسيطه يعرف اتطلقت ليه؟
مين قال انها مش قادره على فراق عيالها وعيشتها اتنكدت بسبب ده
مين قال انها مش حانه لعيشتها القديمه
مين قال انها ماعرفت تتوافق مع راجل تانى
ومين قالان اخلاقها مش هباب فاتطلقت .........لعصبيتها او كده مثلا

الولاد مع امهم اكيد احسن بكتير من مع ابوهم ومراته لو الام عاقله كده وكويسه
يعنى لو هو مش عاوز يرجعها سيطه جدا يدى العيال لامهم ويجر مش هيخسر شى العيال هتقول له ماما كويسه وهاديه وكده يعنى او ماما نرفوزه وعصبيه وكده يعنى

وكمان فيه شىء بسيط اوى ايه الخساره الفادحه اللى هتعود عليه لو اتجوزها او لو ما اتجوزهاش؟
وايه الفوايد؟

عندى بقى تعليق بسيط على كل ست ترد على مشكله راجل او العكس
ياريت نحط روحنا مكان الست المطلقه دى مثلا
انما الايام دول يا جماعه
وربنا ادرى القلوب بتتغير ازاى
بلاش احكام انها ست مش تمام انها اتجوزت مع انه حلال ربنا
وانها رمت عيالها فتبقى ست انانيه، مع انه غصب عنها ده قانون وكان عليها الاختيار الاسود بين حلالين سبحان الله!!!!!!!
انكم تشوفوها ست مستهتره انها اتجوزت واتطلقت ، مين فيكم ضامن دوام عيشته مع رفيقه
ماحدش يقول انا مش هعمل كده
لو سمحتم يعنى من فضلكم

ارجو يا ابو فراس انى ما اكون وجعت راسك بردى