ماشاء الله عليك ردك صراحه يعتبر رد مناقض للجميع ما ادري هل هو حب ظهور ولا اثبات شخصيه ولا وجهة نظر صحيحه
انا خاطب يا طولية العمر من شهر 8 واول شي قالوا البنت ماتبي بعدين اتصلوا قالوا امهلونا جلسنا نهاية شهر 9 وبعدين جت الخبرية الاكيده بالمكيده...
تملكت اخر شهر 12 بعد مماطلة اهلها وكل شهر يقولون اللي بعده المهم تملكنا وخلصنا وقلنا الزواج في شهر 5 قالوا ما يمدي المهم منا كلمه ومنهم كلمه وانا العاشق الولهان اللي كل ما قال كلمه انحسبت عليه من زوجته وزعلت ويالله ارضي ياعم ارضيناها على اسباب تافهه زعلت لأن اختي اشترت مجلس وتقول ليش ما شاورتني زعلت وانا عازمها في مطعم وتغديت لحالي فيه زعلت لما سكرت السماعه في وجهي عشان اخوها دخل عليها وسولف معها وانا يتسكر في وجهي زعلت لما ... زعلت لما جاء ولد خالتها اللي عمره 19 سنه بيسلم عليها وانا عيت زعلت لما سرقت شغالتها الهدايا اللي جبتها لها وقلت لها اني بدخل اكلمها وزعلت وزعلت وزعلت ....
كنت متابع مع مستشار اسري تربوي يتابع ردود الفعل حقتها اخر فتره الرجال قالي افسح المجال لغيرك (يعني طلق)
البنت وش تبي غير واحد يحبها ويخاف عليها ويفرش لها الارض حرير عشان بس يرضيها وكل المشاكل اللي كلمتك عنها تتخيلي ما تعذرت الا لواحده بس والباقي انا رحت تعذرت لها
وفعلا اذا كان ماتبيني ليش جت سلمتني نفسها يا اختي العزيزه (هذا اذا قلنا البنت ماتبيني فعلا)
طيب نقول انها عين على ما ذكر لي
هل يعجبك وضع التعليق اللي صاير وفترة برود اهلها وانهم يستقبلوني استقبال حلو ويجرحوني بنفس الوقت يقولون في وجهي البنت ما تبيك
انا حاولت بشتى الطرق اني ارجع المياه لمجاريها لكن بدون فايده لي اللحين شهرين على الحال وانتي جيتي لخصتي حياتي في رد مكون من 677 كلمة (واحسبيها)
طيب نقول انها استخرات ربها (مع انها ما تصلي الفروض على كلامها) الله يوفقها ... ما راح نقول شي
انتي شفتي بعين وحده اللي هي من ناحيتها يا اختي تراي انسان احب ولي مشاعر واحاسيس ما تعتبر الايام هذي من عمري والفلوس ذي مو من دم قلبي والدوام مستعد ارفق الخطابات اللي جتني بسبتها وممكن اجيب الورقه اللي وزنت فيها كان وزني واو خقق (72) واللحين 61 لو اني مسوي رجيم حاد ما صرت كذا
ولا تبيني اصور لك شعري اوريك الشيبات اللي طالعه قبل سنه مافيه الا شي ينعد واللحين من كثره الحلاق يشاورني اصبغه لك
تعتبر صدمه قويه بالنسبه لي ممكن عشان اني مندفع لمها واحبها فعلا مو على كلامك احب الفلوس وعلى فكره المال عديل الروح ..
وانتي بكلامك ذا كأنك تطالبين بالتعاارف والاختلاط قبل الملكه او على كلامك قبل يطيح الفاس بالراس يا اخت متحضره اذا كان الحضاره تبي تستغل في الانفتاح الزايد عن حده ما نبيها حنا مجتمع محافظ وشوفي دول العالم كلها تتكلم عن النقطه هذي ماودي ادخل تفاصيل في الموضوع لأن يبي له جلسه كامله وموضوع منفصل
اذا قلت عنها قوية عين لأني صابر على اشياء واجد واتحمل اشياء واجد عشان خاطر عيونها مو عشان اي شي وتفاجأ بكلمة بكل برود ماتبيك ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
ابي اوقف اول شي عشان اوازن نفسي لا يغمى علي وبعدين ابي اروح للي قالي واصطره على وجهه واقوله هيه مو انت اللي تحدد انها تبيني ولا لا !!!!!!!!!!!!!!!!!!!!
بعدين الموضوع كله بيدي سواءا بغتني ولا لا يعني اقدر اغصبها علي واجيبها بالغصب وكأن الموضوع بيدها اللحين تقول ما ابيه طيب من شهر 8 الى 29-12 كل يوم ابوها يتصل على وامرهم واطلع انا وابوها تقدر تاخذ علومي ككلها من ابوها لكن لو شفتيها وشلون ترد على ابوها مو انا بقول عينها قويه انتي تبين تقولينه
واكيد ليش عافتني وانا مافيني عيب لأني فعلا شكيت بنفسي !! هل فيني عيب ؟؟ طيب اذا مافيني وش السبب المقنع انها تجي بعين قويه وتقول ما ابيه
اخر مره كنت على خط رايح 1200 كيلو من المشاكل اللي شفتها قلت بروح اريح عند اهلي وانا على الخط متضايق اتصلت على اخوي قلت اسمع رح اقرب محل ورد واشتر لها احسن بوكيه ورد وارسله لها عشان تتصل على عريس الهنا مع انها غايبه عني 28 يوم ما ادري وش اخبارها ولا اعرف وين هي ووصلها الورد ولا كلمة شكر اتصلي على الاقل قولي الله يعطيك العافيه
وكلام كثير ما اقدر اللخصه في رد ولا ردين لذلك مو محتاج اقنعك اكثر ..................!!!!!
ولو سمحتي اذا حبيتي تخاطبين احد في اي موضوع كلمي صاحب الموضوع فقط لا تتطرقين للأعضاء لأنهم لهم وجهات نظرهم زيك انتي لك وجهة نظر
الله يعطيك العافيه على اهتمامك وردك واعذريني اذا وصلت وجهة نظري بطريقه بدائيه بس فعلا حاجه تغبن لما تبيني مستقبل كامل وينهدم بلحظه وبدون سبب مشكوره اختي وبرضوا تراي استفدة من كلامك ولا تحرمينا من تواصلك
التعديل الأخير تم بواسطة ملاك الغربة ; 05-06-2010 الساعة 10:27 PM