صباح الخير يا قمرات



حلومة حبيبتى البقاء لله و ان شاء الله تكون اخر الاحزان و يكون اللى جاى كله افراح فى افراح



فلتى حبيبتى سكرتى هى الدورة لما تنزل معناه نهاية العالم ولا ايه؟
لأ دا معناه ان اذا ربنا كان كرمنا الشهر دا كان ممكن يكرمنا بيبيى فيه مشكلة تشقينا باقى حياتنا و ربنا بكرمه علينا انقذنا من العزاب فكرى دايما فى الموضوع بالشكل دا
و ان شاء الله ربنا حيكرمك من واسع فضله ببيبى يملى الدنيا عليكى فرحة و سعادة



اجى بقى لنعومة
بصى يا ست البنات
انا ضد كلام منى و فلونا قلبا و قالبا
مافيش وجه مقارنة بين التلقيح و الحقن من حيث العملية نفسها و التنشيط و التعب و كل الكلام دا
طبعا التلقيح التنشيط فيه بيكون اقل و نسبة الحقن فيه اقل بكتير و التعب الجسمانى لا يذكر
و انا اعرف بنات كتير ربنا كرمهم بالتلقيح ايوة طبعا نسبة النجاح فى الحقن اكتر منه يعنى الحقن ممكن توصل لحد 40% و التلقيح 20%
بس انا بفكر باسلوب تانى غير نسب المعامل
ربنا لما بيريد مش محتاج النسب الهبلة دى لانه اذا مارادش ممكن يخلى النسبة اللى 40% 0% و ممكن يخلى نسبة الـ 20% 100%
و بعدين اللى بيحدد التلقيح او الحقن الحالة نفسها من حيث الحالة الصحية و الجسمانية و السن للزوجة و مدى كفائة السائل المنوى للزوج
بصى التلقيح بيخلص فى 3 شهور اذا عملتيهم ورا بعض
يعنى اكبر نسبة تكرار هى 3 او 4 بالكتير و اذا محصلش حمل الدكتور بيحول الحالة لحقن على طول
فانتى ليه تستعجلى شوفى مش يمكن ربنا يكرمك بالتلقيح و متلحقيش تجربى الحقن؟
بصى انا بقولك الكلام دا من تجربتى فى التلقيح و الحقن التلقيح اسهل بكتير من الحقن مش بقول ان الحقن صعب قوى لأ بس بقول ان الجسم مش بيتعب فى التلقيح ذى الحقن
فانتى جربى التلقيح و اذا منجحش يبقى تتجهى للحقن و يبقى ساعتها عملتى اللى عليكى
و طبعا فى فرق تكلفة بين الاتنين ممكن توصل لعشرة اضعاف
انتى توكلى على الله و ربنا اللى بيرزق و من غير اى كلام من دا كله اطلبى منه يكرمك و يوفقك و يكون جنبك فى كل خطوة تخطيها و امشى ورا كلام دكتورك اللى عارف الحالة كويس و اقسم بالله فى بنات اعرفهم كتير ربنا كرمهم بالتلقيح
و بعدين انا فاهمة وجه نظر فلونا و منى انهم يعدولك مرحلة ممكن تمرى بيها و ميحصلش حمل و برضو تتجهى للحقن
بس برضو ممكن يحصل حمل و متحتاجيش للحقن
انا فى حملى لكريم بسبب التنشيط انا تخنت قبل ما اعرف اصلا انى حامل و فضلت اتخن لحد ما ولدت و زاد وزنى اكتر من 25 كيلو لكن فى حملى المرة دى لحد دلوقتى زدت كيلو واحد بس فى 3 شهور
اعملى استخارة و شوفى ربنا حيفتح قلبك لأية




فلونا ربنا معاكى يا رب بجد انتى عندك حق الواحد لازم يمر فترة يكون فيها ضعيف قوى عشان يقوى و يا رب تكون الفترة اللى فاتت هى اللى تخرجها منها قوية جدا جدا


ساجدة للرحيم انا تحت امرك فى اى سؤال عن دكتور عادل بس للعلم انا مجربتوش شخصيا بس البنات صحباتى فى المنتدى التانى مش عاوزة اقولك بيقولو اشعار فيه لدرجة ان فى منهم بيتابع معاه من الاسكندرية و فى بنات برا مصر بيتابعو معاه عن طريق الايميل
بس اى سؤال انا حسالهم و ارد عليكى اذا معرفتش الاجابة
و ربنا يكرمك يا رب


منى حبيبتى ربنا معاكى و يوفقك يااااااااااااا رب و افرح بيكى قبل ما انزل مصر كمان
يالا شدى حيلك




باقى البنات بحبكم فى الله




رب لا تذرنا فردا و انت خير الوارثين

__________________
ربنا يحفظلى اولادى من كل سؤ
فَأَنْبَتْنَا فِيهَا مِنْ كُلِّ زَوْجٍ كَرِيمٍ /اللهم ارزق اخواتى بالذرية الصالحة