احمل جبل من الهم مادري متى ينزاح عني
تفاءلت لين مل التفاؤل مني
كل يوم اقص على نفسي واقول اليوم ستفرج
واكتب في تقويم التلفون هاليوم رح تكون خطبتي
واحدد يوم لملكتي وفي هالشهر زواجي
وتعدي الايام والشهور ولاشي
واحط موعد جديد
مادري اسلي نفسي ولا اقص عليها
كلما تنخطب وحده في العايلة اقول يله الدور الياي علي
كلما تتزوج وحده من صديقاتي اقو ل انا بعدها إن شاء الله
وكلهم راحو واتركوني ومابقت ولاوحدة خلوني بهالهم وحيدة
قلت يله انا آخر وحده ربي يبي يختبرني
ولاوحدة وصلت لعمري هذا حتى اللي تأخر زواجها وكانت تشتكي ومهمومة تزوجت اصغر من عمري بسنوااات
وتمر السنة ورا السنة
اللي حملت وولدت واشوف عيالهم يكبرون ودخلوا مدارس
وانا واقفة مثل الشجرة تمر عليها فصول السنة كلها ولاتتحرك من مكانها
اقول لنفسي ما بعد الضيق إلا الفرج وما بعد العسر إلا اليسر
دوام الحال من المحال اكيد رح يأتي يوم يتغير فيه حالي
لكن للأسف قاعد يتغير للأسوأ
ضعف إيماني فترت عن الطاعات وعن طلب العلم
سحبت اوراقي من الماستر
كرهت الدوام اخذت إجازة من غير راتب
قيام الليل اللي مواظبة عليه من سنين ، الحين صار لي اكثر من سنة مو قادرة اقوم
حتى الواجبات احس بثقل عنها
نصحوني كثير ان اقرأ سورة البقرة لأنهم مستغربين تأخر زواجي
فأنا على قولتهم حلوة وكل المواصفات فيني واللي اقل مني بكثيييييير تزوجوا
في البداية ما كنت مقتنعة خاصة ان الكل تزوج منو اللي بحط عينه علي ولا يحسدني
ولكن لما ازداد وضعي سوء قريتها لمدة شهر تقريبا وحسيت براحة وصرت ارقي نفسي
لكن حسيت بتعب بعدها وتركت حتى الرقية متكاسلة عنها
كنت اتضايق لما اشوف البنات بالدوام يضيعون اوقاتهم بالهدنيا والسوالف
الحين صرت مثل حالهم وأردى
احس بحسرة على هالوقت اللي يضيع مني لكن غصب عني
والله موقادرة اسوي اي شي
الهم خلاني مثل المشلولة
افتح كتاب اقرا سطر واسرح
ابي احفظ وجه من القرآن اقعد يوم كامل اردد ولايثبت لأنه ما في تركيز

اعذب نفسي بالتفكير هل انا السبب لأني رفضت في بداية عمري الخطاب
اول واحد تقدملي كان عمري 19 كلمتني صديقتي عنه
لكني رفضي كان بسبب عيب فيني ماكنت اقدر اتزوج وقتها
ولجهلي وعدم نصح وتوعية من اهلي ماكنت اظن إني رح القى حل لمشكلتي
فكنت رافضة الزواج نهائي
وبعد ما دخلت الجامعة تقدم لي واحد من طرف صديقتي بعد
وكان عمري 21 رفضت لنفس السبب فقالت لي صديقتي مو كل مرة تتكرر الفرصة
وبعدها بسنة تقدم لي خاطب من طرف خالتي واصروا انهم يشوفوني
لكني كنت رافضة رفض قاطع بسبب المشكلة اللي اعانيها وما كان احد يدري عنها
وما كنت احب احد يكلمني عن الزواج
وكنت اسكتهم واقولهم لما اتخرج من الجامعة او لما يصير عمري 25 راح اغير رأيي
فقالت لي خالتي ترا البنت بعد 25 تقل الفرص عندها
ولما صار عمري 23 لقيت حل لمشكلتي بفضل من الله
وصرت مستعدة للزواج
