مساء الخير يا بنات
يا رب يكون الكل بخير
معلش الفترة اللى فاتت مكنتش حتبة اشارك بالكتابة خالص بس كنت طبعا بدخل كل يوم اتطمن عليكم
انا بخير الحمد لله و كله تمام
بس انا كنت متضايقة من اسلوب الادارة فى انى حسيت انهم بيمنو علينا
انا مقدرش انكر فعلا انهم مدلعينا عن غيرنا انا عارفة
و مقدرش انكر برضو ان اللى حصل من اخواتنا كان غلط فى غلط
بس برضو انا محبش احش ان حد بيتعطف علينا او ان حد بيمن علينا او اننا يتقال علينا حالة انسانية
حالة انسانية ليه؟
احنا ناس ربنا بيحبنا اكتر من غيرنا ابتلانا و فضلنا على غيرنا فى البلاء دا
احنا مش ناقصين لا ايد ولا رجل
و حتى لو ناقصين ايد او رجل ربنا عوضنا بحاجات تانية كتير مش موجودة عند غيرنا
ايه يعنى ربنا مانعمش علينا بالخلفة
الف حمد و شكر ليك يا رب
كارمنا بحجات كتير
عندنا عنين و ايدين و مخ و رجلين و و و و و و و عارفين قادرين ناخد نفس غيرنا بياخده باعجوبة
لكن اسلوب احنا بنعطف عليكم "حتى لو صحيح" لأ و الف لأ
غلطنا اللى غلطت اتعاقبت الباقى ماله و ذنبه ايه؟ ولا حاجة
يعنى لو اخويا غلط بابا يجى يضربنى انا؟ّ!!!!!!!!!!! طب ما اخويا قدامه و دا اللى حصل فقدو عضويتهم و فقدو متنفسهم معانا
بجد افتكرت مشهد من مسرحية مدرسة المشاغبين
لما حسن مصطفى كان بيقول لاحمد ذكى انه فضله عليه و ان هدومه بيديهاله و انه و انه و انه
ما كان من احمد ذكى الا انه قاله انا عارف كل دا بس مش لازم تقولهولى
اخر كلامى فى الموضوع دا يا بنات
احنا مش اقل من غيرنا بل بالعكس ممكن نكون احسن من غيرنا و كتير قوى كمان
و الف حمد و شكر ليك يا رب على نعمك علينا
كلامى دلوقتى ليكى يا فلونا
ايه يا حبيبتى كل الكأبة اللى عملاها دى؟
انابيب مسدودة طب ما انتى عندك رحم و مبايض
غيرك معندهوش
عندك امل فى انك تكونى ام غيرك معندهوش
ليه سيبتى باقى نعم ربنا عليكى فى جسمك و مسكتى فى انبوبة مقفولة
طب عارفة انا عندى واحدة صاحبتى انابيبها بتنزل مادى على الرحم بتمنع انها تخلى جنين يعيش
عارفة الدكتور عملها ايه قفلها الانابيب
و البنت دى عايشة و مماتتش عملت حقن مجهرى و بتحاول و بتجرب
الحمد لله ان ربنا اداكى باب امل مقفلهاش فى وشك خالص
يبقى نحمده و تنفضى الهم و الحزن اللى فيكى دا و تفكرى فى قدام
معايا فلوس الحقن طب ححوشها ازاى طب حعملها عند مين فكرى فى بكرة سيبك من امبارح و اللى حصل فيه البكاء على اللبن المسكوب مش حيجيب نتيجة الا انه حيأثر على باقى الجسم اللى شغال و احنا مش ناقصين احنا قدامنا هدف و مش عاوزين حاجة تعطلنا فى تحقيقه
انتى استهدى بالله و قومى صلى لربنا و اشكريه ان عندك انابيب مقفولة
بالظبط كدة على انابيبك المقفولة مش على باقى جسمك الشغال
لآ على اللى ربنا حرمك منه
تخيلى رد ربنا عليكى ممكن يكون ايه؟
فكرى فيها كدة
انا مش عاوزة روح اليأس تتسرب فينا بصراحة معندناش وقت نيأس
كل واحدة فينا جواها حلم و حلم كبير و جميل و انا بقول الكلام دا بعد ما ربنا كرمنى بكريم لانى قبل كدة مكنتش عارفة و مقدرة النعمة دى قوى ذى دلوقتى
و عشان كدة بحس ان اى واحدة فيكم لما بتقعد مع حزنها ببقى عاوزة اجى و ازقها يالا قومى الحلم دا حلو قوى طعمه حلو
متضيعيش وقت فى قعدتك كدة و قومى دورى حتحققيه ازاى
بجد انا بحبكم جدا و انتم قريبين جدا من قلبى و نفسى افرح بيكم واحدة واحدة بس ساعدونى و ساعدو نفسكم اننا نفرح و نفرح اهالينا بينا و بعيالنا
معلش انا اتكلمت كتير بس قلبى عليكم و عاوزاكم تفرحو و تفرحو قوى
بحبكم فى الله
و اعزرونى لو فى كلامى اى حاجة تضايق
رب لا تذرنا فردا و انت خير الوارثين
__________________
ربنا يحفظلى اولادى من كل سؤ
فَأَنْبَتْنَا فِيهَا مِنْ كُلِّ زَوْجٍ كَرِيمٍ /اللهم ارزق اخواتى بالذرية الصالحة