ابني وأبيه (حرب لا تنتهي )
السلام عليكم ورحمة الله وبركاته
انا متزوجة ولي ولد عمره سنتين و3 اشهور .
ولدي متعلق فيني بقوه وكذلك في امي واخواتي واولاد اخواتي
ويحب اعمامه وهذا شي كويس
بس عيبه انه يكره ابوه
لأن ابوه عصبي ودايم ابوه يقول هذا الولد يكرهني
والولد صار يخاف من ابوه من كثر ما طقه قبل
لكن الابو عقل وقال خلاص ماني طاقه بس اهم شي يسمع كلامي ويحبني مثلك
وانا والله ماني عارفه وش اسوي
مع العلم ان ولدي يحب ويستانس وينبسط في بيت اهلي .
لكن في بيتي انا وزوجي ما ياخذ حريته كثر ماياخذها في بيت اهلي .
وش الحل ساعدوني
والله سوينا اجتماعات انا وزوجي عشان اسوي حل بينه وبين ولده لكن للأسف .
هذا غير ان ابوه يبعده عني ويقول له تعال اجلس عندي
والولد مسكين يصيح يبي يقعد عندي لين ابوه صرخ وقال تعال ويجلس عند ابوه بس متضايق
الولد فيه ميزة انه يضحك معي حتى وانا في بيتي ويضحك معي . يعني ماخذ راحته معي على الآخر وهذا شي كويس
لكن عند ابوه مرة مو مبسوط ومتضايق .
وش الحل يابنات او يا اهل الخبرة
ساعدوني انا متوهقه والله يعلم الضيقة اللي بداخلي
حتى دايم اروح لبيت اهلي اكثر من مرة وانا متهاوشة مع زوجي بسبب خلافه مع ولدي كثير .. هواش وضرب وصرخ ..
وانا خلاااااص مليت من هالعيشه
كل يوم اروح عند اهلي زعلانه او اقعد مع زوجي زعلانه
زعلانه اني رايحه لبيت اهلي وانا زعلانه منه
وزعلانه اني قاعده مع زوجي .. و ولدي وزوجي حرب بينهم.
دبروني تكفون
اختكم في الله
ام البراء