لكن الظاهر إني تأخرت حيل
تمنيت انخطب قبل ما اتخرج من الجامعة
وتخرجت ولا في احد تقدم
قدمت على وظيفة وفي هالفترة تقدم لي واحد وكان عمري 24
كنت فرحانة فهذا اول واحد يتقدم لي بعد ما غيرت رأيي
وكان شعوري يوم الشوفة ما انساه إلى هذا اليوم
فهي اول مرة يأتي واحد يشوفني
لكنهم ردوا علينا بعد اسبوع مافي نصيب
حمدت ربي وقلت إن شاء الله يتقدم لي خير منه
ومرت سنين كنت انخطب ولكن مايتقدمون واللي فيهم عيوب يتقدمون
ارسلت مسج لشيخ كنت اسأله عن قراءة سورة البقرة لمن تأخر زواجها
فرد علي إن اردتي ان اساعدك بزوج صالح فأرسلي بياناتك
ما كنت اتوقع هذا الرد من الشيخ فرحت وقلت اللي راح يأتيني من طرف الشيخ رح يكون متدين وطالب علم وهذي كانت امنيتي فأرسلت له بياناتي لثقتي فيه
وبعد يوم ارسلي بأنه وجد لي شاب متدين حافظ للقرآن عمره 30 وكان وقتها عمري 25 ونصحني بأن لاافرط فيه
كدت اطير من الفرحة فكيف افرط بواحد مثله
ومرت الايام وانا انتظره وتلاشت كل الفرحة
وبعدها بسنة عرفت بالصدفة ا ن والدي وضع بياناتي في لجنة للزواج
كانت صدمة لي وبكيت وشعرت بالذل والإهانة وكأني سلعة تعرض للبيع
ما كنت اتمنى احد يأتيني من طرفهم كنت اتمنى اتزوج مثل اي بنت
وفعلا لم يتقدم لي احد من طرفهم
وحتى الخطابات كنت رافضتهم نهائيا ولا ارغب بالزواج عن طريقهم
وكانوا يتصلون علينا بين فترة واخرى ولا نعرف من اللي اعطاهم رقمنا
وكل يوم تتصل وحده انا عندي خاطب بهالمواصفات وياخذون البيانات ويعطونها لاهل الخاطب
ولكن لا احد يتقدم ،، حتى امي تضايقت وكرهتهم بسبب ازعاجهم واحست كأنهم كانوا يتعمدون ازعاجنا
ومرت سنين صرت اتمنى اتصال الخطابات بعد ما كنت اكرهم
كانوا معطيني احساس اني مرغوبة حتى لو كانوا كذابين
وماعمري فكرت اتصل على خطابة لاني ما اثق فيهم
وحتى زوجة اخي قالت لي على خطابة تضايقت منها وقلت لايمكن
وماتوقعت انه رح يأتي علي يوم اني ادور على ارقام خطابات واتصل عليهم
عرفت رقم وحدة من خلال منتدى واتصلت عليها واعطيتها بياناتي ثنتين معاي بالدوام
وومرت شهور ولاشي
وبعدها صرت اطرش مسجات لاكثر من 10 خطابات واخبرهم عن بياناتي على انها وحده اعرفها
ولكن ولاوحدة اتصلت
يئست منهم وانا من قبل اتصالي ماكنت حاطة امل فيهم فاعتمادي وتوكلي على الله وحده
ولكن مجرد بذل للسبب
حسيتا ني بايرة واقول لنفسي منو يبي وحده بعمري البيوت مليانة بنات اصغر منج بسنيييين ،، تبينهم يخطبونج
طولت وكلامي ملخبط
لكن ربما يكون هذا آخر موضوع لي فأنا الوحيدة اللي من سنين وهي تكتب في هالقسم ولازالت موجودة فيه
كل البنات اللي عرفتهم بهالقسم وقت تسجيلي فيه تزوجوا والأخريات ماعاد لهم أي اثر
لا ادري لما كتبت هذا الموضوع فانا لااريد اشكي لاحد غير ربي لكن ربما محتاجة لمن يصبرني ويدعو لي بظهر الغيب
والحمدلله على كل حال

__________________
يارب افرجها