وعليكم السلام ورحمه الله وبركاته
اختي من يوم بنتها صغيره كل ماتروح السوق تاخذ معاها كتاب يهال والبنوته تيلس تتصفحه واختي تشاركها فيه،،
يعني عندج مثلا يوم هي في سن 9 او عشر شهور تعطيها الكتاب اللي فيه صور فواكه حروف او ارقام وكل مافتحت على صوره تقولها باسمها .. اذا فتحت صوره تفاحه تقولها تفاحه وهكذا
ماشاء الله استغلت الوقت صح،،
والبنت بسم الله عليها كملت سنتين وهي ترمس مثل الكبار وتعرف الحروف الهجائيه العربيه والانجليزيه
اليهال عموما ماناخذهم للسوق الا نادر
مره كنت رايحه الجمعيه وخذت معاي عيال خواتي 2 بعمر سنتين و1 بعمر ثلاث سنين وللعلم كلهم يرمسون ويفهمون عالكلام..
قبل ماننزل من السياره فهمتهم نحن رايحين ناخذ اغراض للمطبخ مو اي شي ثاني لا العاب ولا حلويات
واللي يزعجني ويصرخ او يصيح ماباخذه معاي للمره اليايه
وانهم اذا كانوا مطيعين وسمعوا الكلام بسويلهم مفاجأه وياحبهم للمفاجآت
واحد منهم مابغى ينزل من السياره عشان يعرف شو المفاجأه من زود اللقافه هههههه
الحمدلله استمتعنا ونحن نتشرى ويوم وصلنا عند المحاسبه الاثنين بعمر السنتين سوو هجوم عالحلويات والثالث طالع فيني يشوف ردت فعلي "مؤدب فديته" قلت لهم حبايبي اختاروا يا المفاجأه يالكاكاو
وحليلهم حطوا الحلويات واختاروا المفاجأه
المفاجأه كانت عباره عن كاكاو يعشقونه اخذه لهم بين فتره وفتره كنت مشتريته لهم اصلا ومخليتنه فالسياره وعطيتهم اياه اول ماركبوا السياره
وطبعا الاكل فالسياره ممنوع وخصوصا اذا كان كاكاو.. متعودين ياكلون اذا وصلوا البيت
،،،
العاده في كل مركز او جمعيه يكون فيه رياييل تابعين للهلال الاحمر يستلمون التبرعات،، واذا صادف انه حد من خواني او ولد اختي وياي من 10 الى 13 سنه،، اذكرهم بالصدقه واذا ماكان عندهم فلوس اعطيهم واقولهم روحوا للريال وتصدقوا
ومرات اتعمد اتصدق جدامهم مثلا اذا كنا فالسياره ووقفنا في مكان وشفت عامل نظافه اعطيهم يعطونه عشان ايدهم تتعود عالصدقه
وفالبيت مسويه حصاله للصدقه وماشاء الله اول من بادر وحط فيها هم الصغاريه حليلهم يحطون لو درهم واحد..
...
هذي بعض من تجاربي مع عيال خواتي وخواني لصغار
التعديل الأخير تم بواسطة yes no ; 13-04-2010 الساعة 03:03 PM