مين الصح انا والا زوجي تعالوا احكموا
السلام عليكم ورحمة الله وبركاته
عندي ولد عمره تقريبا 7 سنوات واليوم الصبح لما صحيته علشان يستعد للمدرسه رفض انه يشرب الحليب ورفع صوته علي وقل ادبه وانا اتنرفزت من اسلوبه وكنت ملاحظه انه له فترة متغير وصاير يقل ادبه معي ومع ابوه ويرفع صوته علينا علشان كذا حبيت اعاقبه بدون ضرب بعقاب مايكون قاسي وقلت له انك اليوم ماراح تلعب بالبلايستيشن لانك قليت ادبك ورفعت صوتك طبعا زعل وقام يبكي وسمعه ابوه وتنرفز مني لاني عاقبته يقول انتي بتخلينه يخاف منك !!
المشكله انه انا وزوجي مختلفين بالتربيه زوجي مدلع ولدي بزيادة ومايحب يهاوشه او يعاقبه حتى لو اخطأ وعلشان كذا الاحظ ولدي متعلق فيه ويحبه اكثر مني بس في المقابل ولدي مااحسه يحترمه ودايما يرفع صوته عليه وماله هيبه عنده انا احاول بقدر المستطاع امسك اعصابي ومااضربه لكن اذا اخطأ او قل ادبه لازم اهاوشه على الاقل او اعاقبه باني احرمه من شي يحبه علشان يعرف انه اخطأ وزوجي يبغاني اتركه مثل ماهو بدون صراخ ولا توبيخ ولا عقاب ويبغاني اسوي مثله وادلعه حتى لو اخطأ مااقوله شي ويقول علشان كذا يحبني اكثر منك لاني مدلعه بس انا احس الدلال الزايد يخرب الطفل ويفقد الاب والام هيبتهم واحترامهم وانا الشي هذا لاحظته في ولدي انه مايخاف من ابوه وماله هيبه واحترام عنده يعني كانه صديقه مو ابوه وانا يخاف مني اكثر ...
ومااخفي عليكم احيانا اغار من تعلقه بابوه واتمنى يتعلق فيني مثله واقول ليش مااسوي مثله وادلعه بس اخاف كثرة الدلال تفسده يعني يكفيه دلع ابوه وماادري مين الصح فينا انا ولا زوجي ؟
ابغى اعرف رايكم بالموضوع وهل طريقة زوجي ودلاله لولدي صح ؟
__________________
يسخر من الجروح ... كل من لا يعرف الألم